سوجھل دھرتی واس, جنوبی پنجاب صوبہ محاذ ,پی ٹی آئی تے قومپرست جماعتاں ||انجینئر شاہنواز خان مشوری

جیہرے ویلہے جنوبی پنجاب صوبہ محاذ بنڑڑ دیاں گالہیں تے نویں مقامی الیکٹیبلز دی تخت لاہور توں بغاوت سامنڑے آئ تاں وسیب وچ ہک خوشی دی لہر سب لوکیں محسوس کیتی ۔ چلو کل دے بھلیے واپس اپنڑے گھر اندے پن تاں ویلکم آکھو ۔

ایں دوران جنوبی پنجاب صوبہ محاذ دی پہلی کانفرنس لاہور دے مشہور ہوٹل وچ تھیونڑی ہائ جیندا ساکوں کانڈھا ڈتا گیا ۔ صوفی تاج صاحب سرائیکی دانشوریں نال گال کیتی کہ کیا ساکوں ونجنڑا چاہیدا اے یا مخالفت. تاں سب دی طرفوں پازیٹو ریسپانس ملیا کہ انہیں کوں کلہا نہ چھوڑو اور مشاورت وچ شامل تھی تے اپنڑی رائے ڈیو ۔

بہرحال سوجھل دھرتی واس دی نمائندگی سوجھل دھرتی واس دے سرپرست صوفی تاج خان گوپانگ دی مشاورت نال ترئے رکنی وفد میں عثمان کریم بھٹہ ایڈووکیٹ تے صفدر خان دریشک شریک تھے ۔ پریس کانفرنس توں پہلے کافی ڈسکشن تھائ تے اساں اپنڑا موقف تے بطور سرائیکی ایکٹیویسٹ سرائیکی ایشوز تے کھل تے ڈسکس کیتی اور انہیں نال اے آکھ تے واپس آئے کہ مشورہ کرتے ڈسیسوں کہ اساں کیا ایں صوبہ محاذ دا حصہ ہوسوں یا کائنہ ۔

کچھ جہاڑے بعد خواجہ عبید صاحب دی میزبانی وچ خانپور وچ ہک میٹنگ تھائ کہ کیا ایں محاذ دا حصہ بنڑڑا چاہیدا اے یا ساکوں علیحدہ کھڑنڑا چاہیدا اے ۔ کافی بحث دے بعد میٹنگ وچ فیصلہ تھیا کہ شیخ عامر فہیم صاحب دی سربراہی وچ قوم پرستیں دی ہک کمیٹی جنوبی پنجاب صوبہ محاذ سمیت تمام پارٹیاں نال ناں تے حدود اربعہ دے حوالے نال اپنڑا موقف پیش کریسے ۔

ایں دوران جنوبی پنجاب صوبہ محاذ پی ٹی آئ نال ہک معاھدے تے دستخط کرتے پی ٹی آئ وچ ضم تھی گیا ۔

کجھ جیہاڑے بعد سراایکستان گریینڈ الائینس دے تمام ممبران دی میٹنگ رانا فراز نون دے آفس وچ تھائ جیندے وچ طے پایا کہ بائیکاٹ مسلم لیگ دے ناں تے مہم چلائ ویسے تے جتھاں کوئ قوم پرست الیکشن لڑدا پے اتھاں قوم پرست کوں تے جتھاں پی پی مضبوط اے اتھاں پی پی کوں سپورٹ کیتا ونجے تے جتھاں پی ٹی آئ مضبوط اے اتھاں پی ٹی آئ سپورٹ کیتا ونجے تاکہ مسلم لیگ نون دا وسیب وچ صفایا کیتا ونج سگے ۔اور اے وی طے تھیا کہ سرائیکستان گریینڈ الائنس سرائکستان ناں توں تے حدود اربعے دی یاد دھانی کروییندا رہ ویسے ۔سوجھل دھرتی واس نے اپنڑے علاقے وچ پی ٹی آئ دا ساتھ ڈتا کیونکہ نون لیگ دے مقابلے وچ الیکشن جیتنڑ دا چانس ہا ۔ اور میں دعوے نال آھداں کہ ایں پورے الیکشن دے دوران کتھائیں وی پی پیچدے خلاف نہ گال کیتی گئی نہ کوئ سوشل میڈیا تے ایں قسم دی پوسٹ پوسٹ کیتی گئی ۔ الیکشن دے دوران سوجھل دھرتی واس الیکشن وچ نمایاں کردار ادا کیتا تے پہلی دفعہ وسیب وچ محسوس تھیا کہ قوم پرست وی الیکشن دی شکل تبدیل کرسگدن ۔ ساکوں گلی گلی محلے محلے دیہات شہر تک اپنڑی گال پچانونڑ دا موقع ملیا ۔ اجرک جھمر سرائیکی مسائل تے وسائل تے گال تھائ ۔

الیکشن دے دوران یا بعد وچ سوجھل دھرتی واس دے تے انہیں دے عہدیداریں دے خلاف سوشل میڈیا ٹرائل جاری رہے مختلف الزام لگدے رہ گن مگر انہیں ساری گالہیں کوں ناں صرف خندہ پیشانی نال برداشت کیتے بلکہ اوندا جواب وی ڈیندے رہ گیوں کیونکہ ساڈی اپنڑی وی خواہش شامل ہائ کہ سرائیکستان دا نعرہ تے اوندے حدود اربعے تے گال تھیندی رہ ونجے ۔ اوندے وچ او وی لوگ شامل ہن جیندے گھر تے جھنڈا پی پی دا ہا تے ووٹ نواز شریف دا او وی شامل ہن جیہرے فیس بک تے بہہ تے صرف تنقید کرییندن ہک روپیہ خرچ کرتے کہیں احتجاج وچ شامل وی نہیں تھیندے ۔ اوندے وچ او مہربان وی شامل ہن جیہرے اج مندے ڈیندے بیٹھن ۔

سوجھل دھرتی واس نہ تے جنوبی پنجاب صوبہ محاذ دا حصہ ہائ نہ پی ٹی آئ دے وچ شامل تھائ ہائ ۔ اور الیکشن دے بعد کڈاھوں وی اوندی کہیں قسم دی طرفداری کیتی اے ۔ ہمیشہ صوبے دے حوالے نال معاھدہ دی خلاف ورزی تے اپنڑی اوقات دے مطابق تنقید کیتی اے ۔ اور نہ کہیں قسم دا عہدہ گھدے اور نہ پی ٹی آئ کوں کڈاھی آئیڈیل پارٹی سمجھیے ۔

سوجھل دھرتی واس کوں اے وی ادراک ہے پیا کہ وفاقی پارٹیز دے اپنڑے مسائل ہن ساڈے واروں تے تھی سگدن مگر اپنڑے اپنڑے علاقائ مسائل دی وجہ توں مجبور ان ۔ سوجھل دھرتی واس ہمیشہ سرائیکی قومی تحریک دی گال کیتی اے جیندے وچ رائیٹ لیفٹ طبقات مسلک پارٹی توں اگوں نکل تے قومی شعور ودھاونڑ دی گال کیتی اے ۔ قوم پرست اپنڑا کم کرییندے رہ ویسن وفاقی پارٹیاں اپنڑا راگ الاپی رہسن اپنڑے اپنڑے مفادات دے مطابق استعمال کریسن مگر ساکوں اپنڑی آواز اچی رکھنڑی چاہیدی اے ساکوں اپنڑے ناں تے حدوداربعے توں نہیں ہٹڑا چاہیدا ۔ الیکشن ، صوبہ اج تے کل دی کہانی اے ۔ قومیں دی تاریخ وی صدیاں تے ہوندی اے تے مسقبل وی قوم کوں اپنڑے ذہن وچ رکھنڑا ہوندے ۔ نہ تے پاکستان وچ سیاسی پارٹیاں اتنا مضبوط ان کہ سب سیاسی فیصلے کرسگن اور جغرافیے کوں تبدیل کرسگن ۔ ساکوں خود کوں ہک مٹھ رہونڑا چاہیدا اے اور شعور دے ودھارے واسطے کم کرنڑا چاہیدا اے تاکہ ساڈا مطالبہ گلی تھلی چوک چوراہے تے عام عوام ڈسکس کرے اور ریاست مجبور تھی تے سٹیس کو تروڑے ۔ میں نذیر لغاری صاحب دی ایں گال نال وی متفق آں کہ پی پی سمیت سب سیاسی جماعتیں دے نال ناں تے حدوداربعہ واسطے ڈائیلاگ کرنڑا چاہیدا اے ۔

لیکن ساڈی گال اوں ویلہے منیسے جڈاں اساں خود مضبوط ہوسوں

بس ہکا درخواست اپنڑی دھرتی آپ وسا توں ۔