آہ سردار اکبر خان ملکانی۔۔۔ سرائیکی وسوں کوں مُکانڑ||عبدالہادی بلوچ

عبدالہادی بلوچ

………………………

حسب اے معمول پاکستان عوامی سرائيکی پارٹی دا واٹس ایپ گروپ وچ مسیج پڑھدا بیٹھا ہامی تیں مسیج آیا میڈے نانا ابو اکبر خان ملکانی وفات پاگۓ اے مسیج حماد دا ہا جہرا اکبر خان دا ڈوہترا ہے انکھیں وچوں ہنجوں دا ہک دریا وہنڑ لگ گۓ نال میڈے میڈا دوست میاں مدثر بیٹھا ہا اکھڑ لگا شالا خیر ہوۓ گاڈی صاحب کیا تھے میکوں سینے نال لایس اندرو وچوں آہ نکھتی میڈا پارٹی چیرمین اکبر خان ملکانی جھوک لڈا گۓ میکوں یقین نہ اندا ہا ول سجاد اکبر ملکانی کوں ٹیلفون کیتم سجاد اکھیا کیں پوسٹ لاٸ ہے میکوں پتہ کینی دل کوں کجھ تسلی تھیی میں اکھیا کھڑو ولا ڈیکھا متا میں غلط پڑھیا ہوۓ ایں دوران کال بند تھی گٸ چار پنج دافعہ میں میسج پڑھیا او اووۓ لکھیا کھڑا ہا ایں دوران حفیظ خان تصدیق کیتی اکبر خان ملکانی جھوک لڈ گۓ پیرو وچوں بھویں نکھتی گٸ ایوے لگدے جیوں اج ساڈے کولہو پوری زندگی دا سرمایہ کھس گدا گۓ ول اکبر کھوسہ نال ٹیلفون تیں گال تھی اکبر کھوسے اکھیا ہادی خان آج یتیم تھی گۓ سے ۔
اکبر خان نال میڈا تعلق صرف پارٹی چیرمین تیں عہدےدار آلا نہ ہا او میڈا سیاسی استاد ہا میکوں اکبر خاں سرائيکی پڑھن تیں لکھنڑ سکھاٸ سرائيکی قومی فلسفہ سمجھیا۔ میں سرائيکستان ھاوس دے ہر دکھ سکھ دا بھیوال ہامی اکبر خان میکوں اپڑاں بال سمجھدا ہا پترے آلی کار سمجھدا ہا اکبر خان دی محبت ہمشہ میڈے نال ایوۓ ہیں جیوۓ او سجاد تیں واجد نال کریندا ہا اور اے محبت سجاد واجد تیں میڈے نال نہ ہاٸ پوری سرائيکی قوم ,دھرتی دے غریب, محکوم لوگے دے علاوہ دوستیں نال وی ایوۓ محبت ہاٸ.دوستیں نال محبت دا اے عالم ہا طبيعت جڈا ڈھیر خراب ہاٸ سرائيکستان ھاوس بیٹھے ہاسے تیں عاشق خان بزدار دا ٹیلفون آیا اکبر خان! ڈیوو حال اساں جامپور آۓ ودے ہیں سرائيکستان ھاوس اندے پاۓ سے اکبر خان ملکانی آکھیا عاشق خان میں بہو بیمار ہا آلا نمی سگدا تہاڈا ادر نہ کر سگساں اور اے ڈہیہ میڈا میکوں پتہ کینا ہا جو پارٹی چیرمین نال ملاقات دا اخری ڈہینہ ہوسی اور ایں تو اگلا ڈیہنہ اکبر خان ملکانی دا سرائيکستان ھاوس وچ شاید آخری ڈہینہ ہا ایندے بعد علاج واسطے او اسلام آباد لگے گۓ .
ڈیرہ غازی خان دا سرائيکستان ھاوس پورے وسیب دے لوکیں واسطے ہک چھپر چھا ہا جتھا اکبر خان حقہ پانڑی دا انتظام کیتی وسیب ذادیں دی ڈہینہ رات خدمت کریندا بیٹھا ہا سرائيکستان ھاوس دے دروازے چؤئ گھنٹے عوام واسطے کھولیں پاۓ ہن سرائيکستان ھاوس وچ ہر آونڑ الے بندے کوں ایوۓ لگدا ہا جیوۓ او اپڑا گھر ہوۓ الغرض سرائيکستان ھاوس سرائيکی دی ملکیت ہای سرائيکی بےدھڑک تھی تیں آندے ہن شاید ہی کوٸ اینجھا ڈہینہ ہوۓ جڈا میں ناچیز سرائيکستان ھاوس نہ گیا ہووا.حسب اے معمول ہک ڈہینہ سرائيکستان ھاوس اکبر خان نال بیٹھا ہامی تیں ڈو سٹوڈنٹ آے جامپور دے سلام دے بعد عرض کیتی نے ساڈے پیپر ہن اساں ڈو ڈہینہ اتھا(سرائيکستان ھاوس) ٹکڑ چاہندے ہیں اکبر خان آکھیا ابا میں کڈاہی کہیں کوں نہی ہٹکیاں تہاڈا اپڑاں گھر ہے .سرائيکی شاعر عصمت گورمانی اہدے جڈا ڈو ہزار ڈہ دا فلڈ ہا ہر پاسوں سندھو دی تغیانی ہاٸ ساکوں وی ریڈ الرٹ جاری تھیا گھر خالی کرو پاݨی آے وے روز پرشان رہندا ہامی ہک ڈہینہ اکبر خان نال ٹیلفون تیں گال تھاٸ حال ڈیتا گدا اکبر خان اکھیا تساں بالیں کوں کھن کے سرائيکستان ھاوس آونجو میں خالی کر ڈیندا سرائيکستان ھاوس اے او ڈہینہ ہا جڈا سرائيکستان ھاوس دے مین دروازے تیں پردہ لاڈیتا گیا ہا میکوں کڈاہی محسوس نہ تھیا جو کہی بے گھر ہا.اکبر خان دا سرائيکستان ھاوس نال محبت دا ہک وکھرا انداز ہا جڈا ساری فیملی ملتان واپڈا ٹاون شفٹ تھی گٸ تیں گھروں فون آندا ہا تساں وی ملتان آو سرائيکستان ھاوس کو چھوڑو اکبر خان اہدا ہا میڈے ملنگ اندن لوکیں کیتے سرائيکستان ھاوس ہک امید دا ناں ہا میں نہی اندا ملتان میں اتھاٸ ٹھیک ہا.جڈا علاج دی غرض نال اسلام اباد ویندے پاۓ ہن سرائيکستان ھاوس دے مین گیٹ کولہو باہروں گۓ تیں فورن اکھینے اسلم خان چیڑیے دا پاݨی تازہ کراہے بلی ودی ہے او پکھیی کوں نا کھا ونجے خیال کرہا شاہد اکبر خان کوں پتہ ہا جو میں ہنڑ نا ولسا اکبر خان دا تابوت وی اسلام اباد کنوں سدھا سرائيکستان ھاوس آیا. سرائيکستان ھاوس دا انچ انچ اکبر خان نال مانوس ہا پورے وسیب دے وچ سرائيکستان ھاوس ہک ہیڈکواٹر دا درجہ رکھدے.
اکبر خان ملکانی ہک عوامی بندہ ہا کڈاہی بناوٹ نمودونماٸش پسند نہ کیتی ہاسی ہمشہ صاف ستھری زندگی گزاری او ہک با کردار انسان ہا اندی زندگی ہک کھولی کتاب ہاٸ ہک جرت آلا بندہ ہا ہمشہ لوک آپس وچ جوڑیے کڈاہی لوکیں وچ نفرت نسی پیدا کیتی جہری گال سچی ہوۓ ہا منہ تیں ہمت نال اہدا ہا لفظ جنوبی پنجاب نال سخت نفرت کریندا ہا لفظ جنوبی پنجاب کوں دہی بھینڑ دا منہدا سمجھدا ہا کڈاہی کہیں وزیر مشیر ایم پی اے ایم این اے نال ملنڑ پسند نہ کریندا ہاٸ اہدا ہاہی اے شناخت ساڈی دے منکر ہن انہیں دا سوشل باٸیکاٹ کرو.
اکبر خان پاکستان پیپلز پارٹی دا بانی کارکن ہا 1967 وچ جڈا پیپلز پارٹی دی بنیاد رکھی گٸ او اجلاس وچ اکبر خان موجود ہا.ظالم ضیا دے مارشلا وچ جڈا چیڑی بغیر پوچھے پر نہ مریندی ہاٸ اکبر خان روڈیں تیں احتجاج کریندا ہا پولیس تشدت تھے جیل کٹی مگر کڈاہی ہمت نہ ہاری گڑھی خدا بخش شہید نال ہک گہرا رشتہ ہا اکبر خان گڑھی خدابخش دا مذاور ہا اج وی اپ کوں پیپلز پارٹی دا سمجھدا ہا پیپلز پارٹی نال صرف اختلاف شناخت دا ہا سرائيکی قومی مسلہ واسطے پیپلز پارٹی جہیں سمندر گیر تیں وفاق دی نمائندہ جماعت قربان کر ڈیتی اکبر خان دیںاں پیپلز پارٹی وچ قریانیں کوں خراج پیش کریندے ہوۓ خلیل فریدی نے پیپلز پارٹی دا مرثیہ ‘جیندا جیندا ضمیر زندہ ہے اکھدے بے نظیر ذندہ ہے’ پیش کیتا بعد ازاں سرائيکی تحریکی کارکن تیں پاکستان عوامی سرائيکی پارٹی دے وفد نے پاکستان عوامی سرائيکی پارٹی دا پرچم قبر مبارک تیں رکھیا تیں سرائيکستان ذندہ باد دے نعرہ لگے جۓ سرائيکی جۓ بھٹو دے نعرے نال اکبر خان کوں الویدا کیتا اکبر خان ہک مسلسل جدوجہد دا ناں ہا پیپلز پارٹی وچ وی حمید اصغر شاہین کولہو متاثر ہن شاہين صاحب وی پیپلز پارٹی وچ ہن شاہین صاحب پیپلز پارٹی چھوڑی سرائيکی قوم پرستی دی سیاست وچ اۓ نال اکبر خان وی شاہین دے ساتھی ہن کجھ اخلاف دی وجہ نال2010 وچ اپڑی پارٹی پاکستان عوامی سرائيکی پارٹی دی بنیاد رکھی سرائيکی تحریک وچ حمید اصغر شاہین دے بعد ہک مذاحمتی کردار ادا کیتس حمید اصغر شاہین دا ڈیتا فلسفہ ‘چلھ دی خیر کل دی خیر’ پاکستان عوامی سرائيکی پارٹی دا منشور وچ ہا حمید اصغر شاہین کوں اپڑاں قاٸد سمجھدا ہا اپڑے قاٸد نال بے پناہ محبت کریندا ہا اکبر خان ملکانی کوں سرائيکستان خان سہیڑ جڈا اپڑے بابا حمید اصغر شاہين دی برسی دا کانڈھا ڈیتا ول برسی وچ شرکت واسطے مشاورت تھندی پاٸ ہاٸ.اے او ڈہینہ ہا جڈا اکبر خان کوں ڈاکٹر مکمل آرام دا تیں کھٹ آلاوڑ دا مشورہ ڈیتا میں اکھیا سٸیں تساو آرام فرماو سجاد اکبر ملکانی دی قیادت وچ پاکستان عوامی سرائيکی پارٹی دا وفد شاہین صاحب دی برسی تیں شرکت کریسی آکھیس بادشاہ ہیوۓ تساں شاہین صاحب دی برسی ہے میں ضرور ویسا اور پاکستان عوامی سرائيکی پارٹی دا قافلہ چیرمین پاکستان عوامی سراٸیکی اکبر خان ملکانی دی قیادت وچ شاہین صاحب دی برسی وچ شامل تھیا اور اکبر خان ملکانی شدید علالت دے باوجود تقریر کیتی پاکستان عوامی سرائيکی پارٹی دے وفد وچ سجاد اکبر ملکانی,اکبر خان کھوسہ ,ابوالحسن خان لغاری,خضر عباس ملکانی ,تیں بندہ ناچیز انجينئر عبدالہادی خان گاڈی شامل ہن اے اکبر خان دی قیادت وچ ساڈی آخری سیاسی سرگرمی ہای اور اکبر خاں ملکانی دی آخری تحریر وی شاہین صاحب دی برسی آلی ہے جہری انہیں سخت بیماری دی حالت وچ مکمل کیتی میکوں آکھیس ہادی خان شاہین صاحب والی پوسٹ ہنڑ مکمل تھی گٸ ہے ٹھیک تھیواں والا تہاڈے تیں وی ہک مضمون لکھساں نواب سرور کربلاٸ تیں مضمون لکھڑے کجھ رجسڑ تیں لکھیا پاۓ او وی مکمل کرنڑے پتہ نہی اے بلغم کیوں نہی چھوڑیندا پتہ وی ہے ایکوں میں ڈھیر کم کرنڑ ہالی لیکن قاٸد دی بے پناہ محبت ڈیکھ کے الله سٸیں اکبر خان کو سڈگدا اج اکبر خان جنت وچ حمید اصغر شاہين تیں سرور کربلاٸ نال ہوسی ظاہر ہے اتھاں وی اکبر خان دا مجموعہ لگ گیا ہوسی استاد فداحسین گاڈی وی ضرور ایا ہوسی برسٹر تاج لنگاہ وی آگیا ہوسی بابا راز جتوٸ نال تیں ضرور سرائيکی تحریک دی موجودہ صورتحال تیں گال تھیی ہوس ول محمود نظامی وی آگیا ہوسی ارشاد تونسوی نال وی ملیے ہوسن نظیر فیض مگی ہک اپڑے نرالے انداز وچ بٹ گپ لا ساریں کو کھلوایا ہوسی منظور بوہڑ تیں کریم نواز کوراٸ تیں اصلو بھالے وچ ہن.اکبر خان جنت وچ اوۓ مجمہ لاٸ بیٹھا ہوسی جیوۓ سرائيکستان ھاوس وج مجمہ ہوندا ہا ہونڑ اکبر خان دے جنت وچ ونڑ نال میکوں یقین ہے سرائيکی قومی شناخت دا مسلہ الله سٸیں نال وی ضرور ڈسکس تھیسی اکبر خان اپ جنت وچ گٸ پیا ساکوں امتحان وچ سٹی گٸ
اکبر خان دا جنازہ پورے سرائيکستان دا تاریخی جنازہ جتھاں ہر مسلک تیں ہر مکتب فکر دے لوگ ہن جہریلے میں جنازہ گاہ پہنچا تیں سرائيکی تحریک دے کارکن تیں ورکرز دھاڑی مار مار کے روندے پاۓ ہن سرائيکی رہنما بہوں گھٹ کھٹے تیںدن مگر اکبر خان دے جنازے تیں سارے دے سارے سرائيکی رہنما اکھٹے ہن میں دعوے نال اہدا جہریلے اکبر خان علیل ہا اگر ایوۓ اساں سارے سرائيکستان ھاوس وچ کھٹے تھوٶ ہا اکبر خان کڈاہی نہ ونجے ہا جنازہ گاہ وچ قیامت ثغرا دے مناظر ہن ایں جنازے وچ پورے پاکستان دے لوک موجود ہن ہزارے دی تعداد وچ مجمہ ہا اور اے سارے دے سارے اکبر خان دے دوست ہن لیکن عمر خان بزدار تیں حاجی غلام شبیر بزدار نال انہیں دا روح دا رشتہ ہا اکبر خان وصیت کیتی جو میڈے پتریں کوں پگ وی عمر خان بزدار پویسی اور اج قرآن خوانی تیں عمر خان بزدار سجاد تیں واجد کوں پگ بدھی. نامور سٹیج سیکرٹری قسور بزدار بڑے ہی سونہرے اندز وچ معملات چلاۓ آخر وچ دعا کراٸیں گٸ ہر بندے اکبر خان کوں اپڑے انداز وچ خراج پیش کیتا اور اکبر خان دے نظریہ صوبہ سرائيکستان دے قیام کوں پورا کرنڑ دا عہد کیتا
اکبر خان دی بارگاہ وچ

پل وچ جھوک لڈا کے ٹر گے
دل وچ بھائیں لا کے ٹر گئے

آپ سکھ دی ندر ونج سوتے
ساڈی ندر ونجا کے ٹر گئے

ہر منزل آسان پئی ہوٶیس
اتھ منزل ڈسا کے ٹر گئے

پاک حضور دی زیارت ہوٶیس
اپݨے فرض نباہ کے ٹر گئے

ماء دھرتی دا قرض ہا سر تے
سر تو وزن لہا کے ٹر گئے

شالا آگو مونجھ نا آویس خضر
ساڈی مونجھ ودھا کے ٹر گئے
اکبر خان دی محبت ہاٸ میڈا ہر مضمون سرائيکیستان ھاوس آونڑ الے ہر بندے نال ڈسکس تھیندا ہا میکوں امید ہے اکبر خان میکوں کمی محسوس نہ تھیونڑ ڈیسی اور اج اے مضمون جنت وچ وی ڈسکس تھیسی
سرائيکستان ذندہ باد
عبدالھادی خان گاڈی مرکزی صدر طلبہ ونگ پاکستان عوامی سرائيکی پارٹی
03334567055

انجينئر عبدالھادی خان گاڈی مرکزی صدر پاکستان عوامی سرائيکی پارٹی سٹوڈنٹ ونگ.

طلبہ یونين بحال کرو۔۔۔عبدالہادی بلوچ

سرائيکی صوبہ ناگزیر کیوں۔۔۔عبدالہادی بلوچ

ہادی بلوچ دیاں بیاں لکھتاں پڑھو

About The Author

dailyswail

See author's posts