بارش اور مٹی کی خوشبو ۔۔۔||گلزار احمد

 ڈیرہ میں بوندا باندی کا رومانس جاری ہے۔ ہماری طبیعت بھی عجیب ہے جب بہار آتی ہے جنگل یا صحرا کی طرف چل نکلنے کو دل کرتا ہے اور عجیب خواہشیں جاگ جاتی ہیں۔۔جب ذرہ روشنی ہوئ تو دریا کے کنارے گندم کی اگتی فصل کی کونپلوں پر برکھا کے قطرے گرنے کا منظر دیکھنے کو من مچلنے لگا۔کیچڑ تو ہے مگر کیچڑ میں چلنے کا الگ مزہ ہے۔گندم کی کونپلوں پر جب بارش گرتی تو ننھے ننھے پودے سر ہلا ہلا کر ابر کرم کو داد دیتے۔یہاں پتہ چلا کہ مہمان پرندوں کی آمد کا موسم بھی در آیا ہے۔ سندھ دریا کے عشق کے سحر زدہ پرندے سامنے جوگی بن کر ’سب مایا ہے‘ گاتے پھرتے اڑ رہے تھے۔ ایک جانب درختوں پر طوطے بلبل کی غزل پر فریفتہ ہو رہے تھے ۔آج کافی دیر سوچتا رہا کہ ان پرندوں کے دل میں سنگیت ہے، محبت ہے، عشق ہے، پیار ہے، قناعت ہے،حسن ہے، مگر حسد بالکل نہیں۔ کاش ہم انسان بھی ان پرندوں کی طرح اس گگن میں اڑتے گاتے پیار کرتے آذادی سے پھرتے مگر۔؎

میں وہ صحرا جسے پانی کی ہوس لے ڈوبی ۔۔

تو وہ بادل جو کبھی ٹوٹ کے برسا ہی نہیں۔۔