خیراتی عزت نیں برابری ||عابدبزدار

عزت ہک اینڄھا ورتارا اے جیندی تعریف سبھی دنیا ایچ وکھری وکھری اے کئی لوک کہیں وݙے کولو وݙے عہدے کوں عزت دا ناں ݙیندین اتے کیتھائی چنڳے ٹُکر پاݨی کوں عزتداری آکھیا ویندے اتے ساݙے سماج ایچ عزت دی ڈھیر تعریف یاہݨ یاواوݨ دے نال نال تریمت دے ہر طرح دے چنگیں گندے کم نال کییتی ویندی ھے اتے تریمت بذات خود جیکر کنواری ھے تاں پیو بھرا دی ایویں جیکر پرنیج گئی ھے تاں پئے سَورے دی اتے انھیں سبھے لوکیں دے سمورے ٹٻر اتے ایں کولو ودھ انھیں دے سمورے سماج دیی عزت سمجھی ویندی ھے جھیری کہیں تراویں وی غیرمنتقی اتے غیرحقیقی ھے جھیری تریمت دے اُتیں مرد دی اجارا داری قائم کرݨ دے ہیلے بہانے اتے مردانہ طاقت قائم کرݨ دے علاوہ کشے کینی. ایندے علاوہ ہک خیراتی عزت وی ھے جھیری تریمت ولوں اوندے تریمت پن دی وجہ کولو اونکوں خیرات ایچ ݙیتی ویندی ھے جیویں ہک پنݨیں کوں پنݨاں ہوو‌ݨ ولوں کڄھ خیرات ݙیتی ویندی ھے. ساݙا اے سماج تریمت کوں وی ہک مجبور اتے ہیݨاں خیال کریندے ہوئیں عزت خیرات ایچ ݙیندے. مثال دے طور تئیں جݙاں تریمت کہیں سواری تئیں چڑے تاں بس ایچ پندھ کریندے جُعان اینکوں وکھرا سمڄھدیں ہوئیں ایندی عزت ایچ ہک سیٹ خالی کر ݙیندین ڄھیری نہ انھیں دی ماسی لڳدی اے نہ چاچی. ایویں ٻہوں سارے ٻنھیں سماجی اتے غیر سماجی کمیں ایچ وی تریمت ولوں ایندے تئیں اے سماج ترس کھاندے اتے اینکوں اہمیت ݙیندے.

سماج دا اے روایہ تریمت ولوں ایویں ترس آلہ ہوندے جیویں کہیں مَنڈے، ٹُنڈے، اَندھے جا وت معاشرے دے ٻہوں مجبور،لچار، اتےبیمار انسان کیتے ہوندے جینکوں عزت اتے اہمیت صرف اتے صرف اوندے معزور ہووݨ دی وجہ کولو ݙیتی ویندی ھے. تریمت نہ تاں مجبور اے نہ ٹُنڈی مَنݙی اے، تریـمت تاں ہک تَکڑا اتے ثِبوت سلامت انسان اے ساݙا اے سماج اوندے نال اے وکھرپ کر تئیں سماج ایچ نفسیاتی طور تئیں اونکوں ہیݨاں (کمزور)کریندا پائے. ایں وجہ کیتے تریمت کوں جُعنیں آلے سماج دی ݙیتی ہوئی خیراتی عزت دی نیں برابری دی لوڑھ اے جھیری اونکوں ہیݨاں کرݨ دی بجائے تکڑا کرے. تریمت جئیں ویلھے ایں سماج ایچ برابر سمڄھی ویسی تاں او اپݨی عزت اپݨے آپ جوڑ ڳھنسی جا سیرو سماج اتے جُعنیں کولو کََھس وی ڳھنسی. نویں جڳ جہان دے سبھے ملکیں ایچ تریمت کوں جُعنیں دے برابر کر تئیں برابری دی عزت ݙیتی ویندیھے جھیری اونکوں سماج ایچ ہیݨاں کرݨ دی بجائے اوندے اندروں اندر تکڑپ دا جذبہ پیدا کریندی ھے. ایویں انھیں سماجیں ایچ او اپݨے زورتئیں اپݨی وکھری ڄھا وی بݨیدی ھے جھیری خیراتی عزت کولو ٻہوں ݙھیر چنڳی ہوندی اے. اساں جیتنا تریمت کوں وکھرا، کمزور اتے مجبور ڄَاݨ تیں برابری دی بجائے خیراتی جا وت طاقتی عزت ݙیندے رہسوں تاں ساݙی تریمت ہیݨی کولو ہیݨی تھیندی ویسی.

عابد بزدار

تریمت مضبوط سماج مضبوط