میرا کام، میری عبادت، میرے کرتوت||محمد حنیف

ہمارے بچپن سے پہلے پاکستان میں ایک مشہور فلم بنی تھی، وہ فلم تو نہیں دیکھی لیکن اُس کا ایک ڈائیلاگ ہمیں سُنایا جاتا تھا کہ ایک چور چوری کرنے کے لیے کسی کے گھر میں گُھستا ہے، واردات کے دوران کہیں قریب سے آذان کی آواز آتی ہے، چور وہیں پر مصلیٰ بچھا کر نماز پڑھنا شروع کر دیتا ہے۔

نماز کے بعد چور کے ایمان سے متاثر ہو کر اہلِ خانہ پوچھتے ہیں چور صاحب یہ کُھلا تضاد نہیں ہے۔ چور کہتا ہے کہ نماز میرا فرض ہے اور چوری میرا پیشہ ہے۔ یہ فلم کا ڈائیلاگ تھا، ہم نے تقریباً اسے اپنا قومی نصب العین بنا لیا ہے۔

یہ ڈائیلاگ اس وقت یاد آیا جب کراچی کی دل دہلا دینے والی بارش میں سڑک کے ایک سگنل پر ایک نوجوان کو موٹر سائیکل لٹائے ہوئے دیکھا۔ پہلے یاد آیا کہ ہم بھی اپنی جوانی میں جب چلتی موٹر سائیکل میں پٹرول ختم ہو جاتا تھا تو اسے فٹ پاتھ پر لٹا کر بیٹھ جاتے تھے اور امید کرتے تھے کہ کہیں سے پائپ میں بچے دو، چار قطرے پٹرول انجن تک پہنچ جائے گا، موٹر سائیکل چل پڑے گی اور کم ازکم اگلے پٹرول پمپ تک پہنچ جائے گی۔

کراچی کی بارش میں موٹر سائیکل کو لٹائے شخص کو کچھ ایسی امید بھی نہ تھی کیونکہ جیب خالی تھی اور بارش میں کام پر جانے کے لیے نکلا تھا کہ کام پر پہنچ گیا تو مزدوری ملے گی جس سے اور پٹرول ڈلوا کر واپس گھر جا سکے گا۔

میں نے صحافیانہ تجسس سے پوچھ ڈالا کہ آخری پٹرول کتنے کا ڈلوایا تھا، اس نے کہا ساٹھ روپے کا، میں نے کہا تصدیق کے لیے چالیس روپے کا بھی ڈلوا کر دیکھو۔ پٹرول پمپ کے مزدور دردمندانہ دل رکھتے ہیں حقارت کی نظر سے نہیں دیکھتے، ڈال دیتے ہیں، پٹرول پمپ کی نال ٹینکی میں تھوکتی ہے اور پھر بند ہو جاتی ہے۔

اس بارش میں جب میرا شہر کراچی ’ڈوب رہا ہوں، ابھی ڈوبا تو نہیں ہوں‘ گُنگنا رہا تھا ٹی وی پر ٹکر چلا کہ ایک بڑے منصف نے فرمایا ہے کہ ہم اپنا کام عبادت سمجھ کر کرتے ہیں۔ یہ بھی یاد آیا کہ ہم ڈوبیں یا بچیں قوم کی نظر میں یا کم ازکم ہمارے میڈیا پر ایک گھمسان کا رن چل رہا ہے جس میں یہ فیصلہ ہونا ہے کہ پنجاب کا حکمران ’پرانے چوروں کا بیٹا‘ بنے گا یا ’ڈاکوؤں کا باپ‘۔

قانونی اور آئینی دلائل سر سے گزر گئے لیکن کام اور عبادت والی بات ذہن میں اٹک گئی۔

،تصویر کا ذریعہPMLQ