فاروق محرم دی محرم رازی||مشتاق گاڈی

ٻہوں گھٹ فقیر ہوندن جیڑھے ہکے ویلھے جمالی جلالی ہوندن۔ تونسے دی دھرتی دا فاروق محرم انہیں یکتا لوکیں وچوں ہے۔ جمالی ایتلا جو قلم پکڑ گھنے تاں بہترین خطاط ہے، ہارمونیم تے ہتھ رکھے تاں لاجواب موسیقار ہے، ڳاوݨ لڳ پووے تاں بے مثل گائیک ہے۔ پرفامینس تاں اوندے جیوݨ دا ہک ڈھنگ ہے۔

توڑے جو اے جمال اوندے وچ ڄماندرو ہئی پر اینکوں سِنگھارݨ پنُگھارݨ کیتے ایں بے رحم جیوݨ تے بے وسیلہ وسوں وچ اونکوں جیڑھی تݨ مار کرݨی پئی ہے، اے میݙی اَکھیں ݙٹھی ہے۔ تونسے دے پڑَھا وچ جݙاں او جی۔ٹی۔ایس اݙے تے ہک نینگر کلرک ہوندا ہئی تاں اپݨی کلاکاری دی سِک سَدھر وچ سبھ کجھ چھوڑ قلم دوات چا گیدھی۔ موسیقی دا شوق تاں اوندی لوں لوں وسدا ہئی۔ کتھاؤں مانگے تانگے دے ہارمونیم نال ریاض شروع کیتس، استاد الہی بخش دی سنگت وچ اونکوں پرفیکشن دی پاسیوں گھن ڳئے۔ ٻہوں گھٹ لوکیں کوں ڄاݨ ہے جو او ہک منجھیا ہویا شاعر وی ہے۔

اے سَن اَسی دے چھیکڑی سالیں دی ڳالھ ہوسی جݙاں اوندا پیلھا سرائیکی ڳاوݨ دا پروگرام تونسے دے ویگنیں دے اݙے ستریج ڳیا۔ اوں ویلھے سرائیکی تحریک وچ نچݨ ڳاوݨ، جھمر تے ڈرامہ کوں سرائیکی سنڄاݨ دے ودھاوݨ تے ضیا الحقی دے خلاف ہک تݙ کیتے ننواں ننواں ورتیا ویندا پیا ہئی۔ پروگرام تاں ستریج ڳیا پر سوال اے بݨیا جو ساؤنڈ سسٹم تے ݙوجھے لوازمات کیتے پیسے کݙوں آسن؟ چھیکڑ اے صلاح بݨی جو تونسے دے بازار گھم پھر دکانداریں کنیں چندہ کیتا ونڄے۔ ایں کم کیتے میکوں موہری بݨایا ڳیا جو میں شروع کنیں اینجھے معاملیں وچ کجھ بے شرم ہامی۔ ہک ہک دکان ڳئے۔ کہیں دکاندار ݙو روپے ݙتے، کہیں پنج روپے ݙتے تے چھیکڑ وچ کم بݨ ڳیا۔ حمید ڈینٹل دے بھرا دے ویگن اݙے جݙاں فاروق دا پیلھا پروگرام تھیا تاں اوں لوکیں کوں نچا ݙتا۔ اوں پروگرام دے عزیز شاہد دے ڳاوݨ دی چس اَڄ وی میݙی یادواشت وچ اُویں دی اُویں کھڑی ہے۔

پڑ تے مچ ڳئے مچ وائے سانول

نال اساݙے نچ وائے سانول

اڳوں دی کہاݨی دی سبھ کوں ڄاݨ ہے۔ اوندے ڳاوݨ دی پیلھی کیسٹ نکھتی تے فاروق محرم تونسے دا ہک ڄاݨوں سنڄاݨوں ناں بݨ ڳیا۔

ایں سارے جمال نال اوندا ݙوجھا رنگ جلال دا ہے۔ او کوئی روایتی فنکار نئیں تے نہ دربار سرکار نال اوندا کݙاھیں سانگا ریہہ ڳئے۔ عزت نفس اونکوں ٻہوں پیاری رہندی ہے۔ سچ کوڑ دا سوال اونکوں تنگ کیتی رکھدے۔ سچ ٻولݨ کنیں او کہیں سردار، گودے، خواجے اڳوں وی نئیں ڈچکدا۔ سیاسی جبر دا او مخالف ہے، رجعت پسندی اونکوں ہک اَکھ نئیں بھاندی۔ اوکھی کنیں اوکھی ڳالھ کر ݙیوݨ اوندی عادت ہے۔ ٻہوں گھٹ فنکار ہن جیڑھے سیاسی کارکن وی ہوندن۔ فاروق محرم انہیں وچوں ہک ہے۔ جنونی مذہبی لوکیں دے پکھنڈ اوندا ہاں ساڑی رکھدن۔

او اول آخر ہک فقیر ہے۔ فقیر دی پیلھی تے چھیکڑی نشانی اے ہوندی ہے جو او اڄ دے روزی ٹُکر پچھوں کل دی فکر نئیں کریندا۔ او گھر گرہستی کنیں پریں رہندے۔ لُڳ پھرݨ اوندی مجبوری ہوندی ہے۔ تعریف دا او بُکھا نئیں ہوندا۔ سئیں وچ اے سبھ ڳݨ اتم ہن۔

تھی سڳدے اونکوں میݙی لکھت وی پسند نہ آوے تے ݙو ترائے کوڑے سچ میݙے نال وی اَلوا ݙیوے۔

تونسے دا اے فقیر ہمیش سلامت راہوے