جبر دیاں شکلاں تے رد عمل دی گنڈھڑی|| ذلفی

تحریر ذلفی

اج عمران خان دے کنٹینر تیں حملہ تھائے تے اوندے اچ کجھ لوک زخمی تھی گئین۔ ایں واقعے تیں بہوں ساریں لوکیں اپݨا اپݨا رد عمل ڈتے تے کُجھ اخلاقیات دا درس پڑھاوݨ وی آ گئین۔ اے انسانی فطرت اہم جُز ھے جو او کجھ چیزیں نال نفرت کریندے تے کجھ نال محبت کریندے انہیں ڈو جذبیں دے علاوہ تریجھا جذبہ کوئی نئیں پوندا ۔ یا جیرھے تریجھے قسم دے جذبات کوں اپݨے تے ڈوجھیں تیں ایمپوز کر کے اخلاقیات دی پٹی پڑھیندن او دراصل ایہو جیہاں کیموفلاج ہوندے جیندے اچ او اپݨے آپ کوں دھوکا ڈیندے پائے راہندن۔

ریڈ انڈینز نال جیرھا کُجھ گورے کیتا ہا او اخلاقیات دی پٹی پڑھاوݨ نال یا مہذب پن دا ڈرامہ کرݨ نال ختم نئیں تھی گیا ، ریڈ انڈینز دیاں بے گناہ لاشاں اج وی ویݨ کریندن ، اج وی انہاں نال کیتے گئے ظلم دی اہمیت اخلاقیات دی اہمیت کولوں بہوں اُتم ھے۔

کالونیلزم دے دور اچ لکھے گئے لٹریچر اچ اے گالھ بہوں نشابر ھے جو جیرھیاں قوماں یا نسلاں اوں دور دے آمریں تے بادشاہیں دے ظلم دا نشانہ بݨݨ او اج وی انہاں نال نفرت کریندن او اج وی انہاں کوں پُݨدن۔ پر ظلم کرݨ آلیں انہیں کوں مار کے، وسائل کھس کے، تشدد کر کے، بے گھر کر کے ایں گالھ تیں ٹرکائے جو او ماضی دا حصہ بݨ گئے لہذا تساں ہݨ مہذب تھی ونجو تے ساکوں معاف کر ڈیوو ۔۔اے ہیک امپیریلسٹک ڈڈھپ ھے جیرھا اج وی ورتیا ویندے۔

جیڑھے ساکوں اخلاقیات دا سبق ڈیندے پائین انہاں کوں آکھو جو ” اچھوت لوکیں دا ادب ” پڑھ کے ڈیکھو ول تہاکوں اندازہ تھیسی جو ظالم تے مظلوم دے درمیان اخلاقیات دا کیا کردار رہ گئے؟ اخلاقیات دے ناں تیں کیویں کیویں ہیݨیں تے پر امن لوکیں دی روح نال کھلواڑ کیتے گئین تے اوندا انجام کیا نکھتے۔

زیادہ دور نسے ویندے پارٹیشن دے بعد پاکستان اچ اخلاقیات دے ناں تیں باہر آلیں کوں جیرھیاں زمیناں ، وسائل تے اقتدار ڈتا گئے اوں اتھوں دے تل وطنی نال کیا کر رکھئے، اوندی نہ زمین رہ گئی ھے، نہ کلچر بچے، تے نہ ہی اوندی وسوں تے روایات بچن۔ اج وی مہذب پݨے دے ناں تیں تل وطنیں دا استحصال کیتا ویندے ، انہیں کوں پُݨیا تے بے وسائلا کیتا ویندے تے آکھیا ویندے جو او ساڈے بھائی ہن تے او ہجرت کر کے آئے ہن لہذا انہیں نال نفرت نہ کرو چاہے تہاڈی عزت تے وسائل بچن یا نہ بچن۔

او بھائی اے عمران نیازی کوں اخلاقیات دا سمبل سمجھݨ آلے دوست ساکوں معاف رکھو ایں نام نہاد اخلاقیات، آزادی، قانون دی اجارہ داری تے ریاست مدینہ دے ناں تیں جیرھی نفرت ، تشدد، تقسیم تے افراتفری پھیلائی ھے اوندے اثرات بہوں بھیانک ہن ۔ اے آمرانہ مائنڈ سیٹ دا مالک ہیک نرگیست پسند انسان ھے جیڑھا کالونیل ایجنڈے کوں اگاں ٹور کے اتھوں دی تل وطنی ثقافت، تہذیب، رواداری تے دھرتا کوں تباہ کر کے ایں دھرتی کوں برباد کرݨ چاہندے میکوں ایں شخص نال کوئی ہمدردی کائینی نہ ہی میں اینجھے منافق تے کوڑے شخص نال ہمدردی ورتا سگداں کیوں جو میکوں پتے تاریخ اچ اینجھے کردار پوری سوسائٹی اچ نفرت پھیلا کے اپݨا استعماری ایجنڈا اگاں ٹوریندن تے سادہ لوح لوکیں کوں بے وقوف بݨیندن۔