گُزری ویہاݨی!|| ذلفی

ادا حال خیر دا ایہو ساڈے وہیبے دا تہاکوں پتے جو اساں ایویں چھوٹی موٹی نوکری کریندے ہیں، تے گھر دی سوزی، ٻالیں دیاں چیزاں تے لنڈے منڈے تیں وی پھر گھندے ہیں۔ ویسے تاں گھر دے چھوٹے چھوٹے کم کار بہوں ہوندن پر اپݨے واسطے وی تھوڑا بہوں ٹائم کڈھ گھندے ہاسے، ڈیہنہ کوں ترائے چار سنگتی ہیک ہماچے تیں کٹھے تھی چاہ پیندے ہاسے وت گھنٹہ ڈو ڳپ شپ لا کے اپݨے اپݨے کماں تیں لنگھ ویندے ہاسے۔

پر پچھلے ڈاہ ، ٻارہاں ڈیہنواراں کولو ساڈی زندگی اچ تھتھرام کائینی اساں ایں ملک دیاں ہسپتالاں ودے پھردے ہیں۔ ساڈے وسبے لوک اے دعا کریندن جو اللہ سئیں آں ” ہسپتالاں، عدالتاں تے پولیس تھاݨے کولو دُشمن کوں وی بچاویں”. عدالتاں تے پولیس نال تھوڑا بہوں واسطہ پائے پر اے ہسپتالاں دی کہاݨی کجھ الگ ھے۔

جیویں تہاکوں ڈسیا ہامیں جو میڈی بھیݨ دی طبیعت خراب تھائی تاں میں ہسپتالاں دے چکر لاوݨ شروع کیتے تے جیرھے ویلھے بھیݨ میڈی مکمل طور تیں بے ہوش نئیں تھی گئی اوہ تک کہیں ڈاکٹر مرض دی تشخیص ہی نہ کیتی۔ کہیں کجھ آکھیا کہیں کجھ آکھیا۔

ہُݨ تک وی اے کلئیر نئیں تھیا جو اصل اچ تھیا کیا ھے۔ کہیں ویلھے سُݨدے ہیں جو بی بی کوں برین ہیمرج تھائے، کہیں ویلھے گردن تروڑ بخار تھائے تے ہݨ آخری اندازہ اے ھے جو ایکوں پچھلے کم از کم ہیک سال کولو دماغ دی ٹی بی ہائی تے اوندی وجہ کولو ایندی حالت اے تک پہنچی ھے۔

اساں دیہات دے لوک بہوں سادہ تے صحت دے معاملات اچ انتہائی لا پرواہ ہوندے ہیں۔ ساڈیاں اکثر تریمتیں مختلف بیماریں دیاں شکار راہندن پر اساں انہاں دا علاج وقت تیں نسے کرویندے بس گولی ٹکی ڈے کے انہاں کوں اپݨے حال تیں چھوڑ ڈیندے ہیں۔ جیندا نتیجہ اے نکلدے جو بیماری گھر کر ویندی ھے تے ول اوکوں اوندے گھر آؤ کڈھݨ تقریبا ناممکن تھی ویندے۔

ساڈے نال وی ایہو حال تھائے۔ بی بی دے دماغ دی ہڈی کڈھݨی پائے گئی ۔ ہڈی نکل گئی تے ڈاکٹریں آکھیا ہݨ امید کیتی ونج سگدی ھے جو بھیݨ تے تہاڈی بچ ویسی۔ڈاکٹر اپݨے تئیں پورا زور لائی پائے ہن جو مریض بچ ونجے تے ہوش اچ آ ونجے۔

ہݨ تازہ ترین صورتحال اے ھے جو بی بی کوں آپریشن دے بعد بیا اٹیک وی تھیا ہائی جیندی وجہ کولو دماغ دا ادھا سڃا حصہ پورا ڈیڈ تھیا گئے ، خوش قسمتی نال او حصہ بچ ڳئے جیرھا ساہ تے دل دی دھڑکن کوں کنٹرول کریندے۔، ول ہزاراں وسوسے آندن جو اگر بی بی ہوش اچ آ وی گئی تے اوندے بعد کیا تھیسی ، کوئی معذوری تے نہ تھیسی، یاداشت تے نہ لڳی ویسی اپݨا بیلنس رکھ سڳسی نہ رکھ سگسی ایویں کئی خیال آندن۔ ول ڈاکٹریں نال گالھ کریندے ہیں تاں او آہدن ایں کولو خراب حالت آلے مریض وی اساں ٹھیک تھیندے ڈٹھن اے وی ٹھیک تھی ویسی۔خیر ڈاکٹریں ہیک کم چنگا کیتا جو بی بی کوں وینٹیلیٹر ہٹا ڈتا تے ہلکی پُھلکی خوراک وی ساہ دی نالی نال ڈتی ویندی پائی ھے، جسم دے اکثر حصے کہیں کہیں ویلھے حرکت وی کریندن۔ پر ہوش نئیں پیا آندا۔ ڈاکٹریں کولو پچھے سے جو ایکوں ہوش جیرھے ویلھے آسی ڈاکٹر آہدن اساں حتمی طور تیں کجھ وی نسے آکھ سگدے ہیک منٹ اچ وی ہوش آ سگدے چھ ، ست ڈیہنہ بعد آوے اے وی تھی سڳدے۔ بھا لڳی میڈیکل ساینس وی ہالی تک انسانی جسم دے ریسپونس بارے کجھ واضح پریڈکٹ نئیں کر سڳدی۔ انسانی جسم ہیک انتہائی پیچیدہ ارتقائی سفر اچ گزرݨ دے بعد لکھاں کروڑاں قسم دے کنیکشن نال چلدا پیا ہوندے ، ہر ہر کنکشن کوں چیک کرݨ ڈاکٹریں دے وس دی ڳالھ نئیں ۔ خراب کنیکشن کوں گولݨ واسطے بی بی دے ہݨ تک سینکڑاں ٹیسٹ تھی چکن پر او فالٹ قابو نئیں آیا جیرھا جسم دے کنیکشن کوں ولا بحال کر کے ری سٹارٹ کرے۔ بس دعا کریندے راہسو۔