شَکی سماج||عابدبزدار

ساݙا اے سماج ہک اینڄھا شکی سماج اے جھیرا بندے شودے تئیں ٻہوں ہیلے بہانئیں نال شک کریندا رہے ویندے اتے تریمت ولوں تاں سیرو پیر دھوتا پیچھو اے اتے ہر تراویں کوڑ لاوݨ تیں تُل ویندے. جیکر کہیں تریمت کوں کہیں جُعان نال کھلدا ݙیکھے تاں وی شک کریندے روندا ݙیکھے تاں وی کَئی تہمت لا ݙیندے اتے ایویں جے کَئی تریمت اپݨی جُہت نال کئی مقام اتے مرتبہ بݨا ڳھندی ھے تاں وی اے معاشرہ اونکوں برادشت نیں کریندیں اتے طرح طرح دے شک کرندئیں ہوئیں اوندے تئیں تُہمت ملامت لازمی لیسی. ایں شک آلی کوڑھ دی بیماری نے کئی تریمتیں شودیں دی ذندکی گال ݙیتی ھے اتے ٻہوں سارے گھر وی برباد کر ݙیتے ہن. ساݙے ایں معاشرے ایچ شَک کولو پاک صاف ہووݨ چھڑا تریمت کیتے لازمی ھے مرد تاں ڄایا وی کھیر دھوتا ھے. ساݙے ایں سماج ایچ جیتھاں مرد دے ڳندے کولو ڳندے کم تئیں وی فخر کیتا ویندے تاں تریمت دے چَنڳی کولو چَنڳی جہت کوں وی شک دی نگاہ نال ݙیٹھا ویندے آخر کیوں?.

شَکی سماج دی شَک دی اے بیماری ٻہوں پراݨی ھے جئیں اللہ دے پیغمبریں دیئیے پاک دامن مَیریں اتے ذالئیں کوں وی نہ چھوڑیا اتے وت رب تعالٰی نے خود انھیں دی پاک دامنی دیاں قسماں وی چایاں. ایویں رام چندر ڄھئیں ٻھڳوان وی اپݨی سیتا ڄھئیں روحانی دیوی تئیں شک کرݨ لڳ پائے تاں وت سیتا نے ہک ٻھا دے مچ اے پہھ تئیں اپݨے شک کوں مٹایا.

اے تاں اللہ دے نبئیں اتے رام چندر ڄھئیں روحانی لوکیں دی تریمتیں تئیں سماج اتے ایندے لوکیں دے انھیں تئیں شک دے حال این. ساݙے وسوں وسیب دیاں تاں سیرو ݙھیر ساریاں تریمتیں ایں شکی سماج دے شک دی بیمار کولو اپݨیاں ذندکیاں مُکا گین.

ساݙے ہک سنگتی شَک اتے شَکی سماج دی ہک ݙونگھی کہاݨی سُڑیندیں ݙَسایا. ہک تریمت نلکے تیں کپڑے پائی دھوندی ہائی اتے نال ہک جُعان راہ نال ٹپدا پیا ہا راہی جعان تریمت کوں آکھیا مائی میکوں تریحہ لڳئی ھے میں نلکے کولو پاݨی پی گھناں تریمت ولدا ݙیتا آ ادا پاݨی پی گھن توں. تریمت اپݨیں خیالی اچ کپڑے دوھوݨ شروع کر ݙیتے تسے جعان اتے کپڑے دھوندی تریمت دے ایں سارے عمل کوں تریمت دے پائے پَریں کولو ݙیٹھا اتے شک کریندیں ہوئیں تریمت دے کولہو آیا اتے تریمت کوں گالھیں مندے ݙیوݨ لگ پیا اتے اے الزام وی لا ݙیتہ جو تیں پرائے جعان نال کیوں آلائے. تریمت آکھݨ لگی ہائے بائے میں تاں اوندے نال کئی گالھ کینی کیتی او تاں شودا راہی تَسا ہائی پاݨی پیتی گئے پیا. کہیں وی تریمت دی گالھ نہ منی اتے ہمیش آلیکار ایں شکی سماج شک دی بنیاد تیں تریمت کوں کالی کر تیں مار ݙیتونے ایویں وسوں وسیب دیئیے ٻہوں ساریئے تریمتیں کوں چھڑا شک دی بنیاد تیں کالا کر تیں قتل کر ݙیتہ ویندا رہے گئے جا ویچݨ دی سزا ݙیتی ویندی رہے گئی ھے.

ساݙے وسوں دی شَک دی تریخ وی ٻہوں ݙونگھی ھے جئیں تریمت کیتے ہمیش ظالمانہ کردار ادا کیتے تریمت دے ہر عمل خاص کر یاہݨ یاواوݨ دے حوالے نال ایں شَکی سماج پیو بَݨ تیں دھی کو شک دی نگاہ اچ رکھیئے، جا پُتر بݨ اپݨی سَکی ما کوں بھاویں او جھنجھی عمر اچ کیوں نہ ہائی کہیں مرد نال کہیں وی طرح دی گالھ مہاڑ کریندیئے ہوئیں ݙیٹھے تاں شک اچ رہے گئے، جا وت بھرا بݨ بھیݨ کوں ہمیش شَک دے غذاب اچ رکھی رہے گئے ایویں جے مرد پئے بݨئیے تاں وی اہݨی ذال کوں اپݨی ما، بھیݨ جا ول دھی آلیکار یاہݨ یاواوݨ ولوں شک دی نگاہ نال ݙیھدا رہے گئے. شک دی اے بیماری ساݙے سماج اچ خود مَردیں دے وجہ کولو ھے کیوں جو ایں وسوں دا مرد تریخ اچ ہمیش ہمیش کیتے ݙو نمبر رہے گئے اتے جیتھاں وی موقع ملیئے ٻہوں ݙھیر جسمانی اتے سماجی طور تیں طاقتور ہووݨ دی وجہ کولو کمزور اتے مظلوم تریمت کوں مختلف طرخ دے ہیلیں بہانیں نال ذبردستی جا وت بلیک مل کر تیں استعمال کریندا رہے گئے ایں وجہ کیتے ایں ظالم. شکی ݙونمبر مرد تریمت کوں وی اپݨیں ݙونمبر شک دی لپیٹ اچ رکھی رہے گئے اتے ہمیش آلیکار اپݨی شَک آلی بیمار سوچ نال ݙیہدا رہے گئے. ایں وجہ کیتے تریمت ولوں اے شَک آلی بیماری ساݙے مردیں دے شَکی سماج دی ٻہوں اُتم رہے گئی ھے اتے مردیں دی چھوڑی ایں بیماری کوں میتھ دا درجہ ملدا رہے گئے اتے تریمت شودی ہمیش ایں بھوگ اچ اپݨیاں ذندکیاں تباہ کریندی رہے گئی ھے. اتھ ایویں تریخ دے مسلسل دروھ دی وجہ کولو ایں بیماری کوں سماجی طور تیں کہیں تراویں گالھ مہاڑ نہ کر تیں مضبوط وی کیتا ویندا رہے گے اتے ایندے بارے کئی طرح دیاں دلیلاں وی ݙیتیاں ویندیاں رہے گیاں ہن.

ہُݨ حالات وٹیندے پائے ہن اتے لوکیں دیاں سوچاں وی وٹیندیاں پائن اتے تریمت دی سوچ وی ہُݨ ذمانے دے نال نال وٹاوݨ دی لوڑھ ھے ایں وجہ کیتے اساں مرد تریمت کوں ہمیش آلیکار شَک دی ایں نفسیاتی بیماری کولو آذاد کروں اتے تریمت کوں کھلم کھلاں معاشرے دے کمیں کاریں اچ مرد دے کھٹے کم کرݨ دی اجازت ݙیوو اتے تریمت دی صلاحتیں کوں مزید نِکھرَݨ دا موقع وی ݙیوو اساں لوک بطور مرد جا بطور سماج جنتاں تریمت تیں شک کریسوں جا تریمت پچھو خامخا دی پہرے داری لیسوں تاں تریمت کہیں تراویں وی ایں شَکی سماج اچ اپݨاں کم مکمل طور تیں نہ کر سڳسی.