سمی دے ݙیس دا راول مُکلاڳئے۔۔۔۔۔دھاڑوو!!|| راناابرارخالد

سمی دے ݙیس دا راول مُکلاڳئے۔۔۔۔۔دھاڑوو!!

استادمحمودنظامی نظریہ پاکستان دامکمل ادراک رکھینداہائی بھل جوسبھ توں ودھیک ادراک رکھینداہائی, ہُنالے دی ڳالھ اےملتان وچ منصورکریم دے گھرٻیٹھےہاسے, کامریڈمنظوربھوہڑجنت مکانی وی ہائی, شام کوں سیاسی محفل مُنڈھ ٻدھیاتاں دل داجانی رضوشاہ تے جی آرگُرماݨی وی آپُنے۔۔۔لان وچ ٻیٹھے ہاسےنظامی صیب ت منصورکریم ہکے کھٹڑے تے آپڑیں "محفل” وی نال ڄمائی رکھی, منصور رتا ت نظامی صیب چِٹا پسند کریندے ہن, نال ڳالھیں مندے وی چلدے رہ ڳئے, نظامی صیب دا آکھݨ ہائی جونوازشریف پاکستان داامیرالمومنین کݙانہہ نہ بݨ سگسی بھل جو اے ایندی بہوں وݙی بُھل ہوسی, کجھ سنگتی آپݨے اندری بھئو موجب نظامی صیب دا وِرودھ وی کیتا, ول ہرکہیں ݙیکھ گھدا جوکجھ نوازشریف نال تھی۔۔۔یارھاوجے ٹُکر آیا تاں دال ہئی, نظامی صیب جُتی پاوݨ لگا منصور کریم دی ذال پچھاکِن تے ویندے پیوے ٹُکرکیوں نیوھے کھاندے, منصورکریم ہولی الایا, اے دال نی کھاندا۔۔۔۔گوشی سیݨ آکھیا کئی ترکاری ݙیہدوں امینداے فریج وچ پئی ہوسی!!

استادمحمودنظامی آکھیا, ڳالھ سُنڑوجیکردال ترکاری ای کھاوݨ ہائی تاں پاکستان کیوں بنڑایاہاوے, ول تاں ہِکوہندوستان ای وارے آندا ہائی۔۔۔جُتی دا چھیکڑی کڑا ولیندے آکھیُس, پاکستان بنڑاوݨ دا ہِکومقصد ہئی جو رج کے ماس کھوؤسوں,جیکر او وی نہ ملے تاں ول کیا فیدا پاکستتن بنڑاوݨ دا!!

ول نظامی صیب تونسہ ہاؤس لڳے ڳئے تے اساں دال لٻکی!!

جݙاں نوازشریف جُمعے دی چُھٹی ختم کیتی, اساں سرائیکی پارٹی دے دفتربیٹھے ہاسے, جنت مکانی اسدلنگاہ ت ٻئے سنگتی کن لاکے نظامی صیب دا وعظ سُنڑدے ٻیٹھے ہن, اچݨ چیت شجاع آباد توں سرائیکی پارٹی دا ہک سنگتی آڳیا جنہاں 97 دی چوݨ وی بِھڑی ہائی, انہاں دے رلے ہک سیاسی مولوی صیب وی ہا۔ نظامی صیب دے رُخ تے رونق آڳئی, کیوں جو مولوی نظامی صیب دا سُلھڑا کھاڄ ہائی, او مولویں نال ہتھ کِھڑا کے خُش تھیندے ہَن۔ ول تاں ملاکھڑا شروع تھی ڳیا, ڳالھیں ڳالھیں وچ سُدھ پئی جومولوی صیب دا سانگا جے یوآئی نال اے, نظامی صیب مولوی کوں بھنوابھنواکے ماریا, کݙاہیں کلی رنگ تے کڈاہیں ٻیٹھی چیل ت ول نظامی صیب سِدھی جھٹ چاتی, مولوی صیب کنڈ دے بھرݨے دڑائیں ونڄ تھِیا۔۔۔نظامی صیب آکھیا مولانامیکو ہکاڳالھ ݙسا, جیکر بے نظیربھٹو جمعے دی چھٹی ختم کریندی تاں تساں ترامڑی تپاݙیوو ہا, اونکوں لاڑکاݨے پُڄا کے ولو ہا۔۔۔ہُݨ نوازشریف جمعے دی چھٹی ختم کرکے آݙت دی چھٹی پکی کیتی اے تاں تساں کُرکیے ای نیوھے, اصل ڳالھ ڈِھڈھوں کڈھو۔۔۔ڈِھڈھوں کڈھو۔۔۔۔میݙا سوہنڑا ڈِھڈھوں کڈھو!!!

مولوی شودے کوں کئی واہ نہ لبھی,چھیکڑ ہتھ ٻدھ کے آکھیُس تہاݙی ایں مغرماری وچ میکوں ضروری کم بُھل ڳئے, غلہ منڈی ونڄڑاں ہائی, ہُݨ مافی ݙیوو چا۔۔۔!!

استادمحمودنظامی دے ڈݙو پُتر اِن, وݙا سرمد سلیمان تے ننڈھے دا ناں میکوں وی ملُوم کائنی, نظامی صیب سرمد نال ودھیک پیارکریندے ہن, تراۓ سال پہلوں سرمددا نمل یونیورسٹی داخلہ کراوݨ آۓ تاں اوندا ٻہوں خیال رکھیندے ہن۔ اساں آکھیا استادجی سرمدنینگرجُوان اے اینکوں آزادی نال زندگی جیون ݙیوو, ہرجاہ اوندا پُچھ کیوں نپی ودو؟

نظامی صیب آکھیا, رانا صیب, سیاݨا بندہ ایں, ڳالھ سُنڑ۔۔۔سرمد, اے شودا شریف آدمی اے میں اینداخیال ناں رکھیسا تاں ٻیا کون رکھیسی؟ ہا۔۔۔ݙیکھاں نِکا, او وݙا بدماش اے, اونکوں میں چُھڑی چُھوٹ ݙتی ہوئی اے, جتھ ودا رہ پرواہ کائنی, میکوں پتے کہیں کوں دا لاآؤسی دا جھل کے نہ آؤسی۔۔۔سرمد جے تئیں گریجویشن پوری نی کریندا میکوں کوں اوندا خیال رکھݨا پوسی!!

استادمحمودنظامی داجیندے جیندے نال وی ڳانڈھا ہائی اولوک اونکوں پُوجیندے ہن, ایں ڳالھ دا پتہ میکوں اوں ویلھے لڳاجݙاں نظامی صیب رلے پہلی واری اسلام آباد دی آبپارہ مارکیٹ ٹُکرکھاوݨ ڳیوسے تاں ہوٹل دا ہک ویٹر ملیاجیہڑا نظامی صیب دا عاشق ہائی, اینویں داری کیتوسی جیویں اساں اوندے گھرمزمان تھئے ہوؤں۔ اوں ہوٹل وچ ای ٹکر دی بھال وچ ٻیٹھے ہاسے تاں کہیں سنگتی آکھیا, نظامی صیب او ڳالھ تاں سُنڑاؤ, سوؤریں اڳوں خطاب کیویں کیتا ہاوے؟

نظامی صیب ݙسایا جو پیپلزپارٹی دی 1988 والی حکومت ہائی, پراݨے ایم این اے ہاسٹل خواجہ کمال الدین انورایم این اے دے کمرے وچ دھماچوکڑی مچیندے ہاسے, ہک واری رات دے ہک وڄے پرباش تھی کے ٹکرسانگے آبپارہ مارکیٹ روانہ تھئے تاں ادھ راہ وچ سوؤریں دا اجڑ ٹکرڳیا, افضال ت باقی سنگتی تاں ݙردے مارئیے پچھوں ہٹ ڳئے, پرنظامی صیب اڳوں ودھ کے سرائیکی صوبے اُتے تقریرشروع کرݙتی, گواہ موجود اِن نظامی صیب جے تئیں تقریر پوری نہ کیتی سوؤریں کوں ونڄݨ نہ ݙتا۔۔۔

نظامی صیب چاہ دا وی ٻہوں سودھا ہائی۔۔۔ہک ݙینہہ نیشنل پریس کلب دے لان وچ ٻیٹھے ہاسے, کنٹین توں چاہ منگوائی تاں چاہ چنڳی کائنا ہائی, استادمحمودنظامی آکھیا جئیں چاہ بݨائی اے اونکوں سݙو! اساں آکھیا چاہ واپس موٹیندے ہیسے ہُݨ چنݨی بݨ کےآؤسی۔۔۔پرنظامی صیب اڑ ڳئے, نہ, اونکوں سڈوبس ,جئیں چاوبنڑائی اے!!

پریس کلب دا پراݨا بربوچی نعیم بنگالی, میں اوں کن پُچھِم چاہ تئیں بݨائی اے, اوں آکھیا, ہا۔۔۔۔ول ہُݨ اِن تے آ, نظامی صیب کوں وی بھڳتا!

نعیم بنگالی خُش تھی کے ٹُرپیا, اوں سمجھا جو نظامی صیب انعام ݙیسی, نعیم بنگالی کوں یقین اے جو او سمُورے اسلام آباد وچ سبھ توں چنڳی بھاڄی پکیندے, اے تاں ساکوں پتے جو کینجھی پکیندے, کھاندے تاں اساں اوں!

استادمحمودنظامی, نعیم بنگالی کوں کُرسی تے بلھایا سرائیکی وچ آکھیس اے چاہ تئیں بݨاائی اے, نعیم بنگالی اُتاولا تھی کے آکھیا جی آ سئیں۔۔۔ول نظامی صیب پُچھا کݙاں توں چاہ بنڑیندا پئیں؟ نعیم بنگالی آکھیا چھبیس سال ہوگئے ہیں!

نظامی صیب آکھیاتیکوں شرم نی آندی توں 26 سال وچ چاہ بنڑاوݨ نئیں سِکھ سگیا, نعیم بنگالی وِسا وِساتھیوے, تھوݙ چولے تاں ڄبھ نال نہ تھیوے۔۔۔نظامی صیب آکھیا ڳالھ سُݨ, جیکرکہیں پاݨی پیوݨے تاں نیسلے دی بوتل رکھی اے رڄ کے پیوے, جیکر کئی کِھیرپیوݨ چنہدے تاں مِلک پیک دا ݙبہ ہے پیا, مٹھے کوں دل کریندے تاں کھنڈ دے پھکے مارر۔۔۔چاہ دامطلب چاہ ہوندے!!

استادمحمودنظامی کئی گالھ دل وچ رکھے, اے تاں تھی نہ سگدا ہا, ہک واری اکرم گُرماݨی دے گھردی چھت تے ٻیٹھے ہاسے, خادم حسین صیب وی ہن, نظامی صیب دیاں ڳالھیں سُنڑدے ٻیٹھے ہاسے۔۔۔اچݨ چیتی ہک ٻئے سنگتی آکھیا, ہیں سئیں او ڳالھ تاں سُنڑاؤ شیواز ریگل والی۔۔۔یکیں کِھل دا ٹھہکا ماریا۔۔۔۔ول استادمحمودنظامی کوں اوڳالھ سُنڑاوݨی پئے ڳئی۔ اکرم گُرماݨی غیرملکوں اسلام آباد آیا ہویاہائی ت نظامی صیب تونسے وچو, گُرماݨی صیب استادمحمودنظامی کوں فون کرکے پُچھا کِتھ او, شام کوں گھرآؤ کٹھے تھیندے ہیں, نظامی صیب آکھیاہا آندا پیاں, شاکے کوں وی سݙ, فلانے کوں وی فلانے کوں وی, کٹھے تھیندوں ڳالھیں کریسوں۔۔۔نظامی صیب اکرم گُرماݨی دے گھرپُنا تاں حالی ٻیا کئی کائنا آیا ہائی, اُتلے کوٹھے وچ ونڄ بیٹھے, اکرم گُرماݨی شیوازریگل دی بوتل الماڑی وچو کڈھ کے میزتے رکھی تاں نظامی صیب باغ باغ تھی ڳئے, اچݨ چیتی آکھیس کہیں کتے ٻلے کوں نہ سݙ آپ پِیسوں بس!!

تونسے وچ عمران خان داجلسہ ہائی, حالی 2018 داالیکشن نہ تھیا ہا, عمران خان آپݨی تقریر وچ نوازچور زرداری چور دا ہکومنتراپڑھیا۔۔۔جلسے دے بعد کہیں نینگر نظامی صیب کوں آکھیا استادجی عمران خان دے جلسے اُتے تبصرہ تاں کرو۔۔۔نظامی صیب ݙوٹپی گالھ کیتی, اے آہدے چوریں کوں ہٹاکے ڈاکوؤاں کوں کرسی تے ٻلھاؤ! اج جیکر ݙیکھوں تاں کیا نظامی صیب کئی غلط ڳالھ آکھی ہائی۔۔۔55 والی ولیتی کھنڈ160, 156 والا ڈالڈا گھیو380, 30 والااٹا80, 70 والاپٹرول 150 روپے وچ ویچݨ ڈاکہ نی تاں ٻیاکیا اے؟؟

استادمحمودنظامی اونویں تاں 60 دے ݙہاکے کن نیشنل عوامی پارٹی (نیپ) دا سیاسی کارکن ہائی, پر او ڈھکیا ان ن لیگ دے دور وچ ڈوتراۓ سال پہلے ہائی, جݙاں تونسے وچ اے سی دے آݙت بزار دے دورے پاروں پولیس غریب لوکیں کٹ مارکریندی پئی ہائی راہ خالی کریندی پئی ہائی تاں ہٹکݨ پاروں انہاں نظامی صیب کوں نپ گِھدا, جیویں پولیس دی گاݙی وچ بہندیاں ای نظامی صیب سگریٹ بکھایا تاں اینویں لڳا خواجہ نظام دی ٻگھی ویندی پئی ہووے تے خواجہ ٻگھی وچ ٻیٹھا ہووے۔۔۔نظامی صیب دے ڈھکیجݨ دی وونت ݙوچار گھنٹے وچ اُلخ مُلخ پُڄ ڳئی۔۔۔میں ایس ایچ او تونسہ کوں فون کرکے پچھا جونظامی صیب کوں کیوں ڈھکیاہیوے تہاکوں شرم نئیں آندی, ایس ایچ اوآکھیاغلطی تھی ڳئی اے ماف چپکرو, گولڈلیف دیاں ݙوݙٻیاں گِھن ݙتین, تراۓ واری چاہ پلائی اے, ول وی مندے کڈھیداٻیٹھے,اُتوں جیندا فون آندے او وی مندے کن گھٹ ڳالھ نی کریندا, میں فون انہاں کوں ݙینداں نظامی صیب کوں آکھو الہ دا ناں منے گھرونڄے,ساکوں بشک ݙیوے!

اونویں تاں استاد محمود نظامی دیاں ڈھیرساریاں ڳالھیں اِن, کئی کتاباں لکھیاں ونڄ سگدین۔۔۔پر, سبھ تو وݙی گالھ جیہڑی مورخ وی نہ بُھلاسگسی او ایہا ہے جو نظامی صیب تونسے وچ شامی صدر بشارالاسد سانگے ہک مظاہرہ وی کرایا ہائی, جیہڑا کمیونسٹ پارٹی آف پاکستان دے بینرتلےتھیا۔۔۔کجھ ݙینہہ بعدنظامی صیب ملتان ڳئے, کہیں سنگتی مظاہرے دی وجہ پچھی تاں آکھیس, ݙیکھو! بشارالاسد کلھا کُٹِیندا پئے کئی اوندے واروں نئیں تھیا, سا7ے اُتے فرض ہئی جواوندے واروں تھیووں!

لوک اہدن استادمحمودنظامی پیرپٹھاݨ خواجہ سلیمان تونسوی دے شہر وچوں ہائی, ایہاڳالھ میکوں کڈاہیں چیتے نی پئی جو تونسہ کیویں پیرپٹھاݨ دا شہر اے, تونسے تاں پیرپٹھاݨ کوں جاہ ݙتی چاہ ݙتی, رتبہ ݙتا, ول پیرپٹھاݨ تونسے دا تھی ڳیا, تونسہ پیرپٹھاݨ داکیوںں تھیا؟ جیکر تونسے دی کئی نسبت ہے تاں او سمی اے, جیکوں راول نال عشق تھیا ول راول دے رلے تونسے کوں مُکلایُس, پر تونسے اونکوں نہ مُکلایا تہوں قسمت مُٹھی تونسے ولدی ول آئی۔ بھلے استادمحمودنظامی دے ابے اوندا ناں پیرپٹھاݨ دی نسبت نال رکھیاہووے, پر استادمحمودنظامی تونسے دا راول ہائی, سمی دے ݙیس داراول۔۔۔جݙاں نظامی صیب آپݨی بھوئیں ویچی تاں سنگت صلاح ݙتی ملتان گھرگھن کے اُتھائیں لݙونڄو, ٻال پڑھ ویسن۔۔۔استادمحمودنظامی آکھیا ٻالیں کوں ضرورپڑھیساں پرتونسہ اصلوں نہ چُھڑیساں!!

استاد محمودنظامی دی ایہاخاصیت اُلخ مُلخ مشہور ہئی جو پر وجھ کہیں کوں نہ ݙینداہا, ول اے ڳالھ سمجھ توں ٻاہرو اے جو موت دے فرشتے کوں کیویں وجھ ݙتی ہیسی؟ ݙیس بیغانے روانگی توں چھی ݙینہہ پہلوں تاں میکوں فون کرکے آکھیا ہاسی, تکڑا تھیویں توشہ خانہ کیس وچ عمران خان کوں اصلوں نہ چھوڑیں,اساں یکے تیݙے نال اوں, میں آکھیااستادتیکوں پتہ اے میں مہاراݨاپرتاب دا خون آں, بھلا جنرل نیازی دی اولاد کنوں کیوں ݙرساں!!

تراۓ 7ینہہ پہلوں سرمدسلیمان دا مُکھ پنا پڑھیا جوابا ٹُرڳئے تاں ایہا ڳالھ چیتے نی پئی , بھلا اے کیویں تھی سگدے, استادمحمودنظامی جیہڑا کہیں کوں کݙاہیں وجھ نہ ݙیندا ہائی, بھلا موت دے فرشتے دی کیامجال جونظامی صیب دا ساہ کڈھے۔۔۔ول پتہ لڳے جو موت دے فرشتے سُتے ہوۓ دا ساہ کڈھیے تاں ساری ڳالھ سمجھ آڳئی, لغور تھی کے چوری نِندر وچ ساہ کڈھیا ہیسی, جُوان دا پُتر ہائی تاں سامݨے آکے ڈینہہ کوں ساہ کڈھیندا ول پُچھ گھنوں ہا۔۔۔۔حال ݙے کاکا نظامی صیب نال کِھڑاوݨ کے تلا سوکھا کم اے!!!