ترکڑی توھاڈے ہتھ وچ اے ۔۔۔اکبر ملکانی

گھونتربازیاں۔کوڑ کہانیاں۔چکر۔چکراٹیاں۔پھیر۔پھرکاٹیاں ۔لارھے ۔لیئے۔لپے۔کوڑیاں دیاں قسماں چانونڑ اے ہنڑ اتھاں ایں گالھوں نہ چلسن۔جو اتھاں ہنڑ ہر نوجوان دی سوچ تبدیل۔پختہ اور پکی تھی چکی اے۔تقریبن سارا وسیب ہنڑ جاگ چکیئے۔

وسیب دے ہنڑ بڈھڑے۔نینگر۔چھوریں۔چھوہر۔جٹ۔مزدور ساریں دا صرف ہکو دا ہکو سوال اے۔جنوبی پنجاب کت واسطے اور کیوں۔توھاکوں شرم نئیں اندی۔ساکوں جنوبی پنجاب اہدیں ھوئیں۔اساں وی آج تئیں توھاکوں کہیں بے ناں نال سڈیئے۔ڈسو آساں پاکستان کوں کڈاہیں پاکستان نہ آکھیا ھووے۔

پنجاب کوں پنجاب نہ سڈیندے ھوووں۔ول ساڈے ایں وسیب تیں آخر اے کہیںاں قہر پئے گئے۔ کہیں قیامت ان ترٹی اے۔ملک دی ہک بہوں وڈی قوم کوں بے نام نشان کرنڑ سانگے۔کہیں ویلھے ساکوں جنوبی پنجاب آکھیا ویندے۔کہیں ویلھے ساکوں ڈو سیکٹریٹیں دے ناں نال پکاریہ ویندے ۔

واہ جو ساڈا ہنڑپ۔واہ جو توھاڈا ڈڈھپ۔ساکوں اے ڈسو تیں سہی آخر اے کیا لڑھ اے۔اے کیا تماشہ اے۔اے کیا پیا تھیندے۔کیوں پیا تھیندے۔اخر توھاڈی کیا مجبوری اے۔ سکے بھرانویں کوں انجو انج کر کیں سیکٹریٹ دے ناں تیں کیوں لڑانونڑ دی کوشش کیتی ویندی پئی اے۔

آخر ایں جنوبی پنجاب دے ناں دی کیرھے بدبخت توھاکوں صلاح ڈتی اے۔یا اسٹیبلشمنٹ دا اے اپڑاں تماشہ اے۔ممکن اے۔اے وی تھی سگدے ساڈا کوئی آپڑاں توھاڈے نال ایں کالونڑ دا بھائیوال بنڑیا کھڑا ھووے۔یا اے بیورو کریسی۔فیوڈل دی اپڑیں فلم وی تھی سگدی اے۔

ھا اگر ساڈے وچو کوئی میر جعفر توھاڈے نال رلیا وی کھڑے۔اے کٹی کٹا ضرور کڈھو۔ ساکوں ڈسو وی سہی۔ڈکھالو وی سہی۔تساں جو ساکوں اکھو یا ڈکھالو۔توھاڈے اے ایم این اے۔ایم پی اے ساڈے نال کھڑن۔ساکوں ہنائیں اکھیئے یا ساری ہنائیں دی گال اے۔

اے گال آساں مردیں دم تک وی تسلیم نہ کریسوں۔جو پہلے آساں کئی واری ڈس وی چکوں۔نہ اے ایم این اے۔ایم پی اے ساڈے ھن۔نہ آساں انہیں دے ہیں۔ایویں سمجھو نہ اے ساڈے نال ھن۔نہ آساں انہیں دے نال ہیں۔اے بی مخلوق ان۔اساں بی مخلوق ہیں۔وت بی گال وی توھاکوں اے وی ڈساواں چا۔تساں وی سنڑ گھنو۔جنہیں کوں تساں ساڈا کھڑے اہدے وے۔تساں نال ایمان دے پچھو۔

اگر آساں انہیں کوں ووٹ وی ڈتے ھونون تاں۔ساڈے کولھو قسم چوا گھنو۔اگر آساں انہیں کوں ووٹ ڈتے ھونون ۔ساڈے ہتھ وی کپیچ پوون۔ظاہر اے تساں ایہو کجھ اکھسو۔اے کیویں بنڑین۔کتھو بنڑین۔کئیں بنڑائے۔

وڈیاں اکھیں تیں اللہ سئیں دیاں ان ۔یا وت توھاکوں آپ کو چنگاں پتہ ھوسی پیا۔جو انہیں کوں کئیں بنڑائے۔بہرحال چھوڑو انہیں گالہیں کوں جئیں بنڑائے ۔جیویں بنڑین۔ آساں انہیں کوں نہیں بنڑایا۔انہیں کوں کیا اکھڑیں یا انہیں ساکوں کیا ڈیونڑے ۔

انہیں دا تاں صرف مراعاتیں۔ تنخواہیں پروٹو کول دے نال واسطہ اے۔وزیر مشیر بنڑ ویندن۔ھونڈا سوک گاڈی وی مل ویندی اے۔ ڈرائیور وی مل ویندے۔گن مین وی نال ھوندے۔گھردے بجلی دے بل وی حکومت اے پنجاب حکومت پاکستان دے ذمے ھوندن۔تہوں تاں انہیں دیاں اکھیں آسمان تیں لگیاں ودیاں ھوندین۔

اے ول پیرو رانڑہیں۔کنڈو راہڑیں۔محکوم۔مظلوم لوکیں دی یا سرائیکستان دی یا 23 ضلعیں دی گال کیوں کرن۔ توھا کوں ہر شئے دا پتہ تیں ھ پیا ۔ نہ تساں ڈورے او۔نہ گونگے او۔توھاڈے کن وی ہن پئے۔توھاڈی زبان وی ھ پئی۔ اندھے مندھے وی کئینوے۔ بال وی کئینوے۔توھاکوں کئینی پتہ جو ساڈا شاعر کیا اہدا کھڑے ۔

ساڈا دانشور کیا لکھدا بیٹھے۔ساڈا اگوانڑ کیا منگدا کھڑے۔ول انہیں ساریں دی ساری گال انڑ سنڑیں کر ۔تساں ساکوں کیا پئے ڈیندو۔کیاجمہوری حکمران حکومتاں ساریاں ایویں ھوندین۔جیویں تساں او۔ قومیں تیں ملکیں نال صرف ڈکٹیٹر ایویں کریندن۔جیویں تساں ساڈے نال پئے کریندو۔

تساں نال ایمان دے ڈسو۔پنجاب کوں صوبہ اکھوں یا ملک اکھوں۔پوری دنیا دے وچ ساکوں پنجاب جیڈا صوبہ گول کیں ڈکھالو۔دنیا دے کئی ملک آساں ڈس وی سگدوں۔ڈکھال وی سگدوں۔جیرھے پنجاب دی ابادی حدود دربعے کنوں بہوں گھٹ ان۔اور او ملک ان۔ساڈے کولھو نہ دڑکے ان۔نہ طاقت اے۔

ساکوں آختہ نہ کرو۔چھتہ نہ کرو۔ساڈی جان چھوڑو۔جڈاں تساں کشیا نہ ھاوے۔کتھائیں نہ ھاوے۔اساں اوں ویلھے وی اتھاں ھاسے پئے۔اوں ویلھے کنوں ڈرو۔جڈاں وسبے دے لوک تاریخ کوں درست کرنڑ سانگے توھاڈی گلوینڑ وچ ہتھ پاتی کھڑے ھونون۔

مہربانی کرو۔سازشاں بند کرو۔جنوبی پنجاب آلا ٹٹ راگ بند کرو۔سرائیکستان دی گال کرو۔کتھائیں ایں نہ تھیوے۔تساں آساں ہیں بھڑاند وچ ڈوہیں متاں صفحہ اے ہستی توں وی مٹ ونجوں۔اپڑیں وطن وسیب توں کوئی وی دستبردار نئیں تھیندا۔تساں اپڑیں دل کنوں پچھ کیں ڈسو۔اساں کوڑ تیں ہیں یا تساں کوڑ تیں ھاو۔نال ایمان دے فیصلہ کرو۔ترکڑی توھاڈے ہتھ وچ اے۔جیوو پئے۔سرائیکستان زندہ باد۔