آدُر دی موت تے شدید تنہائی|| ذلفی

آدُر، احترام ، عزت یا شعور کُجھ ٹیسٹ شُدہ ضابطیں دا گنڈھیل ہوندے۔ اے انفرادی زندگی کولو زیادہ سوسائٹی دی اجتماعی اپروچ نال اڳاں ٹُردے۔
اگر کوئی انفرادی بندہ اپݨے شعور سمیت میچور رویہ جاتی تے سائیکالوجیکل تڳڑپ دا حامل حے او پسماندہ رویے دی نُمائندہ سوسائٹی اچ لازمی نئیں ہمیشہ مضبوط تے قابل احترام راہوے بلکہ لازمی طور تیں او اپݨی زندگی اچ کہیں نہ کہیں موڑ تیںاجتماعی پسماندگی دا وکٹم ضرور ونڃ تھیندے۔
اے وکٹمائزیشن بہوں ہی خوفناک تے بربریت تیں مبنی ہوندی حے۔ کیوں جو سوسائٹی بمقابلہ فرد دی ایں جنگ اچ فتح یاب ہمیشہ سوسائٹی ہی تھیندی حے. او بندہ جیرھا مہذب تے اہل علم ہوندے اوکوں مسلسل پریشر دا سامݨا کرݨا پوندے ۔
ایں پریشر اچ او بندہ آہستہ آہستہ ہیک گہری تنہائی دا شکار تھیندا ویندے تے دماغ اپݨی کھیڈ کھیڈدے جیندے اچ ڈکھ سُکھ دے مروجہ معیار کوں ساڈا دماغ چیلنج کر ڈیندے۔
اے جنگ ڈو طرفین کولو جڈاں شروع تھیندی حے تاں ول ایندا انجام بہوں ہی بھیانک ہوندے۔ ہیک پاسو سوسائٹی تے ڈوجھی پاسوں تہاڈی اپنی اندر دی بھیڑی۔۔!!! ایندا تصور کرݨ ہی بہوں ظالم حے جیرھے لوک اس قسم دی کیفیت اچوں گُزرے ہوسن یا گُزردے پائے ہوسن اوہے ایندا بہتر اندازہ کر سگدن۔
مہذب سوسائیٹیز اچ وڈے یا سوچݨ آلے دماغ کوں آدر تے احترام ڈیوݨ دی ریت حے او اپݨے لوکیں دا ریاستی سطح کولو گھن کے گھر دی سطح تئیں احترام کریندن، ذمہ داریاں ڈیندن اوندی لگیسی کوں اگاں ٹُریندن تے اے ریت پوری سوسائٹی اچ جڈاں سرایت کریندی حے ول او سوسائٹی اپݨی تڈ تیں جہالت دا مقابلہ کرݨ دی صلاحیت پیدا کر گھندی حے تے سوچݨ سمجھݨ دی صلاحیت رکھݨ آلے لوک وی اینجھی سوسائٹی اچ تنہائی یا کلھیپے دے عذاب کولو بچ ویندن۔
آرٹ، کلچر، سائنس، دریافتاں، ایجاداں، ، ٹیکنالوجی تے آزادی اظہار رائے دے نت نویں در وا تھیندن۔ میڈی نظر اچ معاشرہ کوئی مردہ چیز نئیں ہوندا بلکہ اے وی اپݨی نفسیاتی علت سمیت ہیک انسان آلی کار ہر قسمی شعور دا ارتقائی سفر کریندا رہ ویندی۔
پر اینجھا سماج جتھاں عقائد ، کلٹ، جتھے، ہیروز تے مُرشدگان دی بھر مار ہووے اینجھا سماج ہیک مردہ سماج ہوندے تے اوندی لاش تیں جون کھاوݨ آلے درندے ڈھیر لبھدن۔ اساں اپݨے آسوں پاسوں دیکھوں تاں ساکوں ہیک بے حسن قسم دی درندگی نچدی ڈسسی۔
اینجھی صورتحال اچ کُجھ لوگ وت وی اپݨی جدوجہد یا کوشد جاری رکھدن تے او اپݨی اپݨی سوچ دے تحت کُجھ نہ کُجھ بدلݨ دا آہر کریندن پر اکثر لوک ڈیمنشیا دے مریض تھی کے دماغ دی اپݨی کھیڈ دے ہتھوں ہر ویندن۔۔! دماغ ہر حالت اچ اپݨی فتح کوں یقینی بݨاوݨ دی نرگسیت دا شکار راہندے۔۔! اے وی کوئی عجب ظالم حے۔۔۔!