میک بُک” وچ "سرائیکی فونیٹک کی۔ بورڈ” بݨاوݨ دی کہاݨی۔۔۔مشتاق گاڈی

کڄھ مہینے پیلھوں میں ایپل دی میک بُک گیدھی تاں ہک عجیب جہیں سمسیا وچ پئے گیم۔ پراݨے لیپ ٹاپ دے ونڈو مائیکرو سافٹ وئیر وچ تاں سئیں رضوان عطا دے تھورے نال سرائیکی فونیٹک کی بورڈ بہوں مُدت دا انسٹال ہئی تے میں اوندے وچ سرائیکی لکھدا رہندا ہم۔ سرائیکی دے ایں فونیٹک کی۔ بورڈ دی مدد نال میں کئی "سنڄاݨ جرنل” ٹائپ کیتے تے اوندی ڈیزائینگ کر کنیں چھاپے۔
میک بُک دے آوݨ نال سرائیکی وچ لکھݨ تے چھاپݨ دا مسئلہ تھی گیا۔ ویب کنیں کئی لنک ڳولے جو متاں سرائیکی کی ۔ بورڈ انسٹال تھی ونڄے تے میݙا کم چل پووے۔ جݙاں کئی سوبھ نہ تھئی تے وت سئیں رضوان عطا نال رابطہ کیتا۔ رضوان عطا سئیں مشورہ ݙ تا جو اساں میک بُک کیتے سرائیکی دی اپݨا کی۔ بورڈ بݨاؤ۔
پچھلے ݙو ݙیہاڑے ایں کم وچ لگے۔ اساں زوم ایپ دے وسیلے سکرین شئیرنگ کر کنیں ایں کم وچ جُپے ریہے۔ اساں حوالے نال جیڑھا پروسیجر فالو کیتا، اوندی تفصیل کُجھ ایں ہے:
1. پیلھے اساں یو۔کے۔ لیلے (Ukelele) دی ویب سائٹ گئے جیڑھی جو مقامی زبانیں دے کی۔ بورڈ بݨاوݨ کیتے ورتیندی ہے۔ ایندے وچ پیلھے کنیں ݙ تے کی۔ بورڈ کوں ماڈی فائیڈ کیتا ویندے۔
2. یو۔کے۔لیلے دی ایں ویب سائٹ ونڄ کنیں اساں خالی کی۔ بورڈ داؤن لوڈ کیتا۔
3. وت اوں خالی کی۔ بورڈ وچ اساں اردو دا مہیا کی۔ بورڈ امپورٹ کیتا۔
4. اوں اردو دے کی۔ بورڈ وچ اساں سرائیکی ٻولی دے وادھوں اکھریں (ٻ۔ ݙ ۔ ڄ۔ ڳ۔ ݨ) کوں کاپی کر کنیں، شفٹ دٻا کنیں پنج انجو انج جاہیں اُتیں رکھیا۔ جیویں جو ݙ کوں اساں ایف دی کی وچ شفٹ دٻا کنیں پیسٹ کر چھوڑیا۔ اینویں بی دی کی وچ شفٹ دٻا کنیں کاپی شدہ ٻ دا اکھر پیسٹ کر چھوڑیا۔
5. جݙ اں اے کم تھی گیا تاں وت ایں ماڈیفائیڈ کی ۔ بورڈ کوں ڈیسک ٹاپ تے سیو کیتا۔
6. میک بُک سسٹم ڈرائیو وچ ونڄ کنیں "لائبریری فولڈر” ڳولیا تے اوندے کی۔ "بورڈ لے آؤٹ” وچ اوں ماڈیفائیڈ کی۔ بورڈ دی کاپی شدہ فائیل پیسٹ کر چھوڑی۔
7. اڳلے مرحلے وچ میک بُک دے "سسٹم پریفرنس” وچ ونڄ کنیں "کی۔ بورڈ اِن پُٹس” کوں کھولیا۔ اوندے وچ "ایڈ” دی کمانڈ ڈتی جو او سرائیکی دا ماڈیفائیڈ کی۔ بورڈ دا اضافہ کروں۔ پر اوندے وچ ساڈے ننویں ماڈیفائیڈ کی۔ بورڈ دی فائل ای نہ نظرے۔
8. چھیکڑ وچ سر کھپاوݨ نال ڄاݨ تھئی جو او اردو دے کی۔ بورڈ دے اندروں ہے۔ جݙ اں اردو دے کی، بورڈ کوں کلک کیتا تاں او ماڈیفائیڈ کی۔ بورڈ "اردو کاپی” دے ناں نال مل ڳیا۔ اوندے اُتیں کلک کرݨ نال سرائیکی دے فونیٹک کی بورڈ دا اضافہ تھی گیا تے مائیک بُک دے اُتوں کھٻی پاسیوں بیٹری دے آئیکن یا نشان نال انگلش، اردو تے سرائیکی دے انج انج نشان ہیٹھوں اُتوں آ ڳئے۔
ایں سارے پروسیجرز کوں فالو کرݨ دے بعد میں سرائیکی وچ اے پوسٹ کمپوز کیتی جو تہاݙ ے نال شئیر کراں تے جے کوئی ایں پروسیجرز کوں فالو کر کنیں "میک بُک وچ "سرائیکی فونیٹک کی۔ بورڈ ” دا اضافہ کرݨ چاہوے تاں اونکوں مد د مل ونڄے۔

اے وی پڑھو: