کیا تھیسی؟؟|| ذلفی

ہیک کہاوت ھے جو زندگی امید تیں قائم ھے۔ ہر کہیں دی زندگی دیاں امیداں اپݨی اپݨی نوعیت دیاں ہوندن۔ تے ہر کوئی اپݨی اپݨی امید کوں سینے نال لا کے زندگی دے پندھ کوں کٹیندا پیا ہوندے۔ پر اجکل مملکت خدا داد ریاست ہائے پاکستان اچ امید کولو زیادہ فرسٹریشن تے ” ابزرڈٹی ” ( absurdity) دا راج ھے۔ سیاسی فرسٹریشن کولو گھن کے ذہنی ابزرڈٹی تئیں اکثریت اپݨی اپݨی امید کوں دفنا کے نہ چاہندیں ہوئیں وی جیوݨ دی رسم کوں پورا کریندی پائی ھے۔

مثلا سیاسی طبقات اچ اینٹی عمران طبقہ ایں امید اچ ھائی جو ایں بندے دے خلاف بہوں جلد کوئی سنجیدہ کارروائی تھیسی تے ایکوں ریاست جلدی منطقی انجام تک پُچیسی، ڈوجھی طرفوں پرو عمران طبقہ ایں امید اچ ہا جو ریاست عمران دے مخالفین سیاستدانیں کوں اینجھا سبق سکھیسی جو او سیاست آو توباں تائب تھی ویسن۔ پر ڈوہیں طبقات اپݨی اپݨی جاہ تیں شدید سیاسی ابزرڈٹی دا شکار ہن۔نفرت دی انتہا اتنا ودھ چُکی ھے جیندا کوئی اندازہ ہی نئیں لایا ونڃ سڳیندا۔ مثلا عمران حامی طبقہ اے چاہندے جو ملک بہوں جلدی ڈیفالٹ کر ونجے، ایں ملک اچ ہر شے ختم تھی ونجے، اٹا نہ ملے، بجلی نہ ہووے، گیس کہیں دے گھر نہ پجے، نوکریاں ختم تھی ونجن، پاکستان دنیا اچ سیاسی آئسولیشن دا شکار تھی ونجے ۔۔۔! صرف ایں بنیاد تیں جو پی ڈی ایم دی حکومت ناکام تھی ونجے تے لوک ول عمران خان کوں اقتدار اچ گھن آون۔

ڈوجھی پاسوں اینٹی عمران طبقہ چاہندے جو عمران تیں بغاوت دا مقدمہ تھیوے، ایکوں جلد از جلد گرفتار کر کے ڈھک ڈتا ونجے، ایندے نال ڃُڑے قریبی لوکیں کوں سزائیں ڈتا ونجن تے ایں فتنے کوں نیست و نابود کر ڈتا ونجے۔ اگر ایویں نہ کیتا ڳیا تاں ملک اچ نہ معاشی حالات ٹھیک تھی سڳدن تے نہ ہی سیاسی استحکام آ سگدے۔

دلچسپ گالھ اے ھے جو ڈوہیں پاسوں انتہا پسندی دی ایں کشمکش اچ وڈی امید عدلیہ تے ملٹری اسٹیبلشمنٹ کولو ھے تے ڈوہیں پاسوں دے شدت پسند طبقات ملٹری تے عدلیہ کولو مایوس تھیندے ویندن تے امید تیزی نال ختم تھیندی ویندی ھے۔

ہُݨ اتھاں ہیک ٻہوں ہی سنجیدہ سوال اے ھے جو ایں نا امیدی دی فضا اچ ریاست دا کیا ٻݨسی؟

ایں ٹائپ دی صورتحال اچ ہیک امکان تاں اے ھے جو لوک ہاؤلیں ہاؤلیں غیر سیاسی اشرافیہ کولو متنفر تھی کے ول سیاست آلے پاسوں آسن تے مُلک اچ جینوئین سیاست دا مُنڈھ بدھیسی۔ ۔۔!

ڈوجھی صورتحال اے ھے جو زیادہ تر لوک ایں پورے نظام کولو سیاسی طور تیں لا تعلق تھی ویسن تے ملک اچ سول ادارے بالکل کمزور تھی ویسن۔

تریجھی صورتحال اے تھی سگدی ھے جو لوکیں دا غصہ ایں نہج تیں پہنچ ویسی جو او ہر ادارے تے سیاست دانیں دے خلاف پر تشدد کارروائیاں کر کے ہر چیز کوں تہس نہس کر ڈیسن۔

انہیں ترائے سنیارو اچ جیرھی گالھ دا غالب امکان ھے او اے ھے جو ساڈی اجتماعی سیاسی سوچ بہوں ہی چھوٹی تے بے کار سطح دی ہووݨ پاروں اساں ہمیشہ کہیں ہیرو یا مسیحا دا انتظار کریندے رہ ویسوں تے اپݨے سیاسی ، ثقافتی تے معاشی حق سانگے کٹھے کائینا تھیسوں جیندی وجہ کولو ریاست کوں عوامی جمہوری ریاست بݨاوݨ دی بجائے ایکوں مزید سفاک تے ظالم تھیوݨ دی چھوٹ ڈیسوں جیندا انت اے نکلسی جو ہر پاسوں سیاسی افرا تفری ودھسی تے لوکیں دی تھوڑی ٻاڑی بچی کُھچی امید وی ختم تھی ویسی۔ ایندا آخری نتیجہ اے نکلسی جو اے ریاست وی بے معنی تھی کے اپݨے انجام کوں پہنچسی۔ ریاست تے لوکیں کولو وقت بہوں تھوڑا ھے ۔