اساں دھی پِندے|| ذلفی

زندگی ہر انسان کوں موقعے ڈیندی ھے تے ہر انسان اپݨے چانس کوں اپݨی فہم نال ورتیندے۔

حالیہ آفت جیرھی سیلاب دی شکل پورے پورے شہر وستیاں تے جھوکاں اجاڑ ڈتن اوندا بہوں ڈُکھ ھے۔ ڈُکھ چھڑا اے نئیں جو ساڈے بال لُڑھ گئین، ساڈے مال ڈنگر مر گئین، ساڈیاں فصلاں تباہ تھی گئین، ساڈے وسدے ویہڑے ویران تھی گئین بلکہ ایندے علاوہ وی بہوں ڈُکھ ہن، ساکوں تاں اے وی ڈکھ ماری ویندی جو جیرھے ویلھے ساکوں ساڈی ریاست دی لوڑھ ہائی اوں ویلھے ریاست شہباز گِل اچ رُدھی رہ گئی، جیرھے ویلھے ساکوں ساڈے سیاسی نُمائندیں دی لوڑھ ہائی اوں ویلھے او تخت لہور دی دلالی اچ مصروف ہن۔

جڈاں ساڈا سرائیکی وسیب پاݨی دے قہر اچ ہاں تڈاں میڈیا ساڈے علاقے دی کوریج دا بلائیک آؤٹ کیتا ہویا ہا۔ جڈاں ساکوں دلجوئی دی لوڑھ ہائی ساڈے وسیب دے اہل ثروت شُغل تماشیں اچ مصروف ہن، جڈاں ساڈیں دھیریں بھݨیں دے جہیز لُڑھدے ویندے ہن تڈاں این ڈی ایم اے چین دی نندر سُتا پیا ہا، جڈاں ساڈیاں تریمتیں بے اوچھݨ تھی ویݨ ودیاں کریندیاں ہن تڈاں ہیک وڈی جماعت دا سیاسی لیڈر جلسے جلسے ودا کھیڈدا ہا، جڈاں ساڈے سیلاب دے مارے لوک بُکھ تے بے گھری دے درد تے تکلیف آؤ گُزردے پائے ہن تڈاں مُلک دے نام نہاد مذہبی راہنما ساکوں ساڈے گُناہیں دی سزا دا طعنہ ڈیندے پائے ہن۔

پر ایں ڈُکھ، درد، تکلیف تے مصیبت دی گھڑی اچ سندھ وادی دے کُجھ دھرتی ڃائے اپݨی مدد آپ دے تحت لوکاں نال جُڑے تے انہاں دے بانہہ بیل بݨ کے انہیں دے ڈُکھ اچ شریک تھائے۔ انہاں لوکاں اچو سرائیکی وسوں دی ہیک دھی راݨی صباحت عروج اپنی زندگی تے وقت کوں متاثرین دی خدمت واسطے وقف کر ڈتا۔ اساں گواہ ہیں اوں ڈیہنہ رات انسانی خدمت واسطے لوکیں دے گھر گھر ونج کے انہاں دی مدد کیتی ، انہاں کوں دلاسے ڈتے ، تریمتیں دے ڈکھ درد سُݨے، انہاں دے ویݨ کوں اپݨے وجود اچ محسوس کیتا تے اُنہیں دی طاقت بݨ کے انہاں دے نال کھڑی تھی گئی، راجن پور کولو رکھ کے ڈیرہ اسماعیل خان دی ایں دھرتی جائی وسوں دا حق ادا کیتا۔ اساں اپݨی ایں بھاڳ وند تے بہادر بھیݨ دے بہوں مشکور ہیں ، سارے سرائیکی وسیب کوں تہاڈے اُتیں فخر ھے ، سرائیکی لوک سانجھ کوں تہاڈے اُتیں فخر ھے جو تُساں بروقت ہیک اینجھا فیصلہ کیتے جیرھا سندھ وادی دی تریمت دے اوں کردار کوں ظاہر کریندے جیندا ذکر رِگ وید کولو گھن کے ایں وسوں دے فقیر شاعر صابر چشتی دی شاعری دی شکل اچ موجود ھے۔ وسمل پنوار دی اے شندھانجلی تہاڈے نانویں۔۔