"کائنات دا سفر”|| عزیر راجو

کائنات ہک اینجھا راز اے  جیکوں ڄاݨݨ دی جستجو ہر وقت دے انسان دے اندر ازل کنوں موجود اے تے کݙاہیں ختم نئیں تھیوݨی۔ کائنات دا علم تاں ہک سمندر اے جیندا کنارہ کائنی تے انسان حالی تک ہیں سمندر اچوں علم دا کوئی ہک ٻُک بھریا ہوسی.
انسان جیڑھے روز دے معاملات تے کم کار کر تے رات دا سُمدے ویلھے اسمان ݙو ݙیہدے تاں او اندری اندر حیران تھیندے جو اے کائنات کیا ہے؟ کتنا وسیع اے؟  کئیں بݨئی اے؟ کیوں بݨی اے؟ اے اسمان تے چمکدے تے کجھ حرکت کریندے اجسام کیا ہن؟ اے سجھ کیا ہے تے چندر کیا ہے؟ اے کیوں ابھردن تے غروب تھیندن؟ وقت کیا ہے؟ اے کیوں گزردا ویندے تے ول نئیں ولدا؟ کائنات اچ ساݙی حیثیت کیا ہے؟ کائنات کوں مزید اساں کتنا جاݨ سڳسوں؟ اے سارے او سوال ان جیڑھے ہر انسان دے اندر ابھردن تے حیران کر ڈیندن۔
ڈھیر سارے سائنسدانیں نے انہیں سوالیں دے سائنسی جواب ڈیوݨ دی کوشش کیتی اے جیندے وچوں نیوٹن، گلیلیو، آئن سٹائن، ڈاکٹر عبدالسلام اتے اسٹیفن ہاکنگ مشہور ان۔
ہُݨ تک تاں اساں انہیں سائنسدانیں بارے صرف سݨدے آئیوں جو اے ٻہوں وڈے سائنسدان ہن لیکن اے سارے سائنسدان آہدے کیا ہن، ساکوں ایندا کوئی سُدھ نئیں۔ ساکوں ایندا سُدھ کیویں ہووے جو اے سارا علم اجنبی زبان اچ بیان کیتا ڳئے جیندے نال ہک عام سرائیکی قاری مستفید نئیں تھی سڳدا.
جعفر عباس بزدار نے اپݨی کتاب "کائنات دا سفر” اچ کاسمالوجی دے مشکل علم کوں سادہ سرائیکی زبان اچ اینجھی مہارت نال بیان کیتے جو اے کتاب ہک عام فہم قاری دا ہتھ پکڑ کائنات دی سیر کرویندی اے تے کائنات دے بارے انہیں ڈھیر سارے سوالیں دا جواب ڈیندی اے۔

اے کتاب پڑھ تے ساݙے وسیب دا عام قاری وی نیوٹن، آئن سٹائن، عبدالسلام اتے ہاکنگ جھئیں وݙے سائنسدانیں دے مشکل نظریات کوں سمجھ تے کائنات دے بارے ہݨ تک معلوم کیتے ڳئے علم کوں ڄاݨ سڳسی۔ انہیں دی کتاب سرائیکی وسیب دے لوکیں تے انہیں دے نسلیں سانگے بہوں قیمتی تحفہ اے۔
کائنات دے سفر دا اردو اچ وی ترجمہ تھیوݨا چاہیدا اے تاکہ ڈھیر سارے لوک جیڑھے سرائیکی نئیں سمجھ سڳدے تے اردو سمجھدن او وی کائنات دی سیر کر سڳن تے اپݨی کائنات بارے جاݨ  سڳن۔ اپݨی کائنات بارے جاݨݨ ہر کہیں دا بنیادی حق اےـ