مَیت چاوݨ آلے لوک!|| ذلفی

زندگی انسانیں دے ہیک وڈے طبقے کوں موت دو ہکل کے گھدی ویندی ھے، موت اپݨے آپ اچ ہیک اینجھی بُجھارت ھے جیرھی اج تک کوئی نئیں بُجھ سڳیا۔ پر کروڑاں ارباں سالاں دی موت دی پریکٹس آؤ گزرݨ دے بعد اتنا اندازہ انسان لا گھدے جو اوندیاں نشانیاں کیا ہوندن۔ ول ہر کہیں اپݨے اپݨے اندازے مطابق ایں بُجھارت کوں بُجھݨ دی کوشد کیتی ھے۔ کوئی ایکوں مُکتی آہدن، کوئی ہیک کیفیت کولو ڈوجھی کیفیت اچ ونجݨ دا ناں ڈیندن، کوئی ہیک زندگی کولو ٻئی زندگی دا سفر آہدن، کوئی جنم جنم اچ زندگی دی شکل وٹیج ونجݨ تیں یقین رکھدن تے کُجھ ایکوں فطرت دا دائرہ سمجھ کے اپݨے آپ کوں تسلی ڈیندن تے کُجھ موت دے بعد سڑ گل ونجݨ تیں اعتبار کریندن۔

پر اے ہر کہیں دا یقین ھے جو موت برحق ھے ایندے کولو بچیا نئیں ونڃ سڳیندا۔ لیکن اتھاں موت کولو وڈا ڈُکھ او بُھگتیندن جیرھے اپݨی مَیت آپ چائی ودے ہوندن۔ اپݨی محرومیاں دی میت، خواہشیں تے ارمانیں دی پوری نہ تھیوݨ دی میت، بے وسی، لاچارگی دی میت، غربت، ہجر تے بُکھ کوں سہوݨ دی میت۔۔!!!

میت کوں چاوݨ آلیں دی ہیک اینجھی ونکی وی ھے جیرھی پوری کائنات دی میت کوں اپݨے مونڈھے تیں سٹ کے جیندے ودے راہندن۔ اے لوک سب کولو زیادہ آؤکھے ہوندن۔ انہاں دے اپݨے ڈکھ، سُکھ، خوشی غمی دی اتنا اہمیت نئیں ہوندی نہ ہی اے انہاں کوں وضاحت نال ڈس سڳدن اے ٻس ڈوجھیں دی زندگی نال جُڑے مسائل نال اپݨے آپ ڳنڈھیج ویندن یا آکھوں قدرت انہیں نال اینجھا کھیڈ کھیڈدی ھے جو اے آپ اُتھوں نکلݨ چاہون وی نئیں نکل سڳدے۔ انسانیں دی اے ونکی اپݨے آپ اچ ہیک اینجھے لا متناہی ڈکھ نال جُڑیل ہوندن جیندا کوئی انت کائینی ہوندا، کہیں ویلھے سارے سماج دا ڈکھ، کہیں ویلھے سیاسی افراتفری دا ڈکھ، کہیں ویلھے ریاست دے جبر دا ڈکھ، کہیں ویلھے اپݨے گھر فیملی دا ڈکھ تے کہیں ویلھے ایں کائنات اچ تھیوݨ آلی وڈی تباہی ( ماحولیات) دا ڈکھ۔۔!

انہیں کوں زندگی ٻس نچوائی رکھدی ھے۔ عموما اینجھے لوک ریشنل یا عقلیت پسند ہوندن پر پریکٹیکلی اے بہوں ہی جذباتی قسم دی زندگی گُزریندن، ہر نا انصافی، جبر و ظلم انہاں کوں ہیک خاص قسم دے گِلٹ دا شکار کر ڈیندے تے آہستہ آہستہ وقت کولو پہلے موت دی بُجھارت دے پزل اچ اپݨے آپ کوں غرق پایندن۔ !!!