محمود نظامی سرکار دا چھیکڑی وعدہ اتے چھیکڑی تصویر|| جاوید اقبال عنبر

رشد نذیر لغاری سائیں دے ناول” وساخ” دی تقریب رونمائی دے کانڈھے ڈیون سانگے میں 2 نومبر کوں بہاءالدین زکریا یونیورسٹی ملتان دے شعبہ سرائیکی وینداں تاں اتھاں محمود نظامی سرکار ڈاکٹر قاضی عابد سائیں دے دفتر اچ بیٹھے ہن، میں ڈاکٹر قاضی عابد سائیں کوں تقریب اچ شرکت دا کانڈھا اتے ناول وساخ پیش کیتا ،ایں دوران ہی میں سرائیکی دانشور اتے استاد سائیں محمود نظامی کوں وی ہوں ویلھے سائیں ڈاکٹر قاضی عابد اتے سائیں ڈاکٹر خالد اقبال دی موجودگی اچ کارڈ لکھ تے پیش کیتا اتے گذارش کیتی جو وساخ دی گھنڈ کھلائی اچ 5 نومبر کوں لازمی تشریف گھن آواہے، نظامی صاحب وعدہ کیتا جو میں ضرور آساں ۔ 5 نومبر کو وساخ دی ملتان ٹی ہاوس اچ گھنڈ کھلائی ہئی جتھاں بئے ڈھیر سارے سنگتی موجود ہن اتھاں محمود نظامی سرکار وی موجود ہن۔۔۔ انہاں میکوں آکھیا جو مرشد” وعدے” موجب اساں آگئے ہیں جیندے تے میں انہاں کوں ویلکم کیتا اتے انہاں دا شکریہ ادا کیتا۔۔تقریب اچ سائیں محمود نظامی سرکار سائیں شکیل بلوچ دے کٹھے بیٹھے نظردے رہ گین یا ہک واری اٹھی تے سائیں نذیر لغاری کول اسٹیج تے آئن اتے انہاں دا لغاری صاحب نال شاید او آخری مختصر مکالمہ تھیا ہوسی ، انہاں دی اے کہیں تقریب اچ چھیکڑی واری شرکت اتے اے چھیکڑی تصویراں ہن جیڑھیاں وساخ دی تقریب رونمائی دے دوران گھدیاں گین۔

میں انہاں دی موت دا صدمہ لفظاں اچ بیان کرن توں قاصر ہاں ۔۔۔۔۔۔ پر ایں گالھ تے ہک اطمینان وی محسوس کرینداں پیاں جو محمود نظامی سرکار دی دوستاں نال چھیکڑی ملاقات دا موجب میں بنیا اتے اے انہاں دی کمٹمنٹ اتے نذیر لغاری سائیں نال محبت ہئی جو او وساخ دی گھنڈ کھلائی اچ آئے اتے ڈھیر مد بعد کئی مہاندرے اتے دیرینہ دوستاں کوں مل تے ہمیشہ کیتے وچھڑ گین ۔۔۔ ہائے وووو ۔۔۔

محمود نظامی سرکار دی اجن چیت رحلت دا سن تے چیتا رل گے، اے کیا تھی گے کیویں تھی گے، سمجھ نئیں آندا پیا ، نظامی صاحب سب کیتے استاد دا درجہ رکھیندے ہن ،اج او استاد ایں دنیا توں ہمیشہ کیتے ٹر گے، انہاں دی موت سرائیکی وسیب کیتے بہوں وڈا صدمہ ہے ، دعا ہے مولا انہاں دی اگلی منزل آسان کرے ۔ آمین

استاد نظامی تہاکوں کڈاہیں نہ بھل سگسوں ۔