چلو کجھ ہل چل تیں مچی۔۔||اکبر ملکانی

اکبر ملکانی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔
سبھائیں شام کوں 23 اکتوبر اے۔فاضلپور وچ استاد نزیر فیض مگی دی یاد وچ متواتر ہر سال تھیونڑ الا مشاعرہ موسیقی جیندے وچ سرائیکی تحریک دے اگوانڑیں دی گال بات وی کرائی ویندی اے۔ ایں کنوں اگوں ڈو ہفتے دے بعد 6.7 نومبر کوں سردار عاشق خاں بزدار دا مہرے آلے متواتر ہر سال تھیونڑ آلا خواجہ فرید سرائیکی میلہ تھیندا پئے۔جیندے وچ الخ ملخ دے مہان شاعر ۔گلوکار۔سرائیکی ڈرامے۔سرائیکی جھمر دا بہوں وڈا پڑ لگدے۔جتھاں کراچی کنوں گھن اسلام اباد۔دیرہ اسماعیل خاں ٹانک تک مہان قوم پرست شریک تھیندن۔اپڑیں خیالات دا اظہار کریندن۔
بے شک انہیں کجھ نال میڈا ہمیشہ اختلاف ضرور رہندے۔میں سمجھداں اے کٹھ قومی کٹھ نئیں رہ گئے۔لوک صرف جھمر مشاعرے تک محدود رہندن۔قومی تحریک دی سنجیدہ گال کوں گھٹ سنڑدن۔اگر صرف مشاعرے موسیقی سرائیکی تحریک کوں تقویت پچیندے۔ تاں آج عاشق بزدار سمیت کتنے سرائیکی شاعر تے قومی اگوانڑ ایم پی اے بنڑ گئے ہوون ہا۔ لیکن اے ساڈی بد قسمتی ہے جو لوک آج وی میلہ عاشق خان دا پسند کریندن تے چاکری گودے سردار دی۔ جھمر مہرے آلے دے پڑ وچ لیندن تے ووٹ سرائیکی مخالف دی صندوق وچ سٹیندن۔ اے ڈاڈھی گالھ اے؟ نماز کہیں دی تے دسترخوان کہیں دا ۔ ایندا مطلب ہے اساں جو کجھ اہدے ودوں او کجھ بئی شئے ہے تے لوک جیرھا کجھ کریندے ودن او کجھ بئی شئے ہے۔ کتنا ڈکھ دی گالھ ہے عاشق خان دا 36 سالیں دا پورھیا ضائع ہے کیا؟ سرائیکی اگوانڑ جیرھے قبریں ونج ستن انھیں دی محنت اجاں گودے کھاسن کیا؟ آخر کیا وجہ ہے لوکیں کوں ساڈی گالھ سمجھ نئیں آندی یا کوئی ایندے وچ ساڈا قصور ہے۔؟ یا وسیب زادیں کوں گال سمجھانونڑ وچ ساڈے کولھو کمی رہ ویندی اے۔
بحرحال اے انونڑ آلے جیہاڑے سرائیکی تحریک واسطے نیک شگون دا ذریعہ ثابت تھی سگدن۔

اے فاضلپور۔مہرے آلے دے ڈو وڈے کٹھ۔سینڑ اجالا لنگاہ دی وسیب یاترا۔اصف خاں دا وسیب لانگ مارچ، وسیب کیتے سوجھلا ثابت تھی سگدے۔اے چار پروگرام وچ ہر شئے وسار کیں یکسوئی دے عمل کوں قریب ترین کیتا جا سگیندے۔انہیں چاریں پروگرامیں دے بعد کہیں ہک جاہ تیں کٹھا تھی کیں رہنما اصول طئے کیتے ونجن۔رہبر کمیٹی بنڑائی ونجے۔مشاورت دے عمل کوں تیز کیتا ونجے۔سرائیکی تحریک دے وچ صاحب اے حیثیت صاحب اے سوچ لوک کافی تعداد وچ موجود ان۔وقت دی قربانی لازمی ڈیونڑیں پوسی۔بیڑی ضرور کندھی لگ پوسی۔
آج نہ تیں کل کجھ نہ کجھ آخر طئے کرنڑاں تیں پوسی۔نہ تاں کے تک اے پانڑیں دی مندھانڑیں ولڑیندے رہسوں۔
جے تحریک کوں کامیاب کرنڑیں تاں ول سبھ کنوں پہلے اے لازمی طئے کرنڑاں پوسی۔اسںاں تحریک دے ساریں لوکیں کوں وفاقی پارٹیں دے پوچھڑ نئیں پکڑنڑاں چاہیدا۔ایہو ہک گھر اے جیرھا ساکوں ڈاڈھا نقصان پچیندا پئے۔جیندی وجہ نال اساں کچی پہلی کنوں اگوں تیں نسے نکل پئے سگدے۔
ایں عمل واسطے ساکوں قربانی ڈیونڑیں پوسی۔کوڑی کونین دی گولی ہر صورت کھانونڑیں پوسی۔
اے کٹھ قسمت نال تھیندے جو پئے ہن۔انہیں دے حوالے نال میڈے اندرو دل وچ کجھ گالہیں ہن۔جیرھیاں جناب دے گوش کرنڑ میں مناسب سمجھدا ہم۔او میں جناب کوں کیتیم۔میکوں نئیں پتہ جناب کوں میڈیاں گالہیں مٹھیاں لگن کوڑیاں لگن۔
کوڑیاں لگن میکوں معاف فرمیسو۔مٹھیاں لگن جواب د منتظر رہساں۔امید اے میڈے نال ضرور الیسو۔میکوں جناب دا بھالا رہسی۔شکریہ۔

نوٹ۔۔۔۔۔۔۔۔۔۔۔۔اج میڈے موبائیل دے ٹوٹل نمبر ڈیلیٹ تھی گئین۔جیرھا میڈے کیتے المیہ اے۔دوست مہربانی کریسن۔کہیں نہ کہیں ذریعے نال جیویں مناسب سمجھو۔اپڑیں نمبر لکھ کیں بھیجو۔ایہو میڈا نقصان آج شام دے ویلھے تھئے۔انتہائی شفقت ھوسی۔ناراض وی نہ تھیسو۔شکریہ

توھاڈا اپڑاں۔محمد اکبر خاں ذات ملکانڑیں۔قوم سرائیکی۔چیرمین پاکستان عوامی سرائیکی پارٹی ۔
سرائیکستان ھاوس دیرہ غازیخاں۔

About The Author

dailyswail

See author's posts