گھمبیرتا|| ذلفی

جیویں آکھیا ویندے جو زندگی ست رنگی ھے، ایویں زندگی دا دائرہ کار وی بہوں متنوع ھے۔ خاص کر اجوکی دنیا اچ زندگی دا پھیلاؤ بہوں ودھ ڳئے۔ کمیونیکیشن ٹیکنالوجی دی وجہ کولو انسانیں دی جُڑت تے گانڈھے دا رشتہ بہوں کمپلیکس تھی ڳئے۔

مثلا ساڈے دماغ اچ معلومات دا ہیک وڈا خزانہ ایہو جیہاں ہوندے جیندے نال ساڈا ڈیوݨا لاھݨا گھٹ ہوندے تے انہیں معلومات دے اثرات سدھے ساڈی زندگی تیں پوندے پائے ہوندن۔

جیویں ماحولیات دا مسئلہ اجوکی دنیا دا ہیک وڈا مسئلہ تصور کیتا ویندا پائے پر ساڈی وسوں دی اکثریت ایندی اہمیت کولو بالکل سونہہ سنجاݨ نئیں رکھدی، جیندی وجہ کولو او درخت مارݨ کولو گھن کے، خواہ مخواہ ہارݨ وجاوݨ، ری سائیکل نہ تھیوݨ آلیں چیزیں دا بلا ضرورت استعمال کرݨ جیویں شاپر وغیرہ، غیر مناسب پیسٹی سائیڈ دا چھڑکاؤ کر کے پورے ایکو سسٹم کوں تباہ کرݨ ، دریاویں کوں گندہ کرݨ تے ماحول دشمن درختیں تے فصلیں دی کاشت کرݨ شامل ھے۔ جیرھے تھوڑے باڑے لوک ساڈی سوسائٹی اچ ایں حوالے نال جاڳ روپ ہن او سارا کُجھ ڈیکھ کے کُڑھدے رہ ویندن ، ایویں اپنے نظام تعلیم کوں ڈیکھ کے جیرھا ڈکھ تے مایوسی دا احساس تھیندے، جتھاں اجوکی دنیا آرٹیفشل انٹیلیجینس اچ بے تحاشا ترقی کر چکی ھے اُتھاں ساڈے ٻال کوں سفر کرݨ دی دعا سکھا کے ساڈی ریاست دی ذمہ داری مُک ویندی ھے، ایں اپروچ کوں سوچ کے جیرھی مایوسی پھیلدی ھے، ایویں سائنس دی نت ننویں ایجاد، دریافت تے اوندا استعمال ڈیہدے یا سُݨدے ہیں تے ول اپݨی سوسائٹی کوں ڈیہدے ہیں جو او کیویں سوچیندی ھے ، ساڈے مولبیں دے لکھاں کروڑاں فالورز اجاں تک شئیت ایں سوچ آو وی باہر نئیں نکل سگیے جو سائنس مسلمان ھے یا کافر ھے۔۔! ایں فنومنے بارے سوچ کے جیرھا ڈکھ تھیندے ایویں ہزاراں پہلو ہن جیرھے ساڈی پسماندہ سوسائٹی اچ بہوں ہی بھیانک شکل اچ موجود ہن انہیں دے بارے سوچ کے میں اکثر ہیک اینجھی گھبیرتا اچ پھس ویندا جیرھی میڈی ذاتی زندگی دا آوٹ پٹ نئیں ول وی او میکوں ڈیپریشن دا شکار کر ڈیندی ھے۔ میڈے واسطے بہوں عجیب ھے جو میں اوندا ہر ویلھے سامݨا کریندا پر میکوں سمجھ نئیں آندی جو میں ایں وڈی گھبیرتا کولو اپنے آپ کوں بچاواں کیویں۔ شئئت کوئی رستہ کائینی اے پسماندہ ریاست تے پسماندہ سوسائٹی دا فطری نتیجا ھے جیرھا ہر اہل علم کوں بھڳتݨے۔۔!