مٹھی :ڈائری دا پنا : 43||رفعت عباس

گَڈی بِھٹ تیں ڈکھنڑ پیا گُھلدا ہا ‘ ایں بِھٹ تیں خلق ہی خلق ہئی ‘ تلے مِٹھی دے شہر دے تارے پئے بکھدے ہَن ‘ ایہا اوہ جاہ ہئی جِتھاں مٹھی دے ڈیوے اسمانی تاریاں توں اُتر تھیندن ‘ فوٹو چِھکیم, وڈیو بَنڑایم پر مِٹھی دے ڈیویاں دا بے انت چمکار نہ سانجھا تھیا ‘ ہک بندے دیاں ڈو اکھیں یا بہوں ساریاں لوکیں دیاں بہوں ساریاں اکھیں توں ایہ چمکار اگونہاں ہا ‘ ہک لحظے کیتے دھیان آیم جو متاں ایہو فلک ہووے ست اسمانیں وچوں ہک فلک شئیت پنجواں فلک شئیت ستواں فلک ‘ ایہ سارے جہان دی ساریاں کتاباں دی مابعدالطبیعات دا نظارہ ہا ‘ جیویں جو سچل آکھیا ہا :

جے اِتھ نئیں تے کِتھ نئیں

ایں شہر وچ اکھیجے ہر ڈاہ گھراں وچوں اٹھ گھر ایں دھرتی دے قدیمی وارث ہندؤاں دے ہَن ‘ ہندو اپنڑے مندراں دے نال دیوی دیوتاواں تے مورتیاں نال پئے وسدے ہَن ‘ ایں گھڑی تریمتیں بھانویں رسوئیاں وچ ہوون ‘ آنگناں دلاناں وچ بھوجن دا ویلا ہووے ‘ انہاں وچوں بہوں سارے گھریں تے شیڈولڈ کاسٹ تے دلت ہوونڑ دے اندھارے ہَن پر مٹھی دے ڈیوے حیاتی دی خبر پئے ڈیندے ہَن ‘ ایہ مِٹھی دا گڈی بِھٹ ہک امید ہا ‘ ایہ گڈی بھٹ ہک وعدہ ہا جو ڈیوے ہمیش انسان دے آدر کیتے بلدے رہسن ‘ اتھاہیں مسلماناں دے گھر ہَن ‘ اُنہاں دیاں مسیتاں ہَن جیڑھے ڈیوالی وچ رل تے ہندؤاں نال ڈیوے بلیندے ہَن ‘ جیڑھے ہولی وچ سنگتیاں نال رل تے مکھ رنگیندے ہَن ‘ ایہو مٹھی ہے جتھاں گاں دا آدر ہا تے ہندو محرم دے جلوس دے راکھے ہَن ‘ ایہو مٹھی دے ڈیوے پئے ڈسیندے ہَن جو گھریں نال گھر گچ ہَن ‘ گلیاں گلیاں وچ رل آئیاں ہَن ‘ محلے محلیاں نال مِل گئے ہَن ‘ تھر وچ مینہ منگدی ایہ مٹھی پانڑی متوں ڈُکھی ہئی ‘ ڈو سال توں بارش دی ہک بوند نہ لتھی ہئی ‘ جاتیاں دی ونڈ وچ آئے ہوئے دلت دھمی نال جاگدے ہَن ‘ ڈینہ کوں ڈھویندے ہَن وت رات کوں ڈیوے بلیندے ہَن ‘ مِٹھی دے گڈی بِھٹ تیں اوہے ڈیوے پئے بلدے ہَن ‘ ایہے ڈیوے میڈے شہر ملتان وی بلدے ہَن ‘ ملتان دے قلعے توں رات کوں ڈیکھو تاں بہوں ڈاڈھے لوکیں دے وڈے وڈے مکانیں پچھوں کسبیاں دے نکے نکے گھریں دے ڈیوے وی بلدے ہَن ‘ ایں اولیاواں دے شہر ملتان وچ کبوتراں تے کسبیاں دا لنگر سانجھا تے ازل توں پیا آندا ہا ‘ ایہ مٹھی دے ڈیوے وی سانجھے تے ازل توں پئے آندے ہَن ‘ اساں بِھٹ توں مِٹھی شہر لَیہ آئے ہاسے ‘ ایں ویلے ڈیویاں دے وچوں پئے لنگھدے ہاسے ‘ تھر دیاں اُنہاں ہندو بالڑیاں کیتے دعا پئے کریندے ہاسے جنہاں کوں زوریں مسلمان کیتا ویندا ہا ‘ جنہاں دی رَکھشا کیتے اوڈیرو لال لتھا ہا :

جھولے لال آکھو آکھو جھولے لال