سندھیاݨی تحریک||سعدیہ شکیل

پچھلے ݙیہاڑے سرائیکی عوامی تریمت تحریک دی چیر پرسن اساݙی راہبر ادی عابدہ بتول سئیݨ ادا سئیں نذیر لغاری نال حیدد آباد ہاری کنونشن وچ شریک تھیوݨ ڳئے ، اتھاں انہاں دی سندھیاݨی تحریک دیاں بھیݨیں نال وی میل تھیا جیندیاں تصویراں اساݙے تریمت تحریک دے واٹس اپ گروپ وچ شئیر کیتاں ڳیاں ہن ، نال و نال اساکوں اے وی ݙسایا گیا جو ٻہوں جلد اساݙی وی سندھیاݨی تحریک دیاں بھیݨیں نال میل ملاقات تھیسی ۔انہاں سرائیکی عوامی تریمت تحریک کوں سندھیاݨی تحریک دی سابق صدر اتے رسول بخش پلیجو دی گھر والی زاہدہ شیخ دے وریݨے دے تھیوݨ والے جلسے دی دعوت ݙتی ہے

سندھیاݨی تحریک سندھ دیاں تریمتیں دی ٻہوں وݙی تحریک ہے ،

1970 وچ قومی عوامی پارٹی دی بنیاد رکھݨ والے سندھ وچ انقلابی جدوجہد دی علامت سمجھے ونڄݨ والے سیاسی لیڈر ، مارکسی فلسفہ دے اگواݨ لکھاری انسانی حقوق دے وکیل رسول بخش پلیجوجنہاں سیاست کوں اقتدار حاصل کرݨ سانگے نہ ورتیا بلکہ انہاں تلویں طبقہ وچ اے شعور پیدا کرݨ دا ٻیڑا چاتا ہا کہ سیاست محض جاگردایں سرداریں تےسرمایا داریں ، دا حق نی بلکہ سیاست کرݨ اتے آپݨے حق دی جنگ لڑن ہر ملخ دے واسی دا حق ہے ، انہاں دی عدم تشدد دے فلسفے تے پرامن جمبہوری جدوجہد دا ہک ناں سندھیاݨی تحریک وی ہے 1980 وچ ڄݙاں مارشل۔لا دی کالی رات ݙیݨ وانگوں سمورے ملخ تے قابض تھی جݙݨ سیاسی گالھ مہاڑ کرݨ وی جرم ہا اتے جمبہوریت دا ناں ڳھݨ تے کوڑے مارے ویندیے ہن تݙݨ رسول بخش پلیجو اتے فاضل راہو دے گھروں سندھیاݨی تحریک دا منݙھ بدھیا گیا ، جیں وچ ہک وݙی تعداد اݨ پڑھ مزدر تے رڑ ھ واہی کرݨ والیاں تریمتیں ، اسکول پرھݨ والیاں طالبات ، استانیاں اتے گھر داری کرݨ والیاں تریمتیں شریک تھیاں ، اتے ویلھے نال انہاں دی تعداد ودھدی گئی سندھیاݨی تحریک نے ضیا حکومت دے خلاف جمبہورت بحالی تحریک وچ بھراویں رلے نا صرف وݙی تعداد شریک تھیاں ہن بلکہ گرفتاریاں وی ݙتیاں ہن ، سندھیاݨی تحریک دا مشن اسکولیں کالجیں وچ سندھی ٻولی رائج کرݨ اتے غیر لوکیں توں آپݨی دھرتی آپݨیاں جاہیں کھسیجݨ خلاف کارو کاری ، طبقاتی تفریق دے خلاف جدوجہد کیتی ، اساں وسیب واسیں کیتے سندھیاݨی تحریک ہک بہوں وݙا سنیہا ہے

،نومبر 2019 وچ بݨݨ والی سرائیکی عوامی تریمت تحریک کوں ٻݨئے بیشک جو ݙھیر عرصہ نی تھیا پر سرائیکی عوامی تریمت تحریک سندھیاݨی تحریک ونگوں اپݨی انڄ سنڄاݨ بݨ تے نشابر تھئی ہے ، جیندا سِہرا اادا سئیں نذیر لغاری دے سِر ہے جنہاں گنگدام بھیݨ کو لاوݨ سکھائے جیندی پوری حیاتی دھرتی نال پریت نبھیندے گزری عظیم جدوجہد دا پنڈھیڑو ، ۔جیں سرمایہ دارنہ نظام دے خلاف ، غاضباں دے خلاف آپݨے الا تے قلم نال جنگ کیتی ہے ۔ہک وݙا لکھاری ، سرائیکی عوامی سنگت تے سرائیکی عوامی تریمت تحریک جیندا پورھیا ہے ۔۔ وسیب واسیاں سانگے ہک سوجھلے دی لاٹ بَن تے چمکݨ والی سرائیکی عوامی تریمت تحریک جیڑھی آپݨی قوم تے دھیاں بھیݨیں وچ سیاسی تے سماجی شعور ݙیواوݨ دا عَلم چاتے ،انشااللہ ٻہوں جلد اساݙا آپݨے حق حقوق سانگے پندھ اگوہاں تھیسی ۔۔۔ ہک ݙہنہ وسیب دی ہر دھی بھیݨ سرائیکی عوامی تریمت تحریک دا حصہ ہوسی

جھوکاں تھیسن آباد ول

اے نیں نہ وہسی ہک مݨی ،

سرائیکی عوامی تریمت تحریک پاکستان