مخمور قلندری اول توں آخر ہک شاعر دے علاوہ کجھ نئیں ||شکیل نتکانی

مخمور قلندری اول توں آخر ہک شاعر دے علاؤہ کجھ نئیں۔ او سونہڑے تے خوبصورت جذبیں دا شاعر اے۔ کتنا وڈا شاعر اے ایندا فیصلہ آونڑ والا وقت تے لوک کریسن لیکن او آپڑیں وقت دا ہک مقبول شاعر ضرور اے۔ اوندی شاعری دے پرستار وی ہن تے اوندا حلقہ احباب وی بہوں وسیع اے۔ او درویش صفت بندہ اے، نفع نقصان تے حساب کتاب توں بے پرواہ۔ ہک عربی شاعر ہئی حسان بن ثابت او رسول پاک دی شان تے انہیں دے دشمناں دی ہجو لکھدا ہا ایں پاروں اوکوں شاعر رسول وی آکھیا ویندا ہا۔ جنگ احد وچ جتھاں خواتین تے بالیں کوں حفاظت دی غرض نال رکھا گیا ہا سئیں ہونڑیں وی اتھائیں ہن تے روایات دے مطابق کجھ یہودی اوں جاء دے آسو پاسوں چکر کٹنڑ لگ گئے ہک دیوار تے چڑھدا پیا ہا۔ رسول پاک دی بوا اوکوں ڈٹھا تاں سئیں ہونڑیں کوں آکھیا جو ونج تے اوکوں روک لڑائی سئیں ہونڑیں دا میدان نہ ہا لہذا رسول پاک دی بوا آپ ونج کئیں اوں موذی دا سر بھنیا۔ سیاست قلندری دا میدان نئیں اے گالھ سچ اے تے او آپ وی اے گال منیندے۔

او خوبصورت جذبیں دا شاعر اے یاریاں وی بے بہا ہنسی پر سیاست اوندا میدان نئیں تے اے گالھ اوندی متنازعہ پوسٹ دے بعد آلی ہر سیاسی پوسٹ توں ثابت تھئی اے لیکن اے گالھ ہک دیوتا تے محبوب نما شاعر دی انا اوکوں مننڑ ناں ڈیسی۔ اوندے سیاسی حوالے نال نادان دوست جیہڑے اوندی شاعری تے واہ واہ کریندن اوندے ہک سیاسی بیان تے وی اوویں واہ واہ کرنڑن لگ گئین۔ باقی کجھ حسد دے مارے لوک ودے ہن جنہیں دی گزران پی پی پی دشمنی اے انہیں کوں وی موقع مل گئے تے سب توں اچے واہ مرشد واہ دے سر وی انہیں دے ہن۔ قلندری صاحب اگر سمجھدن کہ او کئی عظیم سیاسی سوچ دے حامل فرد ہن تے انہیں کوں سیاست وچ کردار ادا کرنڑا چہیدا اے تاں بسم اللہ آپڑیں سیاسی سوچ دی تبلیغ کرن، انہیں کوں حق اے کئی وی سیاسی نظریہ گھن کئیں آون لیکن سیاست شاعری نئیں جیکوں سنڑ کئیں ہر کئی واہ واہ کریسی بیٹھا سیاسی گالھ کریسو تاں اوندے حق وچ وی رائے آسی تے اوندے رد وچ وی پچھیں ایں گالھ دی توقع نہ رکھائے کہ لوک تواڈی شاعری آلی کار تواڈی سیاسی گالھ دا رد نہ کرن تے صرف واہ واہ ای کرن۔ قلندری صاحب بسم اللہ کرو کئی پہلے توں موجود سیاسی پارٹی وچ شامل تھی ونجو یا آپڑیں کئی سیاسی پارٹی تشکیل ڈیو تے جو دل آکھے آکھو ودے لیکن اگر تواکوں کہیں وی جاء تے کہیں وی پڑ، کہیں وی سٹیج تے بھٹو دا نعرہ پریشان کریندے تاں تواڈے ایں سیاسی عمل دا رد عمل وی ہوسی شاعری دے میدان دا دیوتا سیاست دے میدان وچ دیوتا بالکل نہ رہسی اے لکھ رکھو۔