محمود نظامی تے ارشاد تونسوی دا مُکالمہ(پہلی لڑی) || زلفی

تونسوی: جَون وٹا کے آ ڳئے ہاؤ ؟؟؟

نظامی: سیاست اچ جَون وٹاوݨ کڈاہیں کڈاہیں ضروری ہوندے، میں کوئی تیڈے آلی کار پاگل تاں کائینی ہامیں خواہ مخواہ ذلیل تھیواں ہا پیا ، پاکستان راہوݨ دے قابل رہ وی نئیں گیا میں اُتھاں مزید جکھ نہ مار سگدا ہامیں۔۔!

تونسوی: نظامی توں تاں مارکسسٹ ہیویں، حالات و واقعات کوں الزام ڈے کے کنی کر ونجݨ مارکسسٹ کوں شوبھا نئیں ڈیندا ، معروضی حالات دا تجزیہ کر کےکوئی پیش بندی کریں ہا۔۔

نظامی: ایں جاہلانہ سماج اچ کوئی پیش بندی کرݨ دا کوئی فائدہ کائینی ، جیرھے ویلھے کوئی سیاسی پارٹی اپݨا کم نہ کرے ول سیاست ” بھیݨ چودیں ” دا کھیڈ بݨ ویندی حے تے۔۔۔! ملاں ، ملٹری ، عدالتاں تے میڈیا رل کے تکڑی خچ مچیندن اتھاں سیاسی ورکر شودا بے وقعت تھی کے رہ ویندے۔۔

تونسوی: ڈیکھ میڈی گالھ سُݨ حالات تیں کُڑھݨ دی بجائے انہاں کوں جدلیاتی تناطر اچ پرکھݨ دی ڈھیر لوڑھ حے ۔۔! ہر ویلھے سیاست اچ حالات کوں اپݨے حق اچ کرݨ دی کُجھ نہ کُجھ گُنجائش ہوندی حے پائی۔۔سوال اے حے جو تُساں سیاست دے آرٹ کوں کتنا سمجھدے ہاؤ تے ایکوں کیویں ورتائیندے ہاؤ۔۔!

نظامی: ڈھیر فلسفہ جھاڑݨ دی لوڑھ کائینی ، بدمعاشی دا ڈک ڈھل کرݨ واسطے وڈے وڈے فلسفے ڈھیر کم نئیں آندے ، میکوں پتے تُساں ڈھیر رپھڑ اچ کڈاہیں نیوھے پائے، میں کہیں نال بِھڑ تے نمہیں سگدا۔۔میں بُڈھڑا بندہ کیا کراں؟؟؟ میڈی کوئی فوج تاں کائینی جو میں بندوخاں چا کے انقلاب گھن آواں۔۔سرمایہ داری اپݨی موت آپ مر ویسی کیوں جو ایں نظام اچ مزید زندہ راہوݨ دی صلاحیت کائینی اے اپݨا وقت پورا کر چُکے۔۔!

تونسوی: مارکسسٹ چنگے بھلے سیاݨے تھی کے جڈاں اے آہدن جو اے نظام اپݨی موت آپ مر ویسی میکوں ایویں لگدے جیویں تُساں کہیں ماورائی طاقت دے معجزے تیں یقین کر کے اے آس لائی بیٹھے ہوو جو ایں نظام دا خاتمہ تھی کے راہسی تے ول پوری دنیا اچ سوشلزم آ ویسی۔۔! نظامی اے رولا کیا حے تُساں نظام دے انحطاط کوں سوشلزم دی جیت نال کیوں تے کیویں جوڑ ڈیندے ہاؤ ، تُساں تھوڑا جیہاں مذہبی مائنڈ سیٹ آلی کار اُمید پرستی کیوں پالی ودے ہاؤ۔۔ایں فیز اچوں نکلو معروضی حالات کوں سمجھ کے تاریخ دے ورتیے تجربات کوں ذہن اچ رکھ کے کوئی ٹھوس تے پریکٹیکل لائحہ عمل بݨاؤ تے بتدریج اوندے اُتیں عمل کرو ، ہر چیز مکمل اچھی یا مکمل بُری نئیں ہوندی، ہر نظرئے اچ لچک موجود ہوݨی چاہیدی حے تے ہر چیز یا نظرئے دی مکمل نفی کر کے تُساں حالات کوں بدلݨ دا ہم نیوحے کر سڳدے۔۔اج دی دُنیا اچ ارتقا تے تبدل دی بہوں اہمیت حے ایکوں قبول کر کے کوئی حکمت عملی بݨایسو تے تہاڈی جدو جہد دا کوئی پھل تہاکوں ملسی نہ تاں پاݨی دی مدھاݨی حے ماری رکھو۔۔

نظامی: میں تاں اینجھی کوئی گالھ نئیں کیتی تُساں میڈی ڳالھ دا مطلب اپݨی مرضی دا کڈھ کے میڈے اُتیں مسلط نہ کرو ، میں تاں بہوں سادہ جہیں ڳالھ کیتی حے جو حالات دا جبر زیادہ دیر قائم نئیں رہ سگدا ، اے بندوخاں شندوخاں لوکیں کوں زیادہ عرصہ ڈرا نئیں سگدیاں ، لوک جیرھے ویلھے تنگ تھیندن ول او اپݨا راہ رستہ کڈھ گھندن ۔۔

تونسوی: تُساں اتنا ڈیفینسو کیوں تھیندے پائے ہاؤ؟؟ جے کر لوکیں اپݨا راہ رستہ آپ کڈھݨے ول اتنا وڈے وڈے نظریات تے فلسفے گھڑݨ دی کیا لوڑھ حے؟؟

نظامی: توں عجیب آدمی ہیویں تیکوں میڈی گالھ سمجھ ہی نئیں پائی آندی۔۔

تونسوی: تُساں سمجھاؤ چا ول تُساں آکھݨ کیا چاہندے ہاؤ؟

نظامی: میڈی ساری گُفتگو کوں سبوتاژ کر کے ہݨ آہدے ہاؤ جو میں تہاکوں اپݨا مطلب سمجھاواں۔۔!! توں صرف اپݨے مطلب دی ڳالھ کڈھ کے میکوں کُھڈے لائن لاوݨ چاہندیں ، ہیک دال کھوائی وے ڈوجھا اتنا بھاری بھرکم ڈسکشن کریندے پائے ہاؤ کُجھ خدا دا خوف کر۔۔

تونسوی: دال اچ وی پروٹین ہوندی حے تے گوشت اچ وی پروٹین ہوندی حے ۔۔

نظامی: جے کر ڳالھ چھڑی پروٹین دی حے تاں ماس کیوں نیوحے پکیندے؟؟

تونسوی: سرمایہ دارانہ نظام اچ سرمائے دے فیکٹر کوں مد نظر رکھ کرائیں ہر کم کرݨا پوندے ، سرمایہ ساڈی خواہشیں دا متہاج نئیں ہوندا اوکوں کٹھا کرݨ دی سائنس حے ایہو کُجھ پٹیندا بیٹھاں چھڑا آفینسو تھیوݨ نال تُساں حالات دے جبر کوں گھٹ نیوحے کر سگدے۔۔

نظامی: ہݨ میں پِن کے گوشت کھاواں ، سرمائے کوں کٹھا کرݨ دی سائنس تاں میکوں آندی نئیں ۔۔! عثمان بزدار میڈے کولو ڈھیر سیاݨا ہوسی اوں جو اتنا سرمایہ کٹھا کر گھدے۔۔؟؟ اے ایں بد بودار نظام دی خرابی حے جو ہیک بندہ اپنی بنیادی ضرورت پوری نئیں کر سگدا تے ہیک بندہ اللے تللے پیا کریندے۔۔! تیکوں اے گالھ سمجھ نئیں پائی آندی توں ایں مسئلے دا حل ہروں بھروں فلسفیانہ انداز اچ کڈھݨ چاہندیں۔۔! انفرادی وزڈم دے علاوہ پورے نظام دی اجتماعی وزڈم وی کوئی چیز ہوندی حے۔۔۔۔ ایں لغو نظام دی اجتماعی وزڈم تہاڈے ساڈے جیہیں لوک اکثر بھینٹ چڑھ ویندن تے کہیں دی بُود ڈنگی نئیں تھیندی۔۔!!!

تونسوی: اچھا چھوڑ آ اُستاد فدا حُسین دو جُلدے ہیں اوندے نال بٹاں جُل مریندے ہیں تے اوندے کولو سرائیکی تحریک دی پندھ کہاݨی دا حال حویلا وی کریسوں اوندے کولو ساڈے آؤ ڈھیر خبران ہوندن اوندے اجݨ وی وسوں نال رابطے ہن پائے پتہ نئیں اوندے آؤ کیرھی گِدڑ سنڳھی حے۔۔!

نظامی: ہاہاہاہاہاہاہاہاہاہاہاہاہاہاہا۔۔جُل ڃُل۔۔۔…….!

جاری حے۔۔