غلامی دا کلچر، سرائیکی جھیڑے تے شک دی بیماری۔ ہک سنگتی کوں ولدا||مشتاق گاڈی

سئیں! غلامی دا ہک رویہ اے ہوندے جو غلامیں دی اکثریت اے سمجھیندی ہے جو لوک ہک ٻئے دے ٻدھیل ہن۔ او کہیں ٻئے دی انفرادی کُھل تے فریڈم کوں من ای نئیں سڳدے۔ مثال کیتے فضل لنڈ جو کیتے، اوندا کرما، تساں جو کجھ کیتے، تساݙا کرما، کہیں ٻئے جو کجھ کیتے، اوندا کرما۔ میں یا کوئی ٻیا کہیں ٻئے دے کیتی کرتی دا کیویں ذمیوار تھی سڳداں۔ پر اتھاں ایہو سمجھیا ویندے جو کئی سازش تھیندی پئی ہے۔ کوئی کہیں کوں ٻئے دے خلاف چائی لوائی پئے۔

سرائیکیں دی low self esteem ایتلی ہے جو کݙاھیں او نرگسیت دے روپ وچ نکلدی ہے تے کݙاھیں کاوڑ کرودھ دی صورت وچ ۔ ایں صورتحال وچ ہر کہیں کوں ٻئے تے شک ہوندے۔ جیویں فضل دے بھرا شک کیتے جو شہزاد شفیع فضل لنڈ دے خلاف پوسٹ لوائی ہے۔ اینویں کجھ مدت پیلھوں ہک ٻہوں سئینر سرائیکی دوست پیپلز پارٹی بارے لکھا جو ایں گھنے درخت ہیٹھوں سرائیکی تحریک نئیں پَھل ودھ سڳدی۔ ہک ٻئے پڑھے لکھے نینگر اون گورماݨی ایں سانگے ہک ولدا لکھے تاں اوں سئینر دوست سمجھے اے پوسٹ مَیں لکھوائی ہے۔ اوں میکوں اچݨ چیتی "ان۔ فرینڈ” کر ݙتا۔ ایہو جہیں شک مزاجی دیاں میں کئی مثالاں ݙے سڳداں

سئیں! اساں اپݨے جوڳا سیاسی کم کریندے پئے ہئیں، اڳوں وی کریندے رہسوں۔ اے کم اساں کئی ݙہاکیں کنیں کریندے آندے ہئیں جݙاں کئی سینئیر سنگتی (اوندے وچ تساݙے کئی مرشد وچ شامل ہن) اے شک کریندے تے ٻلیندے ریہہ ڳئین جو اے سارا کم اساں کہیں مفاد پرستی کیتے کریندے پئے ہئیں۔ کوئی سئنیٹر بݨن چاہندے ہئیں۔ کل دی ڳالھ کل نال۔ اڄ وی کئی سنگتی ایہو کجھ آہدن۔

اے غیر سیاسی تے کجھ بیمار رویے ہن۔ میں انہیں وچ گھٹ پونداں۔میݙے چیتے دی سافٹ وئیر کجھ اینجھی ہے جو انہیں جھیڑیں جھگڑیں وچ وی ہک انتھروپولجسٹ بݨ ایہو سوچی رکھداں جو سرائیکی کلچر تے اوندے اینجھے رویں دا کیا کارݨ ہے تے او ساݙی پالیٹیکس وچ کیویں ریفلیکٹ تھیندن۔ اے ہک ٹک فریدی نسخہ ہووے۔ ایندے نال بندہ شانت وی رہندے تے کجھ سکھ وی گھندے