بولیویا، چے گویرا تے اشو ۔۔۔ ہک نظم، ہک یاد، ہک ڳالھ|| مشتاق گاڈی

اے کجھ سال پیلھوں دی ڳالھ ہے جو اشو سئیں دے گھر کروڑ لال عیسݨ رات ٹکݨ تھیا۔ کہیں ہک ویلھے او اپݨیاں ننواں نظماں سݨاوݨ لڳ پئے جیندے وچ ہک نظم چے گویرا سانگے ہئی۔ او نظم سُݨ میکوں حیرت دا ہک جھٹکا جیہاں لڳا۔ او نظم اے ہئی:

"کیوبا دے جنگل توں

بولیویا دے جنگلاں تائیں

ہک ہتھ وچ کتاب

ہک ہتھ وچ گن

مَتاں اے دنیا تبدیل تھیندی ہووے

دنیا اڄ وی انویں دی انویں اے

تیݙی ٹوپی جتنی وی

تبدیل نئیں تھئی

بھائی چے گویرا”

میں اشو کوں آکھیا جو دنیا دی تاں میکوں نئیں ڄاݨ پر بولیویا دا میکوں پک ہے جو چے گویرا دی تݨ مار تے قربانی پچھوں او ٻہوں تبدیل تھی ڳئے۔ بولیویا دے صدیں کنیں غلام او "نیٹو امریکن” جنہیں نال مل چے گویرا امریکی سامراج تے اوندے دلالیں نال بھڑدا ریہا، اُنہیں دی برادری دا ہک بندہ "ایوو مورالس” اَڄ بولیویا دا منتخب صدر ہے (لاطینی امریکہ وچ بولیویا چھڑا ملک ہے جتھاں نیٹو امریکن صدر ہے) ۔ امریکی سامراج اِتھاں پچھلے پیریں ہے، ورلڈ بینک تے آئی ایم ایف کوں نَتھ پویج ڳئی ہے، بولیویا دے تیل تے گیس دے ذخائر قومی ملکیت بݨ ڳئین، اُنہیں دی وݙی آمدݨ ملٹی نیشنل کمپنیں دی بجائے "نیٹو امریکنز” دی ایجوکیشن تے ہیلتھ تے لڳدی پئی ہے. ایو مورالس پیلھی واری اے پالیسی بݨائی جو جنگلیں کوں نہ کپݨ تے اُنہیں دی رکھ رکھݨ دے پیسے حکومت مقامی آدی واسیں کوں ݙیسی۔ اوھے کھاٹے جنگل جنہیں وچ چے گویرا پناہ گیدھی تے امریکی سامراج خلاف جنگ لڑی۔ اینویں ای اَڄ بولیویا پورے لاطینی امریکا دے ݙوجھے لیفٹ پارٹیز نال مل امریکی سامراج دے خلاف ہک پورا ننواں بلاک ٹھہا گیدھے۔

اڄوکی ہسٹری کجھ ایں ہے جو بولیویا دے "نیٹو امریکن” دی لیفٹ پارٹی”موومنٹ فار سوشلزم” دے پلیٹ فارم ہیٹھوں "ایو مورالس” 2005 دے الیکشن جیتا تے اڳلے 14 سال ساندوڑاند اوندی جیت ریہی۔ ایں مدت کیڑھیاں کیڑھیاں سازشیاں اوندے خلاف نئیں تھیاں، کیڑھے کیڑھے متام نئیں اٹھے۔ ایو مورالس کوں 2019 الیکشن پچھوں سازش نال ملک بدر کیتا ڳیا، اوں میکسیکو ونڄ پناہ گیدھی پر 2020 دے الیکشن وچ اوندی پارٹی وَت جیت کنیں حکومت بآا گیدھی تے ایو مورالس دا پراݨا فنانس منسٹر اَڄ بولیویا دا صدر ہے۔

رات دے نشے تار ہئین۔ ڳالھ اڳوں نہ ودھ سڳی۔

اڄ جݙاں فیس بک کھولی تاں ڄال منوتی وچ چھپی ایہا نظم وت دید اڳوں آڳئی تے پچھلی واری کنیں وَدھ جھٹکا لڳا۔ سوچ وچار کجھ اے بݨی جو چی گویرا، بولیویا تے لاطینی امریکہ دی تاں تݨ مار۔ پولیٹکل سٹرگل تاں اپݨی جاہ نشابر ہے پر ایں نظم دا سنیہا کیا ہے؟ کیا آدی واس لوک تے مقامی وسوں تاریخ کوں بدلݨ دی جیڑھی تݨ مار کریندن، جیڑھی قربانی ݙیندن، او کیا سبھ بیکار ہے؟ اوندا کوئی نتیجہ نئیں نکلݨا؟ جے اینویں ہے تاں وت شہیدیں دیاں ڳالھیں کیا معنی رکھدن؟

(نوٹ: اے پوسٹ ہک ہووݨی دا حال ہے، سوچ نال سوچ دی رَلت ہے۔ جے سنگت اینکوں ذاتیات دے کھوپے لہا کنیں پڑھسی تاں ڳالھ نال ڳالھ ٹرسی نتاں وت اوھو نت دا جھیڑا۔ )