چیڑیا گھر||عابدبزدار

کراچی دے چیڑیا گھر اچ پکھی پریندے یعنی چریند پریند اتے زناوریں، رَستریں (جانوریں) کولو ٻہوں ݙھیر انسان وحشی نظر آندے ہن جھیرے قیدی جانوریں نال کئی طرح دیاں آوازاں اتے نعارے مار مار اپݨی وحشت پائے ݙیکھندے ہنن ایں سارے عمل کولو میکوں ایویں ڄاپدا ہائی جیویں اساں ای جانور ہووں. چیڑیا گھر دی ایں قید اچ موجود ہاتھی، شیر، گیدڑ، ہَرݨ، ریچھ، چیتہ، کبوتر، مور مُکدی کوں مُکا ونکو ونک دے پَکھڑوں اتے رَستر مسکین، مظلوم اتے ہیݨیں ڄاپدے ہَن اتے انسان کوں دھائیں ݙیندے ݙیسدے ہن میݙا دل اندری اندر انھیں چریند پریندیں اتے رَستریں نال آلیندیں آہدا ودا ہوے وے مسکینوں تساں کیوں دھناں ݙیندوں ایتھاں تاں پوری انسانیت تہاݙے آلیکار سرمایاداری دی قید اچ ھے اتے سَرمایاداری دی قید دے نال نال کجھ لوک تاں تخت لور دے قیدی وی ہن کجھ تاں ݙو قومی نظریا دی قید وی بُھگیندے ودین. اساں وی تہاݙے آلیکار مکمل قید دے عذاب اچ ہیں.

ایندے علاوہ اساں جیکر اپݨی ایں سوہݨی دنیا دی تباہی ایویں جاری رکھی تاں انسانیں، رَستریں اتے پکھڑوئیں کوں تاں مختلف چیڑیا گھریں اچ سامبھ کے رکھ گھنسوں لیکن جھیلے ویلھے اے ہوا پالوشن نال تباہ تھی ویسی تاں اینکوں کہرے چیڑیا گھر اچ رکھسوں? ایویں جھیلے ویھلے ٹمپریچر ودھݨ نال گلیشیئر پِگھل ویسن تاں سندھ دیوتا دیوتا دی ٻولھݨ دی سیڑ اتے مقدس گنگا دے اشنان کیتے پاݨی کہڑے چیڑیا گھر اچ سمبھیسوں? ایندے کولو ودھ جیکر اساں اپݨاں خچ خانہ ایویں جاری رکھیا تاں تباہی دے علاوہ کشے ہتھ نہ آسی. انسان کوں ایں دنیاں تیں راہوݨ کیتے ایں دنیا نال پیار کرݨاں پوسی ایں دنیا کوں ول وساوݨ یتے ہک عہد کرݨاں پوسی جھیرا سانجھا جیوݨ دا عہد ہوسی جیتھاں ہر شے کوں اُتم ڄاݨیاں ویسی وت ای اے دنیا وس سڳدی ھے