اوستا۔۔۔فارسی سنسکرت۔۔۔۔سرائیکی||احسن واگھا

جݙاں 1987 وچ سرائیکی شاگرد سانجھ بݨدی ودی ہئی تاں ایہو اعتراض تھیا۔ خدشات وی کجھ اینویں رلدے ملدے ہئین۔ کجھ دا خیال ہئی جو انہیں شاگردیں دی پالیٹکس ہوٹھوں ساکوں انت تھاݨے کچہری دے چکر لاوݨے پوسن۔ ریسرچ کروں، کتاباں تے رسالے چھاپوں۔

کجھ ٻئی سنگت دا خیال ہئی جو اے کتاباں رسالے جے پڑھݨ آلے نہ ہوسن، انہیں بحث مباحثے کوں سمجھݨ آؒلے نہ ہوسن تاں اے کیا کھٹیا وٹیا؟ مطلب جے سرائیکی تحریک اڳونہی نہ تھیسی، ایندے وچ ننویں لوک نہ رلسن، اے کھڑے پاݨی وانگ تھی ونڄے تاں کیا ریسرچ، کیا نالج، کیا کتاباں تے رسالے۔ مطلب او کینجھا ایڈو۔لاگ جیڑھا پریکٹیکل پالیٹکس کنیں ٻہوں پروبھرا رہوے۔ خیر اے پراݨے سٹائل دی ڳالھ ہے۔

ایں سمسیا دا ہک حل یا درمیانہ رستہ "پولیٹکل کلچر” دی ٹرم نال کڈھݨ دا ترلا تھیا۔ لوک سانجھ پروگریسو تے نیشنل ڈیموکریٹک کلچر دے ننویں قدریں دے ودھارے کیتے کم کریسی۔ ݙوجھے لفظیں وچ اے نہ معروف معنی وچ پولیٹیکل پارٹی ہوسی تے نہ کوئی تھنک ٹینک یا ثقافتی ادبی سلہاڑ۔

سمسیا اڄاں تائیں چلدی پئی ہے۔ میکوں تاں اے "پروڈیکٹو پرابلم” لڳدے۔

ویسے جے تائیں لوک سانجھ دے "صوبہ تحریک” دو ونڄݨ دی ڳالھ ہئی تاں اے سانجھی ڳالھ ہئی۔ ایندے وچ تساں اڄاں کجھ "پُش” کرݨ آلے ہاوے۔ "تبدیلی ہکا ۔۔ سرائیکی صوبہ” دا نعرہ وی تساں ای ساکوں گھڑ کنیں ݙتا ہئی۔ اے تساݙا کریڈٹ ہے۔ حسب دستور تساں جے اپݨے کریڈت کوں ڈس۔ کریڈٹ بݨاؤ تاں اے وی بہترین ہے۔ کریٹیکل ہووݨ دی نشانی ہے۔ 

ویلھا وٹیندا ریہہ ویندے۔ ٻہوں کجھ وٹیج وی ڳئے۔ نروار کیتے کتوبر وچ سنگت دا کوئی کٹھ کریجے۔ ایں سمسیا کنیں گھن ٻئے سبھے ایشوز تے ڳالھ تھیوے۔

ایں جھوک فنا وچ ابدیت دی چھڑی ہکا شکل ہے تے او قصہ کہاݨی ہے۔ کہاݨی چلدی رہوے، بݨدی رہوے، وٹیندی رہوے۔ ارشاد تونسوی سئیں دے شبدیں وچ:

اساں نہ ہوسوں تاں ساݙے قصے ہوسن

ویسے ای نظم تساݙے نانویں ای منسوب ہے۔