سردیاں اور رنگ برنگی سویٹریں||گلزار احمد

ہمارے بچپن میں ہماری مائیں پشمینے کی رنگین اون لے کر سلائیوں سے سویٹر بُنتی تھیں۔ یہ اون کے دھاگے بہت خوبصورت انوکھے رنگوں میں ہوتے تھے ۔ سویٹر بننے کا عمل بڑا دلچسپ اور طویل عرصے کا ہوتا تھا۔کئی ہفتے بعد سویٹر تیار ہوتا اس لیے یہ سردیوں کے آنے سے پہلے تیار کی جاتیں۔ گاٶں کی لڑکیوں کو بھی سویٹر بننا سیکھایا جاتا۔ اب مسلہ یہ تھا کہ ان لڑکیوں کے پاس اتنی رقم نہیں ہوتی تھی کہ وہ اون خرید کے پریکٹس کر سکیں۔ چنانچہ گاٶں کی وہ خواتین جن کے بچوں کے سویٹر بنانے ہوتے وہ ان کو اون خرید کے دیتیں اور بچوں کے سویٹر بنوا لیتیں۔

سردی کی آمد سے قبل گھروں میں رضائیوں کی بھرائی، روئی کی دھنائی اور نئی رضائیوں کی تیاری کا کام بھی زور و شور سے شروع ہو جاتا تھا۔ بھاری بھرکم روایتی دیسی رضائیاں کبھی گھروں میں ہرسال سردیوں کا استقبال کرتی تھیں۔ ان کی روئی دھننے،نئی روئی بھروانے اور پھر ان کی سلائی کا مرحلہ ہوتا تھا تاہم اب جدت اور سہل پسندی نے انہیں تہہ کرکے رکھ دیا ہے۔

عرصے سے دھنیے کا کام کرنے والے کاریگروں کا کاروبار سردیوں میں بھی سرد پڑچکا ہے۔ کاریگروں کا کہنا ہے کہ روئی کا کام بہت کم ہو گیا ہے۔فیشن کی دوڑ میں بھی پولیسٹر کی ہلکی پھلکی رضائیاں روایتی رضائیوں کو بہت پیچھے چھوڑگئی ہیں۔خریدار کہتے ہیں کہ پولیسٹر رضائی کی قیمت کم اور استعمال میں آسان ہوتی ہے۔