روایتی جیالیں دا المیہ || زلفی

کجھ عرصے کولوں جیالے موجودہ پیپلز پارٹی دی قیادت کولوں ناراض ناراض لگدے پائے ہن۔طنز ، طعنے ، گلے شکوے تے سوشل میڈیا تیں چتاونݨیاں ڈیوݨ دا سلسلہ وی چلدا پائے۔ ایندا کارݨ کیا حے تے اے جیالے شودے آئسولیشن دو کیوں ویندے پائین۔۔آو ذرا ایندا تجزیہ کریندے ہیں۔

ایندا ہیک کارݨ تاں اے حے جو لیڈر شپ ہیک وسیع سوشل نیٹ ورک نال ڳنڈھی ہوندی حے تے آوندا ذہن وی تھوڑا جیہاں کل کولیٹو ہوندے۔۔لیڈرشپ دی پہلی ترجیح پاور پالیٹکس اچ مؤثر عناصر کوں اپنڑے نال رلاوݨ ہوندے۔ اتھاں ہیک ضمنی سوال اے وی حے جو اجوکی دُنیا اچ پاور پالیٹکس اچ زیادہ مؤثر عناصر کیرھے تے کون ہوندن۔۔! پالیٹکس تے پاور پالیٹکس ڈو الگ الگ فیلڈ ہن۔۔! پالٹیکس کہیں نظرئے کولو شروع کیتی ونج سگیندی حے ۔ ول اوندا اگلا قدم اوں نظرئے دی ترویج ہوندی حے ۔۔! نظریہ حقیقی تے لوکیں کوں اپیلنگ ہوسی تاں لوک اوندے نال جُڑدے ویسن پر کہیں وی نظرئے کوں پھیلاوݨ واسطے وسائل، لیڈرشپ تے لابنگ اُتم کردار ادا کریندن۔۔!

اے ترئیے عناصر اگر مضبوط ہوسن تے کوئی وی پارٹی پاور کوں حاصل کرݨ اچ ساؤکھ محسوس کریسی۔۔! اجوکی دنیا دی جدید ریاست اچ طبقات دے درمیان شدید رسہ کشی چلدی رہ ویندی حے۔۔! ایں رسہ کشی اچ ڈیٹا تک رسائی تے اوندا استعمال، وسائل تے لابنگ دی کلا، پروپیگنڈہ تے ول ذہن سازی یا میڈیا وار بہوں اہم کردار ادا کریندن۔ڈاڈھا طبقہ مندرجہ بالا عناصر کون اپݨے حق اچ بہتر استعمال کر گھندے جیندی وجہ کولو نظریاتی سیاست کمپرو مائیز تھیوݨ دا حقیقی خدشہ ہر وقت موجود راہندے۔۔! ہیک نظریاتی ورکر ایں حساسیت کولو نا واقف ہوندے او سمجھدے جو پالیٹکس صرف نظرئے دے ارد گرد بھوندی حے تے نظریہ ہی سب کولو مقدم ہوندے۔۔اخلاقی طور تیں تاں اے گالھ بالکل ٹھیک تے جائز حے پر سوسائٹی اچ اخلاق دے معیار اتنے بلند و بالا کائنے ہوندے ایں گالھ دی نظریاتی ورکر کوں بالکل سمجھ نئیں آندی۔۔او ہیک آئیڈئیل پوزیشن اچ رہ کے اپنڑے آپ کوں سچا تے بلند معیار تیں کھڑا ہیک اینجھا استعارہ سمجھدے جیندا واسطہ تعلق ُمقدس سلسلے نال ہووے تے اوندے علاوہ باقی سب کچرا تے فضول مال ہوندے۔۔اے رویہ تے اپروچ ہیک اینجھی نرگسیت کوں انسان دے اندروں پیدا کریندی حے جیرھی معروضی حالات دی تلخی کوں جسٹیفائی کرݨ دی ذہنی صلاحیت کوں تقریبا ختم کر ڈیندی حے۔۔!

ایں فنومنا اچ نظریاتی ورکر ہر پارٹی اچ شدید آئسولیشن دا شکار ضرور تھیندے پر اوندی اہمیت ہر ویلھے ہوندی حے پائی۔۔او ہیک اثاثہ ہوندے جیرھا آؤکھے وقت واسطے کہیں وی پارٹی دے کم آندے۔۔! پارٹی جڈاں آوکھی ہوندی حے تڈاں احتجاج، جلوس، ریلیاں تے کنونشن کریندی حے اوں ویلھے اے طبقہ بہوں اہمیت دا حامل ہوندے۔!

پر پیچیدگی اوں ویلھے بہوں ودھ ویندی حے جڈاں نظریاتی ورکر فرنٹ تیں کھیڈݨ دا سوچیندے تے پارٹی دے فیصلے اپݨی سوچ مطابق لیڈرشپ کوں کرݨ تیں اُکسیندے۔۔! ظاہر حے لیڈر شپ دیاں آپنیاں مجبوریاں ہوندن اوں وسائل، سماجی اثر و رسوخ تے پاور فل طبقات نال لابنگ واسطے اہم عناصر کوں مد نظر رکھ کے کوئی فیصلہ گھنݨاں ہوندے تے اے پریکٹس پوری دنیا اچ تھیندی حے۔۔! اینجھی صورتحال کوں سیاݨی لیڈرشپ ہینڈل کر گھندی حے پر لازمی نئیں ہر ویلھے ایں مسئلے کوں آئیڈئیل طریقے نال حل کیتا ونج سگیجے۔!

سیاست کرݨ ہیک بہوں وڈی کلا حے تے ایندے مختلف مراحل ہوندن ۔۔ایندی اینڈ پروڈکٹ حصول اقتدار ہوندے ۔ جیرلھے کوئی پارٹی اقتدار اچ آ ویندی حے اوندے بعد او ایں قابل ہوندی حے جو او اپنڑے نظرئے تے منشور سانگے کُجھ بہتر حکمت عملی بنا سگے، کُجھ عملی اقدامات کر کے نظریاتی ورکرز کوں اڳاں گھن کے ونج سگے تے آئین اچ بہتر تبدیلیاں کر کے ریاست کوں لوکیں واسطے انسان دوست بݨا سگے۔۔اے کم پیپلز پارٹی بنہیں پارٹیں کولو بہتر کریندی رہ گئی حے تے آوݨ آلے وقت اچ وی بہتر انداز اچ کر سگدی حے ۔ایں گالھ کوں جیالیں کوں وی سمجھݨا پوسی تے پالیٹکس کوں ورتاوݨ دا ڈھنگ ڈھالا سکھݨا پوسی۔ نہ تاں ہیک اݨ کُھٹ فرسٹریشن دا شکار تھی کے مزید آئسولیشن اچ مارکا لگے ویسن تے پچھیں مندے گالہیں دے علاوہ کُجھ نئیں بھاندا تے نہ ہی کُجھ پلے ہوندے۔۔!