اساں 2 جون کیوں منیندوں||اکبر ملکانی

۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔
2جون ہک بہوں وڈے سانحہ دا ناں اے۔
سن 1818 کنوں پہلے ملتان ہک خود مختیار ملک دا ناں ھا۔ملتان خود مختیار ریاست دا ناں ھا۔ملتان ہک خود مختیار صوبے دا ناں ھا۔ ملتان ہک نویکلا وطن ھا۔ اے ایں جاہ تیں موجودہ پنجاب دوربین نال وی کتھائیں نہ نظردا ھا۔ہک پنجاب انڈیا وچ ھا۔جیرھا اج تک انڈیا دے کولھو ایں وقت وی ھ پیا۔
ایں ملک ملتان ۔ریاست ملتان۔ صوبہ ملتاں۔وطن ملتان دی شاہی دا تاج نواب مظفر سدوزائی دے سرتیں ھا۔
نواب دا وسدا ویلھا خش و خرم شاہی ۔سونیں سونویں دھرتی تیں اپڑیں رعیت راج نال پیا وسدا ھا۔ایں کنوں پہلے ایہو ملتاں عرب تے افغان دے حملہ آور دھاڑل بادشاہیں دے حملے دیکھ چکا ھا۔تاریخ جنہیں کوں اسلام کھنڈانونڑ دے سر ٹیفکیٹ ڈے چکی اے۔
ایویں ہی نواب مظفر شہید جڈاں ملتان دا باشاہ ھا۔ملتان دا شاہی قلعہ وسدا ھا۔رعیت راج خش ھا۔والی اے ملتان نواب مظفر دی مثالی حکومت ہئی۔جیڈیں کیڈیں امن دا راج ھا۔شیہنہ تیں بکری ہکے گھاٹ تین پانڑیں کٹھے پیندے ہن۔چرند پرند سونڑہیں بولیں الے سارے پکھی ملاں کنوں پہلے محبت دا پیغام ڈے مظفر دی رعیت کوں جگویندے ہن۔خدا دی یاد ڈویندے ہن۔نور اسور دا ویلھا اپڑیں رنگ ڈکھلیندا ھا۔ لوکیں کوں لوکیں نال جوڑیندا ھا۔
وقت د ے یزید پلیت رنجیت سنگھ کوں لوکیں دا رل کیں رہنڑ شئیت چنگاں نہ لگدا ھا۔
جیندی وجہ نال رنجیت پلیت نیں مظفر دے ملتان تین یکے بعد دیگرے 9 حملے کیتے۔ نواب مظفر دی سرائیکی فوج نیں رنجیتی فوج دے 8 حملے جوانمردی نال لڑدیں ھوئیں ناکام کیتے۔کجھ عرصے دے بعد رنجیت سنگھ نیں بادشاہ افغان معزول شدہ شجاع دی سازش نال ہکواری ول ملتان تین حملہ آور تھیا۔ایں وار اپڑیں دی سازش نال ملتان کوں فتح کرنڑ سانگے ملتان قلعے دے چودھار قتل او غارت گری دا جیرھا بازار گرم کیتا۔ہک نویں کربلا دی یاد تازہ کرا ڈتی۔
میں سلام پیش کرینداں ملتان دی فوج تیں ملتان دی عوام کوں جنہیں ہک نویں کربلا وچ خونی برج تیں چوک شہیداں کوں محفوظ کرا چھوڑی۔
جتھ کربلا دا ناں اندے۔اتھ حسیئن علیہ سلام دا ناں اندے۔تا قیامت جتھ رنجیت سنگھ پلیت کمینے دا ناں اوسی۔اتھ خونی برج چوک شہیداں دا ناں ضرور اوسی۔نواب مظفر خان شہید دا ناں وی ہوسی
ملتان وچ ہیں 2 جون 18 سو 18 وچ والی اے ملتان تے رنجیت سنگھ دیاں فوجاں امڑیں سامہڑیں ہن۔گھمسان دی جنگ پئی۔رنجیتی فوج نیں ملتان دے سن اف سائیلیں کوں تحس نحس کیتا۔قتل او غارت گری کیتی ملتان دیاں گلیاں نالیاں خون نال بتھیچ کیں وڑھیاں۔لاشاں ای لاشاں ہن۔اور گمنام لاشاں ہن۔ جیرھیاں سنجانڑ متوں ہن۔رنجیتی فوج ملتان دے رھائشی لوکیں دے گھریں وچ وڑ گئی۔سونے چاندی جواہرات لٹیئے۔ہر شئے کوں مال اے غنیمت سمجھ تیں لٹیا۔عصمت دری کیتی۔ملتان وچ تڈاں پانڑیں دے استعمال کیتے جیرھے ملتان دے تاریخی کھوہ ہن جتھو ملتان دے لوک پیونڑ دا پانڑیں بھریندے ہن۔رنجیتی فوج دی بر بریت دی وجہ نال اپڑیاں عصمتاں بچانونڑ لیوں ملتان دیں نوجوان نیانڑیں بالڑیں اپڑیں جان کوں ختم کر انہیں کھوئیں وچ ٹپے کھا کھا اپڑیں عزت بچائی۔
لاشیں دے ڈھیر کٹھے کر کیں رنجیتی فوجیں قلعے دی بلند و بالا فصیل پار کیتی۔
رنجیتی فوج دے سپہ سالار نیں والی اے ملتان نواب مظفر خاں نال مکالمہ کیتا۔
نواب صاحب تساں محصور تھی چکے او۔قلعے دیاں چابیاں پیش کرو۔قربان تھیواں نواب دی جرات اور جڑت توں۔پتہ ھ توھاکوں نواب صاحب نیں رنجیت دے سپہ سالار کوں کیا جواب ڈتے۔
میں سن اف سائل اں۔میں ہیں بھوئیں دا ان کھندا۔پانڑیں پینداں۔ ریاست دی حفاظت میڈے فرائض اے منصبی وچ شامل اے۔ قلعے دیاں چابیاں میڈے پیٹ وچ ان۔
گرفتاری ڈیونڑ کنوں نواب صاحب نیں شہادت کوں ترجیح ڈتی۔تلواراں چلیاں۔توپ خانے چلیئے۔ نواب صاحب سن اف سائل ھونونڑ دا کردار ادا کیتا۔دھرتی نال وفا کیتی۔ وطن ملتان کوں اپڑیں خون دا خراج پیش کیتا۔6 پتر شہید کرائے۔بختیں بھری ہکا دھی نیانڑیں۔رانڑیں پٹھانڑیں بی بی بخت بھری شہید کرائی۔
والی اے ملتان ہیں 2 جون کوں بالیں بچیں سودھا نواب مظفر شہید بنڑیا۔
اللہ تعالی نواب مظفر شہید دے درجات بلند فرماوے۔امین۔
دھیریں ڈاڈھیاں پیاریاں ھوندیں۔نواب مظفر شہید دی لوہندیں سکدیں دی کلہی ہکا دھی ہئی۔6 ایں بھرانویں دی کلہی ہکا بخت بھری بھینڑ ھئی۔ جیئں محبت دی مثال پیش کیتی۔
نواب مظفر دی شہادت دے بعد جیرھا ملک ملتان۔وطن ملتان۔ریاست ملتان۔صوبہ ملتان دا سرائیکی بادشاہ ھا۔جیندا پورے ملتان قلعے تیں 10 مرلے وچ اپڑیں نویکلی سنجانڑ دا کوئی مزار۔مقبرہ۔ہندیرہ کئینی۔
صرف ایہا ارمان دی گال اے۔ہیں قلعے تیں رکن اے عالم سئیں دا۔پیر بہاولحق سئیں دا ۔حامد علی خاں مہاجر دا مزار وی اتھائیں اے۔
لیکن والی اے ملتان تیں اوندی دھی مائی دی چھوٹیاں جیہاں ڈو قبراں رکن اے عالم دے روضے دے برامدے وچ ان جتھاں 10 بندے کٹھے کھڑ کیں فاتحہ نہیں اکھ سگدے۔باقی پتریں دیاں قبراں رکن عالم سئیں دے باہرلے قبریں وچ موجود ان۔
کجھ لوک 7 ویں پتر دا ذکر وی کریندن۔جیکوں نواب صاحب نیں محل وچ زنان خانے دی دیکھ بھال تیں لایا ھویا ھئی۔اونکوں رنجیت سنگھ دی فوج نیں گرفتار کر گھدا ھا۔
ابدالی روڈ تیں جتھاں ہنڑ ایں وقت ملتان دل الا ہسپتال بنڑیا کھڑے۔اے۔اتھاں نواب مظفر شہید دا شاہی محل ھا۔ایں وخت ایں ہسپتال دا ناں چوہدری پرویز الہی دے ناں تیں ھ۔
ہنڑوی پوری سرائیکی قوم دا مطالبہ اے۔نواب مظفر شہید دے شاہی محل تیں دل الا ہسپتال بنڑیا کھڑے۔ایں ہسپتال دا ناں پرویز الہی دے بجائے نواب مظفر شہید دے ناں تیں رکھیا ونجے۔اور ہک ڈیہنہ ضرور رکھیسی۔
ایں 2 جون کوں پوری سرائیکی قوم سقوط اے ملتان دے ناں تیں یوم اے سیاہ منیندی اے۔سیاہ پٹیاں بدھ کیں احتجاج کریندی اے۔
ظالم جابر حملہ اور ملتان دی قتل و غارت گری دا سبب بنڑنڑ الے پلیت رنجیت سنگھ دا پتلہ وی سنڑیندی اے۔

اے ھ 2جون جیرھا ہرسال اساں منیندوں۔

محمد اکبر خاں ملکانڑیں۔سرائیکستان ھاوس دیرہ غازیخاں۔
چیرمین پاکستان عوامی سرائیکی پارٹی
31،5،2021۔۔۔۔۔۔۔۔۔۔سونوار