اشولال کیتے سنیہا||سعدیہ شکیل

او تیکوں خدا چنگا کری ہݨ جان چھوڑ ݙے ایں موئے موبیل دی ۔۔۔اماں سئیݨ دا ہک پیار تے کاوڑ بھریا الا آیا ۔۔۔۔

جیا ٻس آئیم ہک پوسٹ تے کمنٹ پیا کرینداں

ھائےوہ بھالڳس ایں فیس بک کوں کہیں کم دا نیویں ریہا ۔ہر ویلھے توں تے تیݙی فیس بک

اماں ۔۔۔إ کیا کریجے کوئی نہ کوئی پٹکا پیا رہندے ہݨ ٻئی ڳالھ سݨڑئے وے ۔۔سئیں اشو لال کوں پیپلز کلچرل ونگ دا صوبائی صدر بݨڑَا ݙتا اڳئے ۔۔۔۔

کیا ؟ ایہو آپݨا اشو لال ۔

او تاں دانشور تے شاعر نہ ہا ۔۔۔بھݪا ؟؟؟

اماں آپݨا ہتھ منہ تے رکھ تے اکھیں وݙیاں کرتے پچھیا ۔۔۔

میں ولدی ݙتی جیا جیا ۔۔۔جیا۔۔۔۔

وت تساں کہاں رولا پئی کھڑو ۔

اماں میݙی مِٹھی اماں ڳالھ اے ہے جو ہݨ اڄ تئیں اساکوں ایہو ݙسایا ڳئئے جو شاعر چھڑا رومانی یا وت انقلابی شاعری کر سڳدے اتے دانشور دا کم پٹکے پاوݨ ہوندے روز نویں تکرار اوں سیاست کر تے کیا کرݨے اوندا کم اے بھلا ۔۔بس ہݨ ایں توں ودھ اے کہ کوئی اے آہدے جو پپلز پارٹی کیوں ونڄ رلیئے ایہاں تکرار ہے ۔۔۔کوئی مبارخ پیا ݙیندے کوئی آہدے اشو سئیں کوں ٹہندا نہ ہا ۔۔۔۔ٻس ٻیا کیا ۔۔

ہاں وے ابا ۔۔۔میݙا پتر کئی سرائیکی پارٹی کینا ہئی اوں وچ ونڄ رلے ہا ۔۔۔

اماں میݙی وت ہریان پریشان ۔۔۔

سوہݨی اماں پارٹیاں ݙھڳ ہن پوچھ ای ناں پر کٹھ کوئنی ۔راہ سلوک کوئی نی اڄ توݨی کوئی سرائیکی پارٹی اتلی مضبوط ای کینی اقتدار تاں ݙھڳ پرے ہیوی

اچھا۔۔۔۔۔۔۔۔۔۔وت ولا اشو بھرا ٹھیک کیتس چلوں کوئی تاں اساݙا وی کرسی تائیں تاں پڄیا ۔۔میݙا ٻچڑا توں ونج تے مل آویں آکھیں میݙی اماں آہدی پئی ہے ۔ وسیب دے ٻیاں شاعراں تے ادیباں دی پارت ہووی انہں کیتے کئی ایجھا چڄ دا ا ادارہ کینی جھیڑا سرت سنبھال گھنے ۔ ۔اساݙے غریب شاعر کھرڑیاں رڳڑ رڳڑ تے بے وسے تھی ٻاہندین ساݙے وسیب دی ثقافت مردی پئی اے ایں کیتے کوئی کلچرل ہاوس یا وت آڈیٹوریم لازم بݨاوین ۔

اتے میݙا سٗہݨا پتر ۔۔آ ۔ اونکوں آکھیں ۔میݙے گردے خراب تھیندے ویندیں پورے وسیب وچ گردیں دا ہسپتال کینی ہݨ تاں شفارش کروں چا ۔۔۔میݙیاں اکھیں دا وی حال ݙیویں پتر آ۔۔۔۔۔ ۔

ہائےوو میݙی بھولی اما ں