لون دا جیون گھر نیٹو سینسیبلٹی ہے۔۔۔کاشف بلوچ

لون دا جیون گھر نیٹو سینسیبلٹی ہے۔۔۔نیٹوز دی سینسیبلیٹی ہے۔۔۔

ایہہ اوہ سمجھ ہے جیہڑی اپنے تل کوں کولونیل نئیں بھل اپنی اکھ نال ڈیکھن دی تڈ ڈیندی ہے۔

وت اوہ نیٹو بھانویں لاطینی امریکہ دے کہیں شاہر دا ہووے، افریقہ دی کہیں پروبھرے وستی دا یا وت سرائیکی دھرتی دے کہیں چک دا۔

ڈٹھا ونجے تاں قدیمی نیٹو دی ایہہ ماڈرن کہانی وی ہک چک توں ٹری ہے۔ چک آر ایس۔ رفعت عباس دا آبائی چک۔جتھاں رفعت عباس دے والد سائیں حسن بخش کہیں کوں ڈسئے متوں کتھائیں ٹر گئین۔پتہ نئیں کتھاں؟

کہانی اچ سائیں حسن بخش دا ناں لونکا ہے اتے چک آر ایس داناں لونی۔

لونی شاہر دے واسی ایہہ منن کیتے تیار نئیں جو لونکا مر گئے۔ اوہ چھڑا ونیج گئے، اوڈھر تھی گئے اتے رمز اوندے اوڈھر تھیون دی ایہہ ہے جو لونی شاہر دے واسی اونکوں گولن کیتے اپنے خواب کنگالن، اپنیاں داستاناں پٹن، اپنیاں اساطیراں اچ جھاتی مارن ۔

تھیندا وی اینویں ہے۔ لونی واسی داستاناں اچ بھوندن ، خوابیں اچ ٹردن اتے اساطیراں دا پندھ کریندن پر لونکا اتھاں موجود کینی۔

لونکا دی گول اچ اسپھلتا لونی واسیں کوں ڈو آپشنز ڈیندی ہے۔

ہک: اوہ من گھنن جو لونکا مر گئے، پر اینویں کرن نال لونی(جیہڑا جنگ اتے موت توں مبرا ہک شاہر ہے) موت دا ہیلک تھی سگدے۔

ڈو: اوہ لونکا کوں دیوتا بنا چھوڑن پر اینویں کرن نال انہاں کوں لونی شاہر (جیندا کوئی دھرم نئیں) اچ ماہنو نکڑا اتے اوندا پربھو پرم تھی ویسی۔

لونی واس انہاں ڈوہائیں آپشنز کوں ہک پاسے کر ڈیندن اتے لونکا دی گول کوں دھاڑیلیں دی دھاڑ اگوں اپنی ڈھال بنا گھندن۔

لونی واس موت تو ں انکار کریندن اتے جنگ دی شکل وٹا گھندن ۔

ہن موت ہک قصہ ہے اتے جنگ ہک ناٹک جیہڑا کہیں قتلام متوں کھیڈیا ونج سگدے۔لونی واس ناٹک لام راہیں فرنگی کولونیل دھاڑیلیں کوں، عرب دھاڑیلیں کوں ، افغان دھاڑیلیں کوں جھلیندن اتے ناٹک راہیں ، قصے راہیں ہر اوں بلیف سسٹم توں انکار کر ڈیندن جیہڑا جنگ کوں رومانس بنا تے اگونہا کریندے، جیہڑا موت کوں نارملائز کریندے۔

ارتھ ایندا ایہہ تھیا بھئی لون دا جیون گھر سب کانٹینٹ دے ہر اینجھے دھارمک، اساطیری اتے متصوفانہ بیانیے توں انکار ہے جیہڑا جنگ اتے موت کوں سیلبریٹ کریندے۔۔۔اونکوں نارملائز کریندے۔۔۔۔

توڑے جو اوہ رامائین ہووے یا وت مہا بھارتا۔۔

کارن ایندا بہوں سادہ ہے کیوں جو جنگ کوں وڈا بنا تے پیش کرن اصل اچ جنگ دے جیتندر کوں وڈا بناون دا آہر ہے۔

گریٹ بناون دا آہر ہے۔

لون دا جیون گھر گریٹ نس دا عظمت دا انکار ہے کیوں جو ایہہ گریٹ نس ای ہے جیہڑی مقامی ماہنو دے ہینپ دی بائینری بندی ہے اتے اونکوں ہمیش کیتے ہینا راہون تے مجبور کریندی ہے۔

لون دا جیون گھر۔۔۔سب کانٹینٹ دے کاسٹ سسٹم توں انکار ہے۔۔۔

ایندی ہک دری جیندے تری مورتی دی تروٹ دا ذکر ہے، ضرور پڑھو۔

تری مورتی ترٹدی ہے اتے شو مہاراج دے دیوتا توں ماہنو بنن دا پندھ شروع تھیندے۔ شو سندھ دے ہینیا نال جڑدے اتے اتھاں دے کاسٹ سسٹم اچ باہمن ، عرب /افغان اتے فرنگی دھاڑیلیں دی گٹھ جوڑ کوں ایکسپوز کر ڈیندے۔

لون دا جیون گھر اساڈے یکے اتحاس توں انکار ہے۔

ایہہ کہانی اوں اتحاس دی نفی ہے جیہڑی ایشور(طاقتور) لکھی ہے اتے ہینہہ پاروں لونی واس کہیں اینجھی تاریخ کوں نئیں منیندے جیندا لکھن ہار توپ، تفنگ اتے بندوق نال اونکوں نافذ کریندے۔

لون دا جیون گھر آپ تاریخ سازی ہے۔ ایہہ اتحاس کاری ہے۔

لونی دا اتحاس اوہ ناٹک ہے جیہڑا مقامی بھاشانواں اچ کھیڈیا گئے۔ ایندے سارے کردار تل دے حق اچ ہن ۔

لون دا جیون گھر اساڈی ساری اساطیر توں انکار ہے۔

اتے لون دا جیون گھر آپ ہک اسطور وی ہے جیہڑی ہک ماڈرن سینسیبلٹی نال خلق پئی تھیندی ہے۔

ہِیں اساطیر اچ نیچ ملیچھ تریمتیں( اوہ آہدن ناں جو تریمت اساڈے مردانہ سماج اچ اوہ جات ہے جیہڑی نیچاں توں نیچ رکھی گئی ہے) اتے ہینے ڈاڈھیاں دے ڈڈھپ کوں نویں سروں سمجھدے پئین۔

نیچ ملیچھ تریمتیں اتے ہینے ڈاڈھیاں دے وار کرائمز کوں معاف کریندے پئین اتے آہدے پئین بھئی ہن منصف انہاں دی بنیل اساطیر ہوسی۔ نروار ہن انہاں دا قصہ کریسی۔ فیصلہ ہن انہاں دے ناٹک راہیں تھیسی۔

لون دا جیون گھر واقعی اوہ ناول ہے جیہڑا پڑھاکیں کیتے ہک ناولٹی گھن تے آئے۔

ہِیں ناول اساڈے آرٹ اچ، نیٹو آرٹ ہک نویں فلیور(ذائقے) دا وادھا کیتے۔

تہاکوں سبھ کوں مبارخ تھیوے جو لون دے جیون گھر اساں سرائیکیں کوں اوہ موہری قوم بنا ڈتے جنہاں اپنے پوری شعور نال جنگ دی دھاڑیل دی ہر جمالیات توں ہر رومانس توں ہر جواز توں ہر تاویل توں اتے ہر بلیف سسٹم توں انکار کر چھوڑے۔

امید ہے اساڈیاں ہماسائی قوماں وی ہِیں انکار اچ اساکوں فالو کریسن۔