سرائیکی وسیب دے ترائے ڈویژن دا انج ڈویلپمنٹ بجٹ||مشتاق گاڈی

چنڳا ہے یا مندہ پر پی ٹی آئی دی پنجاب حکومت اپݨا ہک وعدہ پورا کر ݙ تے۔ تاریخ وچ پیلھی واری سرائیکی وسیب دے ترائے ڈویژن دا "ساؤتھ پنجاب ڈویلپمنٹ بجٹ” ناں دا ہک انج ڈاکومنٹ جاری کر ݙتے۔ اے ڈاکومنٹ پنجاب فنانس ڈیپارٹمنٹ دی ویب سائٹ اتیں پوسٹ تھیا کھڑے۔ ایندا لنک سبھ توں ہیٹھوں ݙتا کھڑے۔

جیڑھی سنگت اے سمجھدی ہے جو "سرائیکستان” قائم تھئے مُتوں اینجھے ڈاکومنٹ دا جائزہ گھنݨ دا کئی فیدہ نئیں تے نہ کوئی فرق پوندے، او سنگت اینکوں پڑھݨ دی تکلیف سروں نہ کرے۔ او سنگت جیڑھی سمجھدی ہے جو ساکوں اپݨے "پولیٹیکل آرگومنٹس تے ڈسکورس” کیتے اینجھے ایشوز دی مانیٹرنگ دی لوڑھ ہے تاں اوں کنیں درخواست ہے جو او ایں ڈاکومنٹ دا جائزہ وی گھنے تے ݙیکھے جو حکومت دے مختص کیتے 187ارب روپے کتھاں کتھاں لڳدے پئین؟ کیڑھے شعبے ایگنور تھئین؟ ایں بجٹ دی مانیٹرنگ تے ٹریکنگ کیویں تھی سڳدی ہے تاں جو اڳلے سال کوئی پچھ پرتیت تھی سڳے۔ ایندے نال اے وی ݙیکھݨ دی لوڑھ ہے جو کتھاں کتھاں ہتھ تھیا پئے؟

میں ایں ڈاکومنٹ کوں پڑھدا پیاں۔ اڄاں میں چھڑا "ہائیر ایجوکیشن” دا حصہ ای ݙٹھے۔ اوندے کجھ چھوندے چھوندے ُپکھ اے ہن۔

(1) ملتان (نواز شریف انجیرنگ اینڈ ٹیکنالوجی یونیورسٹی)، ڈیرہ غازی خان (غازی یونیورسٹی) تے رحیم یار خان ( خواجہ غلام فرید انجیرنگ اینڈ ٹیکنالوجی یونیورسٹی) وچ پیلھے کنیں تعمیر تھیوݨ آلیں یونیورسٹیں کیتے کل 82 کروڑ روپے رکھے ڳئین۔

(2) ننویں یونیورسڑیز وچ راجن پور ( انڈس یونیورسٹی) کیتے 20 کروڑ روپے (کل لاگت 1 ارب روپیہ)، یونیورسٹی آف مظفر گڑھ ی کیتے 10 کروڑ روپے (کل لاگت 80 کروڑ روپے)، یونیورسٹی آف لیہ کیتے 3 کروڑ روپے (کل لاگت 30 کروڑ روپے)، یونیورسٹی آف بہاولنگر کیتے 5کروڑ 50لکھ روپے (کل لاگت 55کروڑ روپے)، ایمرسن کالج ملتان کوں یونیورسٹی وچ اپ گریڈ کرݨ کیتے 1 کروڑ 50 لکھ روپے (کل لاگت 55 کروڑ روپے)، وومن یونیورسٹی ملتان دی بلڈنگ کیتے 8 کروڑ 70 لکھ روپے (کل لاگت 19 کروڑ 20 لکھ روپے)، یونیورسٹی آف تونسہ کیتے 5 کروڑ روپے ( کل لاگت 2ارب روپے)، عثمان بزدار سکول آف سٹیٹ سائنسز، بہاولپور کیتے 2 کروڑ روپے (کل لاگت 19کروڑ 10لکھ روپے) رکھے ڳئین۔

یونیورسٹیز تے سب کیمپسز کیتے کل رقم ملا کنیں 11 ارب 27کروڑ روپے رکھے ڳئین۔ کالجز کیتے 12 کروڑ 90 لکھ روپے رکھے ڳئین۔ بی۔ایس بلاکس کیتے 44کروڑ 60 لکھ روپے رکھے ڳئین۔ کالجز تے بی۔ایس بلاکس وچ سہولیات کیتے 42 کروڑ 90 لکھ روپے رکھے ڳئین۔ ہائیر ایجوکیشن کیتے کل ملا کنیں 4ارب تے 86 کروڑ 60 لکھ روپیہ رکھا ڳئے۔

ہݨ ایں سارے معاملے کوں جے ایں ݙیکھو جو سرائیکی صوبہ بݨ ویندے، اوندے فیڈرل پول وچ 437ارب روپے ملدن، ایندے علاوہ صوبہ دے آپݨے محصولات کئی سو ارباں روپے وچ کٹھے تھیندن تے انہیں دا جیڑھا بجٹ بݨدے، او کیا ہوسی؟ چھڑی ہک امیجینیشن کرو۔