ندی ، او تے میں۔|| زلفی

تحریر زلفی

ندی اچ کنگوں پاݨی اپݨی وہیند نال عجب سُر چھیڑی پیا ہائی جیندے نال روح اچ چاشنی دے ڈیوے پئے بلدے ہن۔ او ہیک پتھر تیں بہہ کے اپݨے والیں نال گُندھی گُت نال کھیڈدی بیٹھی ہائی۔ میڈے وجود اچ محبت دی سرسراہٹ نال کویلیاں پیاں ٹُردیاں ہن۔میں بے خیالی اچ ندی دے پاݨی اچ ہتھ مار کے ہیک چھلوپا اوندے اُتیں چھلوپ کے سٹیا تاں اوں چھرکی بھری تے ول اساں ڈوہیں کھلݨ پائے گیوسے۔ اوندی کھل نال پورے ماحول اچ ہیک جادوئی کیفیت دیاں لہراں پیدا تھیاں جنہاں ساکوں تھوڑی دیر واسطے سُن کر ڈتا۔ تھوڑی دیر بعد حواس بحال تھائے تاں میں اوکوں آکھیا تیڈی کھل تے تیڈے تِل اچ آخر اینجھا کیا ھے جیرھا میکوں دنیا دے ہر جھنجھٹ کولو مُکت کر ڈیندے۔۔اوں ولدا ڈتا تیڈے دماک دے کُتے فیل تھی ویندن بیا کُجھ نئیں۔

میں ول پُچھیا تیڈی محبت اچ میڈے اُتیں بے خودی طاری کیوں تھی ویندے ھے؟ اوں ولدا ڈتا توں ڈھیر ڈرامہ نہ کر میں تیڈے گالہیں دے ڃالے اچ نئیں پھسدی۔۔! میں وت پُچھیا میکوں ایویں کیوں لگدے جو ہوا اچ کہیں بھنگ ملا ڈتی ہووے تے میں اوندے نشے اچ تار متار ہوواں؟ اوں آکھیا تیکوں ہلوسینیشن تھیندی ھے ورنہ اے نشہ میکوں وی تھیوے ہا۔۔میں وت پُچھیا جڈاں میں تیڈے اکھیں اچ ڈیہداں تاں میکوں ایویں لگدے جیویں میں کہیں شانت ڈونگھے سمندر اچ گُم گار تھی گیا ہوواں۔۔اوں ولدا ڈتا اصل اچ تیڈا جسم اچ ہارمونز دی شرح بہوں ودھ گئی ھے تیکوں ایندا کُجھ کرݨا پوسی نہ تاں توں ایویں خیالی دنیا اچ جیندا راہسیں۔۔! میں وت آکھیا توں ظالم نہ بݨ ہارمونز کوں ٹکاݨے لاوݨ دا کوئی اوپائے ڈس۔او کھل پائی تے میکوں آُکھس تیڈے نال اتھاں آوݨ دا مطبل اے تاں نہ ہا جو توں میکوں ہراس کرݨ لگ پوویں۔۔اوندا اے آکھݨ ہا تے میکوں ایویں لگا جیویں ندی دے سارے راگ بے سُرے تھی گئے ہوون ، ہوا اچ بھنگ دے نشے دی بجائے کہیں سِپرٹ ملا ڈتی ہووے، اوندیاں اکھیں ایویں لگیاں جیویں کوئی بیابان دا پرچھاواں ہووے۔ میں پاݨی اچ ہتھ ماریا تے او میکوں ٹھڈا ڃل لگا تے میڈا پورا وجود ٹھڈا ٹھار تھی گیا۔۔! ول ندی ہائی او ہائی میں کائینا ہامیں۔۔!