دانشور۔۔۔|| ذلفی

لوظیں دا اپݨا کوئی مطبل نئیں ہوندا بلکہ اے کہیں صفت، صلاحیت تے ہئیت دے بدھیل ہوندن۔ وٹیندے وقت تے زمانے نال لوظ وی اپݨے کیریکٹر نال جوڑیل ہئیت کوں وٹیندے رہ ویندن۔ مثلا کہیں زمانے اچ لوظ دانشور عزت، تکریم، ایکٹیوزم تے ہمدردی دا سمبل سمجھیا ویندا ہائی۔ میکوں ہݨ ایویں لگدے جیویں اے لوظ اپنی پراݨی معنویت کولوں ہٹ کے ہُݨ نویں ہئیت تے روپ اچ آندا پیا ہووے۔

مختلف سیاسی نظام کیریکٹر دے معنی تے رول وی بدل ڈیندن۔ مثلا جڈاں یونان تہذیبی تے سیاسی طور تیں اڳاں ودھدا پیا ہا تڈاں فلاسفرز دی بہوں عزت تے اہمیت ہوندی ہائی۔ او اوں ویلھے دے حکمراناں واسطے بہوں وڈا چیلنج بݨ گئے ہن۔ وقت بدلیا ، نظام بدلیا تے فلاسفرز کوں لوکیں مذاخ تے ڳلہپ دے معنے اچ ورتݨ شروع کر ڈتا، ایویں کہیں زمانے بہادر تے جنگجو بندے کوں سماج وچ بہوں عزت ڈتی ویندی ہائی تے بعد اچ بہادر تے جنگجو دے مطلب وٹیندے گئے تے اُنہاں کوں فاشسٹ، آمر تے دہشت گرد دے القابات نال یاد کیتا ڳیا، ایویں ڈوجھی جنگ عظیم دے بعد جڈاں دنیا سرمایہ داری نظام دو ونجݨ لگی تے بہوں ساریاں نویاں ریاستاں بݨیاں تاں لوظ دانشور بڑا پاپولر تھی پیا ۔ دانشور پالیسیاں بݨاوݨ اچ، حکومتی امور چلاوݨ اچ، پروپیگنڈہ مہم منظم کرݨ اچ ، سماج کوں نویں انگ رنگ اچ ڈھالݨ اچ اپنا کردار ادا کریندے رہ گئے۔ سرمایہ داری نظام دا ہیک اہم کل پُرزہ بݨݨ سانگے لوظ دانشور دے معنی تے ہئیت وٹیج گئی۔ سرمایہ داری نظام اپݨی کیریکٹریسٹک سانگے دانشور کوں وی ہیک کوموڈٹی آلی کار ورتݨ شروع کیتا تاں ” دانش” کوں پینٹڈ حق سمجھ کے ملکیتی حقوق اچ شامل کر ڈتا گیا تے اوندے اُتیں ہیک قسم دی پابندی لا ڈتی گئی تے پہلی دفعہ دانش کوں بطور کوموڈٹی ورتݨ دا نواں طریقہ کڈھ گھدا گیا۔ جیندی وجہ کولو دانشور ہیک پیڈ کردار دے طور تیں سامݨے آیا تے اوندے اندروں انسانی تے فطرتی خصوصیات ناپید تھیوݨ دا عمل شروع تھیا۔ اکثر دانشور سفاک، مفاد پرست، بے رحم تے سائیڈسٹ روپ اچ سامݨے آوݨ لگے۔ آکھݨ دا مطبل اے ھے جو ہر سیاسی نظام دے اپنے رولے تے وقت ویلھے تے اپݨے تقاضے ہوندن تے ساکوں stagnant نئیں ہووݨا چاہیدا۔ جیویں کہیں زمانے شاعر بہوں وڈی چیز سمجھے ویندے ہن تے انہاں دی وڈی عزت ہوندی ہائی ، بادشاہیں دے درباریں اچ اے رونق لیندے ہن پر وقت وٹیجݨ نال شاعر دا امیج وی وٹیج گیا تے اوندا مرتبہ وی وقت دی یلغار اچ واھے گیا۔ ۔ اگر اج دے دور اچ کوئی شخص بیک وقت شاعر وی ھے تے دانشور وی ھے اوندے کولو پریکٹیکل چنگائی دی توقع رکھݨ بیوقوفی ہوسی۔ اج دا ویلھا آوکھا ویلھا ھے اتھاں ہن لوظیں دے مطبل بدل گئین تے انہاں دے کردار وی او نئیں رہ گئے ہݨ ہیک نویں زبان دی ترویج تھیندی پائی ھے جیندے اچ جذبات تے احساسات گھٹ تے ٹرمنالوجی دا ورتارا زیادہ ہوسی تے زبانیں تے لوظیں کوں ٹیکنیکل بنیادیں دے ناک آوٹ کر کے دنیا کوں بہوں غیر جزباتی تے انتہائی پریکٹیکل بݨا ڈتا ویسی۔