پاکستان ہیک مافیا سٹیٹ!|| ذلفی

ریاست دا وی انسانیں آلی کار ہیک خاص کیریکٹر ہوندے تے او اپݨے کردار نال سنڃاݨی ویندے ھے۔ عموما ریاست کوں چلاوݨ آلے لوکیں دی سوچ دا پچھانواں ریاست دی پالیسی اچ ٹرانسلیٹ تھیندے کیوں جو انہاں دی مرضی ریاست دے رویہ جاتی پراسس کو ٹھاہیندی ھے۔ ریاست پاکستان زیادہ تر ہیک اینجھے مافیا دی پکڑ اچ رہ گئی ھے جیرھے جمہوریت ، انسانی حقوق، ثقافتی تنوع، میرٹ تے قانون دی بالا دستی تیں یقین نئیں رکھدے۔

انہیں اپݨی ناجائز طاقت دے ذریعے ریاست دے ہر اہم ادارے تیں قبضہ کر کے ایکوں ” مافیا سٹیٹ ” بݨاوݨ اچ کوئی کسر باقی نئیں چھوڑی۔ عدلیہ، میڈیا، بیوروکریسی تیں ہمیشہ جی ایچ کیو دا قبضہ رہ گئے تے انہیں انہاں فورمز کوں اپݨی مرضی دے مطابق چلائے جیندی وجہ کولو باقی ماتحت ادارے تے گورننس وی تباہ و برباد تھیندا رہ گئے۔

اتھاں اے سوال بݨدے جو کیا ایں ملک دے سب کولو طاقتور ادارے اچ سارے لوک بے وقوف ہن جو او ریاست کوں تباہی دی نہج تیں گھن آئین؟

ایں سوال دا جواب انسان دی نفسیاتی تے طاقت دی فطری بُکھ دی ڈائینامکس اچ لُکیا ہویا ھے۔ طاقت دی خواہش ہر انسان دی فطرت دا حصہ ھے، دانش مندی تے کنٹرول میکانزم ڈوہیں اچ ہیک وڈا تضاد اے ہوندے جو دانش مندی اچ پاور کوں تقسیم کر کے ساریں سوسائٹی دا خیال رکھیا ویندے تے سوسائٹی کوں ہیک یونٹ تصور کر کے اگاں ودھݨ دی کوشد کیتی ویندی ھے، جبکہ کنٹرول میکانزم اچ سوسائٹی کوں کوئی وادھوں چیز سمجھ کے نظر انداز کر ڈتا ویندے تے اختیارات کوں شدید سینٹرلائزڈ طریقے نال کنٹرول کیتا ویندے، ساڈی سیاسی ایلیٹ ، بیوروکریسی تے ملٹری اسٹیبلشمنٹ ڈوجھے رستے کوں اپݨی بقا واسطے اہم سمجھئے تے انہاں بنہیں اداریں تے لوکیں کوں اپݨی ملکیت سمجھ کے اُنہاں تیں کنٹرول اپݨا حق سمجھئے جیندی وجہ کولو ریاست اچ ہیک اینجھا وگاڑ شروع تھیا جیندا منطقی انجام ایہو نکلݨا ہا جیرھا اج ساڈے سامنے ھے۔۔!!