ہیک نشابر ذہنی تے متعصب رویہ۔|| ذلفی

ویہہ پنجوی سال کولو سیاست اچ میڈی کہیں نہ کہیں شکل اچ دلچسپی رہ گئی ھے۔ ہیک تاں میں ماسٹر وی پولیٹیکل سائنس اچ کیتا ہائی ڈوجھا مختلف لوکاں کوں پڑھ کے، سیاسی بیٹھکاں اچ بہہ کے، تے مختلف سیاسی تحریکاں اچ شامل تھی کے بہوں کجھ ڈٹھے تے خود مشاہدہ وی کیتے۔

ہیک گالھ جیرھی میڈے پنجوی سال دے ذاتی تجربے اچ آئی ھے او اے ھے جو جڈاں وی پیپلز پارٹی کوئی الیکشن جیتݨ لگدی ھے تے متعصب اردو میڈیا کولو گھن کے نام نہاد دانش وڑیں تک ہیک گالھ تواتر نال زور پکڑ ویندی ھے جو الیکشن اچ دھاندلی تھائی ھے۔۔حالانکہ اے گالھ تاریخ دے ریکارڈ تیں ھے جو پیپلز پارٹی کوں ہر واری کہیں نہ کہیں شکل اچ دبایا یا وکٹمائز کیتا ویندے تے پارٹی کوں کڈاہیں وی کہیں غیر جمہوری طاقت نہ جتوائے تے نہ پارٹی کوں ایندی لوڑھ ھے، ول وی سب کولو زیادہ بے جا تنقید پیپلز پارٹی تیں کیتی ویندی ھے۔۔او سرائیکی دی مثال ھے جو ” پاݨی اچ پیرا گولݨ” ۔ مثلا حالیہ بلدیاتی الیکشن اچ پیپلز پارٹی سندھ اچ وڈی تعداد اچ سیٹیاں جیتن تاں میڈیا ایں گالھ کوں جواز بݨا کے جو الیکشن دے رزلٹ اچ بہوں دیر تھیندی پائی ھے تے ایندا مطلب ھے جو پیپلز پارٹی دھاندلی کریندی پائی ھے حالانکہ الیکشن کمیشن واضح طور تیں آکھ ڈتے جو اج شام تک پورا رزلٹ آ ویسی تے ساریں پارٹیں دے پولنگ ایجنٹس کوں فارم یارھاں تے بارھاں ڈے ڈتا گئے تے کہیں جاہ تیں وی کوئی سنجیدہ قسم دی گڑ بڑ دی اطلاع نہ میڈیا تیں آئی ھے تے نہ ہی کہیں واضح ثبوت ڈتے۔ بس خواہ مخواہ دا سوالیہ نشان کھڑا کر کے الیکشن کوں متنازعہ بناوݨ دا ایجنڈا چلا ڈتا گئے۔ ایں کولو ظاہر تھیندے جو ایں ملک اچ غیر جمہوری مائنڈ سیٹ دی اشرافیہ کہیں صورت اچ ہیک تل وطنی پارٹی دی جیت کوں برداشت کرݨ واسطے تیار کائینی۔ حالانکہ ڈو ہزار اٹھاراں آلے الیکشن اچ جڈاں لیاری توں بلاول بھٹو کوں زور زبردستی ہروایا ہانیں تے رزلٹ ترائے ڈیہنہ بعد اناونس کیتا ہانیں تڈاں میڈیا کوئی گالھ نہ کیتی ہائی تے نہ ہی مطالعہ پاکستان دے نفیساتی جھٹکے ساہوݨ آلے دانشوراں دے پیٹ اچ کوئی مروڑ اٹھیے ہن۔ اینجھیاں ہزاراں مثالاں ہن جیرھیاں ماضی اچ ریکارڈ تیں ہن جو پیپلز پارٹی کوں کڈاہیں کہیں الیکشن اچ فئیر پلے دی اجازت نئیں ڈتی گئی ول وی پارٹی دی قیادت بھنے ترٹے جمہوری نظام دی بہتری واسطے ہر الیکشن کوں منئے تے گالھ اگاں ٹوری رہ گئین۔ جیندی وجہ کولو پچھلے پندرہ سال کولوں ڈاریکٹ مارشل لا نئیں لگ سگیا۔ ساکوں ایں گالھ تیں سوچن دی لوڑھ ھے جو جمہوری اقدار دیاں دشمن طاقتاں آخر پیپلزپارٹی کوں ہر ویلھے نشانہ کیوں بݨیندن۔۔!!!؟؟