بیٹھی چیل|| ذلفی

ٻیٹھ۔ تحریر ذلفی زندگی اچ اکثر عشق لاجک مُتوں ہوندن۔ کوئی چیز چنگی لگدی ھے، من کوں بھاندی ھے او ہاؤلیں ہاؤلیں روح اچ اُتر ویندی ھے تے ول او ساڈی یاداشت اچ وڑ کے ساڈے وجود دا حصہ بݨ کے اپݨی جاہ بݨا گھندی ھے تے اساں اوندے مُتوں اپݨی روح تے جسم کوں ادھورا ادھورا محسوس کریندے ہیں۔اے عشق دی او منزل ھے جیندا دماغ نال یا لاجک نال ڈاریکٹ گانڈھا نئیں ہوندا۔ جیندی وجہ کولو دماغ اچ بے چینی، آہیں ڈُسکیاں تے تکلیفاں محسوس تھیندن۔ ڈوجھا عشق او ہوندے جیرھا لاجک تے سماجی، تاریخی تے معروضی واقعات نال ڳنڈھیل ہوندے۔ اوندے اچ روح تے دماغ ڈوہیں اپݨی اپݨی ضرورت دے تحت اوکوں قبول کر گھندن تے ڈوہیں دے درمیان ہیک اینجھا سنتولن ہوندے جیندے نتیجے اچ انسان اپݨے آپ اچ چِھک دے نال نال سکون وی محسوس کریندے۔ میں بھُٹو نال عشق دی ڈوجھی قسم نال ڳنڈھل ہاں۔ میکوں لگدے بُھٹو ایں دھرتی، ایں وسوں تے ایں سندھ وادی دی ہیک اینجھی روح ھے جیرھی اپݨے گیان تے دھیان نال وقت تے دھاڳے تیں ایں وسوں دی ابتدائی تہذیب کولو ٹُردی آندی ھے، جیندے اچ وزڈم، دِھرتا، ڈُکھیں کوں جذب کرݨ دی کَلا، ٻیٹھی چیل دی لڑائی، قُربانی، مُحبت تے مونجھ دے رنگ بدرجہ اُتُم موجود ہن۔ ستر دی دہائی کولو گھن کے اج تئیں اساں بُھٹو دی روح دے ڳُݨ پرکھݨ دی کوشد کروں تاں ساکوں ہیک چیز دا بہوں واضح ادراک تھیندے جو وزڈم، دِھرتا، قُربانی تے مُحبت دے او سارے پُکھ معروض دی ترکڑی تیں ہر قسمی سٹینڈرڈ تیں اُڑاند اچ تُلدن۔ جیرھے لوک ایں وسوں دے تہذیبی، سیاسی تے سماجی ارتقا کولو واقف ہن اُنہاں کوں پتے جو ایں وسوں اپݨے نال تھیوݨ آلے ہر دروح، ہر حملے تے ہر قسمی زلل کوں اپݨی ہیک خاص اٹکل تے کلا نال شکست ڈتی ھے ، اتھاں پچادھ کولو کئی حملہ آور آئین، جیرھے اپݨی طاقت دے نشے اچ اپݨی ٻولی تے تہذیب کوں ساڈے تیں تھوپݨ دی کوشد کیتی پر اساں نہ فارس کوں قبول کیتا، نہ عرب کوں اپݨی تہذیب تیں حاوی تھیوݨ ڈتی تے نہ ہی کہیں غوری ، غزنوی یا بابر کوں۔ ستاہاراں دروازے آلے حملہ آور وی اج اتھوں دے لوکاں نال اتھوں دی مقامی زبان اچ الویندن، کہیں مقامی اج تک حملہ آور دی زبان دے کہیں لوظ کوں اپݨی بول چال اچ نئیں ورتیا، اے ایں وسوں دی روح دا کرشمہ ھے جو اپݨے جون کوں ہر حالت اچ سانبھی رکھدی ھے، ایہو وصف بُھٹو دا ھے جو او ہر حالت اچ اپݨی روح کوں اپݨی وسوں نال جوڑ کے رکھدے، اوندے کیتے بھاویں اوکوں اپݨیاں ترائے نسلاں قُربان کیوں نہ کرݨا پوون، اوکوں سامراج دی بھاویں ہر قسم دی مخالفت کیوں نہ سہوݨی پووے پر او اپݨی روح تے اپݨی وسوں دی سُنجاݨ برقرار رکھدے، میں کہیں جذباتی عشق اچ مبتلا تھی کے اے گالھ نئیں پیا کرینداں بلکہ میں پوری ریشنل اپروچ نال ایں چیز دا گواہ ہاں جو بھٹو اپݨے تئیں جتنا تھی سگدا ہا اوں ایں وسوں کوں سہاگݨ رکھئے۔ کالونیل مائنڈ سیٹ دے منظم اداریں نال بھیڑی بھڑݨ ساؤکھا نئیں ہوندا ، منظم فوج، منظم عدالتاں، کارپوریٹ میڈیا، منظم عالمی سامراج تے سامراج دے مقامی دلال سب کہیں بھٹو لگیسی کوں ختم کرݨ واسطے کیرھا ہتھکنڈہ ھے جیرھا نہ ازمایا ہووے، پر بھٹو مُسلسل انہاں نال لڑدا بھڑدا آندے تے ہاؤلیں ہاؤلیں اپݨی فتح دے ٻنے پکے کریندا آندے۔ باقی کئی جماعتاں آئین کئی لیڈر آئین پر او سامراج کوں چھوڑو، انہاں دے مقامی دلالیں دی ہیک سٹ جوڳے تھائین ، اوندے بعد انہاں اچ نہ سمبھلݨ دی صلاحیت ہائی تے نہ ہی او ایں جِھکی بھیڑی دی کلا کولو واقف ہن۔ اُنہاں دی سب کولو وڈی کمزوری ایہا ہائی جو او اتھوں دے مقامی رنگیں تے تہذیب دی شکتی کولو محروم ہن۔ او اتھوں دے ہن وی نہ تہوں انہاں دی صلاحیت وی کائینا ہائی۔ ایں سانگے میں سمجھیندا بھٹو نال کھڑݨ دراصل اپݨی دھرتی نال اپݨی وسوں نال تے اپݨی تہذیب نال کھڑݨ ھے۔ کنہائیں دوستیں کوں لگدے جو اج دا بھٹو اسٹیبلشمنٹ نال رل گئے یا کمپرومائیز کر ڳئے اے اُنہاں دی بُھل ھے، ہا ایں وسوں دی ہیک وڈی طاقت جِھکی بھیڑی بھڑݨ دا ہنر بُھٹو کوں ڈاڈھا آندے۔ ساکوں لگدے شئیت بھٹو ہیݨا تھی ڳئے۔ بھٹو انہاں کوں تھکا ٻُڈا کے مریسی تے ول اپݨی وسوں کوں انہاں ظالماں کولو آزاد کرویسی۔ اے تریخ دا سبق ھے، باقی اساں سرائیکی بُھٹو کولو اے اُمید رکھدے ہیں جو او ساڈے دردیں تے نا انصافیں کوں سمجھیسی، ساڈی پاور تے ساڈے وسائل کالونیل مائنڈ سیٹ آلیں جماعتیں کولو واپس گھن کے ڈیسی۔ ساکوں اے وی پتے اے لڑائی کلھی بھٹو دی نئیں اے اتھوں دے ہر سرائیکی تے ایں وسوں تیں راہوݨ آلے ہر وسنیک دی لڑائی ھے، ساکوں ٹھڈے دل نال بہہ کے کجھ ضروری فیصلے کرݨے پوسن، اپݨے سیاسی محاذ کھولݨے پوسن، سیاسی اتحاد وی کرݨے پوسن تے سیاسی جماعتاں نال رلت کر کے اپݨا سیاسی حق گھݨاں پوسی۔ ایں سانگے سرائیکی لوک سانجھ بلاول بھٹو کوں پٹھاݨے خان دی دھرتی تے انڈس سیولائزیشن دے سینٹر اچ ست بسم اللہ آہدی ھے۔