بھیڑی یا جنگ ہمیشہ چو مُکھی ہوندی حے|| ذلفی

بھیڑی ، جنگ، جھیڑا یا لڑائی اچ ہیک بھج تروڑ دا رجحان، تصور یا خیال بطور بِلٹ-ان کردار دے موجود ہوندے تے ایندے اچ شریک مختلف فریقین اپݨی اپݨی سمجھ مطابق حکمت عملی بݨا کے لڑدن۔

بھیڑی، جنگ، جھیڑا یا لڑائی انسانی سماج دے ابتدائی ترین وقت کولو ساڈے ارتقا دے نال نال ٹُردا آندے۔

ہݨ سوال اے حے جو جھیڑا یا جنگ اتنا ضروری کیوں حے ؟ کیوں جو اے ازل کولو حے تے اجوکے وقت تائیں ایندے خاتمے دا کوئی امکان نظر نئیں آندا پیا۔۔!

کوئی وی سماج کہیں نظرئیے ، سوچ تے مفادات دے عناصر نال جُڑدے تے اپݨے ارتقا دا پندھ جاری رکھدے۔

ایں پندھ اچ انسانی فکر دی رنگا رنگی دا اثر وی ظاہری گالھ حے ہوندے پیا۔ لیکن ایں ارتقا دے پندھ اچ فکری رجحانات پاروں مفادات دا ٹکراو تھیوݨ ہیک فطری تقاضے دے طور تیں ہر ویلھے موجود ہوندے جیندا مطلب اے تھیا جو بھیڑی دا امکان وی انسانی سماج اچ ہر ویلھے ہوندے پیا۔ ایں بھیڑی یا جنگ دے خطرات کوں گھٹ کرݨ سانگے کجھ اصول مرتب کیتے ویندن جیکوں آسان زبان اچ اخلاقیات آکھیا ویندے۔۔!

حالانکہ ہیک فضول جیہاں معروف فقرہ اکثر سݨدے ہیں جو جنگ تے محبت اچ ہر چیز جائز ہوندی حے تے اپݨی محبت تے جنگ کوں جیتݨ واسطے کہیں وی سماجی طور تیں مروج اصول و ضوابط دی پاسداری ضروری کائینی ہوندی۔ اے سوچ دراصل سماجی انحطاط تے انسان دی فطری کجی دی مظہر حے یعنی ” میری تعمیر میں بھی مضمر ہے اک صورت خرابی کی ".

ول جھیڑے دیاں وی بہوں ساریاں قسماں ہن جیویں گھر دا جھیڑا، مادی مفادات پاروں تھیوݨ آلا جھیڑا، قومی مفادات تیں مبنی جھیڑا، ریاستی سطح دا جھیڑا تے بین الاقوامی جھیڑا۔۔آکھݨ میں اے چاہنداں جو جھیڑا رمز حیاتی حے تے ایکوں ورتاوݨ دا آرٹ جیکوں آ گئے اوندی بقا کوں لاحق خطرات دے امکانات گھٹ تھی ویندن۔

پچھلے کجھ عرصے کولو سوشل میڈیا تیں سرائیکی قوم تے انہاں دے اگواݨاں دے وچاک میں جھیڑے دی مختلف کیفیات تے وجوہات کوں پرکھݨ دی ہر ممکن کوشد کریندا پیاں تے ایں پرکھ پرچول اچ میکوں بہوں مزیدار قسم دے نتائج ڈیکھݨ سمجھݨ کوں ملن۔

ایں نتائج کوں مزید گہرائی نال سمجھݨ واسطے ساکوں کُجھ مروج سماجی اخلاقیات، اصول تے بنیادی ترین نظریات دی ہیک لکیر چھکݨی پوسی۔۔!

اے لکیر چھکݨ دے بعد ساکوں اپݨے اندر تے باہر دے دُشمن عناصر دی پچھاݨ واضح تے ساؤکھی تھی ویسی۔۔!

آؤ ذرا ایں لکیر کوں بکھیندے ہیں۔

اساں دھرتی کوں مآ آھدے ہیں ، آھدے ہیں یا کائینا؟؟؟ چلو ٹھیک حے ہیک لکیر چھکیج گئی جو دھرتی ما ہوندی حے۔

ڈوجھا اساں اپݨے قومی مفادات کوں ذاتی مفادات کولو زیادہ اہمیت ڈیندے ہیں ؟ ڈیندے ہیں یا کائینا؟؟ ڈچکدے کیوں پائے ہاؤ ؟ چلو شُکر حے تُساں من گھدے جئیں نئیں منیا او اپݨے گُناہ دا دل اچ اعتراف کرے چا ایہو بہوں حے۔۔

تریجھا اساں اپݨی وسوں دے دُشمناں دے خلاف اپݨے اپݨے تئیں نفرت وی کریندے ہیں تے اُنہاں کوں ناکام بݨاوݨ سانگے جدو جہد وی لازمی سمجھیندے ہیں۔۔! ایویں حے نا مارکا میں کوئی غلط تے نئیں آہدا پیا؟

چوتھا اساں اندر دے غدار، مُخبر تے مفاد پرست لوکاں کولو کریر کھاندے ہیں۔ اُنہاں دے ظاہر تھیوݨ تیں طعنے وی مریندے ہیں تے چخ لعنت وی کریندے ہیں تے اُنہاں کوں فورا میر جعفر تے میر صادق دے القابات وی ڈے ڈیندے ہیں۔

اگر انہاں چار لکیراں تیں تُساں میڈے نال سہمت ہاؤ تاں ول ڳالھ اگاں ٹُریندے ہیں تے اڃ ناں گھن گھن کے سرائیکی قوم پرستیں دا تے سرائیکی قوم پرستی دے پندھ دا جائزہ گھندے ہیں تاں جو کھیر تے پاݨی دی شناس چنگی تراویں تھی پووے روز دی ہیک نویں چخ چخ کولو ہیکی لنگ جان چُھٹے تے متاں کوئی حتمی فیصلہ تھی پووے تاں چنگاں نئیں؟؟؟

تہاڈی کیا صلاح حے مارکا؟؟؟؟