ضلع راجن پور دے سرائیکی قومی سنجانڑ دے تاریخی 5 وڈے ناں۔۔۔اکبر ملکانی

مرحوم صوفی تاج خاں گوپانگ۔مرحوم کامریڈ ملک منظور احمد بوھڑ۔مرحوم استاد نزیر فیض مگی۔مرحوم سردار کریم نواز خاں کورائی۔مرحوم کامریڈ ملک عبدالکریم ڈمرہ۔ جیرھے ساڈے قومی سنجانڑ دے تاریخی اور سنجاپو ناں ان۔

جنہیں آپڑاں مکمل جیونڑ سرائیکی قومی تحریک کوں ڈے کیں تاریخ وچ سر اے فہرست اپڑیں ناں محفوظ کروا چھوڑیئے۔

دوستو جیرھے لوک قومی تحریکیں واسطے کم کریندن۔قوماں وی انہیں کوں کڈاہیں نئیں بھلدیاں۔تاریخ وی انہیں دی شکر گزار رہندی اے۔

اے 5 مرحومین رہنما اپڑیں وخت ویلھے دے بہوں وڈے قد آور ناں ان۔جنہیں اپڑیں اپڑیں بساط دے مطابق قبر دے ویندیں تک قومی تحریک واسطے کم کیتے۔قوم انہیں کوں آج سلام پیش کریندی اے۔اور کریندی رہسی۔اے او لوک ان جنہیں اپڑیں زندگی دا ہک لمحہ وی ضائع نئیں کیتا۔اگر کوئی انہیں دے عمل۔فعل۔کردار۔گفتار۔محنت مشقت تیں تھوڑی جیہیں ریسرچ کرے چا۔ہک ہک رہنما تیں کئی کئی کتاباں لکھیاں جا سگیدین۔اور ضرور لکھیسن۔اے ناں تاریخ دی امانت ان۔تاریخ وی ہنائیں کوں یقینن یاد رکھسی ۔جیرھے قومی تحریکیں واسطے مکمل سچے جذبیں نال کم کریندن۔

وستی گاڈی تونسہ کنیں گھن وستی گھمن لنڈیں تک۔وستی گھمن کنیں گھن بنگلہ کورائی تک۔بنگلہ کورائی کنیں گھن وستی بوھڑ چراغ شاہ تک۔وستی بوھڑ کنیں گھن مہریے الا تک۔مہرے آلے کنیں گھن فاضل پور راجن پور تک اے کوئی تھوڑا سفر نئیں بلکہ قابلی ککریں دے چھتے کنڈیں دا سفر اے۔بیشک ایں چھتے ککریں دے کنڈیں دا سھرا کریڈٹ مرحوم استاد فدا حسین خاں گاڈی دے سر اے۔مرحوم فدا حسین خاں گاڈی نیں نیک نیتی نال جیرھی تحریک دا وستی گاڈی تونسہ کنوں اپڑیں گھر الیں لوکیں دی رائے نال سر تیں پوتڑی بدھ جیرھا اوکھا سفر شروع کیتے۔او انہیں دے اندرو دا سچ ھا۔مرحوم استاد فدا حسین خاں گاڈی اپڑیں دھن وچ لگا تار جو ٹریئے۔ ول استاد صاحب کوں آپڑاں گھر بار بھل گئے۔رڑھ ھئی رہیندا گئے۔توں شاکر ڈیوا بال کیں رکھ۔ھوا جانڑے۔خدا جانڑے۔دے مصداق چل سو چل۔پاندھی ٹردا جل۔پاندھی ٹردا ریہے۔پاندھی پیدل پندھ دا کجھ بھائیوال میں وی ریہاں۔جیرھا میں اپڑیں واسطے بہوں وڈا اعزاز سمجھداں۔بحرحال قافلہ بنڑدا گئے۔قافلہ اینجھا بنڑیئے۔ہرہک وسیبی استاد فدا حسین خاں گاڈی بنڑ گئے۔فدا حسین خاں گاڈی چھڑا ہک ناں نہ ھا۔فداحسین خاں گاڈی ہک تحریک دا ناں بنڑ چکا ھا۔پہلے پہلے استاد فدا حسین خان گاڈی نیں لوک سانجھ دے پلیٹ فارم توں سرائیکی تحریک کوں شوں بھوں ڈتی ھئی۔استاد فدا حسین خاں گاڈی نیں جیرھی رڑھ چھٹی۔جیرھی رات ڈیہنہ محنت کیتی۔اومحنت دی کاؤ سکولیں کنوں ٹردی کالجیں وچ پجی۔کالجیں کنوں یونیورسٹیں تک پجی۔یونیورسٹیں کنوں قومی سیاسی جماعتیں وچ جڈاں پجی۔تڈاں پچھوں ہک مظبوط قافلہ تیار تھیا کھڑا ھا۔پاندھی انتھک کم جو کریندا رہ گئے۔تھکیڑے ھن ۔پاندھی کوں سکون دی ڈاڈھی ضرورت ھئی۔سکون صرف اگلے جہان مل سگدا ھا۔پاندھی نیں ڈوجہانیں دے بادشاہ کوں عرصہ گزاری۔ اپیل کیتی۔میں جیرھی رڑھ رادھی او پک تیں تیار تھی گئی اے۔میں تھکا تیں کئینی۔مگر میکوں پر سکون،سکون دی ضرورت اے۔ڈو جہانیں دے باد شاہ نیں پاندھی دی اے عرضی ارداس درخواست منظور کر گھدی۔یقینن پاندھی ہنڑ مکمل سکون اچ ھوسی۔پورا وسیب آوندی رادھی رڑھ اے۔ اولاد اے۔ول پاندھی دی اولاد ڈاڈھی حاظر حیا تھئی اے۔جنہیں پاندھی دے سفر کوں کانڑاں نئیں تھیونڑ ڈتا۔انہیں انویں دا انویں سفر جاری رکھیئے۔اور اوھو سفر آج تئیں ونج ویندڑ اے۔ڈسیندن مونجھ ڈاڈھی اوتری شئے ھ۔مونجھ مونجھ اے۔ پاندھی پیر او مرشد جو ھا۔ مونجھ ھئی۔کئی لوک مونجھ برداشت نہ پئے کر سگدے ھن۔گالھیں بھا بھج پئین۔جیویں جیویں جینکوں پاندھی مرشد دی مونجھ اندی گئی اے۔او انویں بلا خوف و خطر ٹر دا گئے۔انہیں وچ حمید اصغر شاہین۔سرور کربلائی۔غلام حر خاں کندانی۔بیرسٹر تاج لنگاہ۔۔ صوفی تاج گوپانگ ۔کریم نواز کورائی۔استاد نزیر فیض مگی۔صادق خاں بزدار۔شمیم عارف قریشی۔ملک منظور بوھڑ۔ظفر خاں لنڈ۔کامریڈ عبدالکریم ڈمرہ۔عبداللھ عرفان۔ملک مشتاق سامٹیہ۔شوکت مغل۔منیر دھریجہ۔اسد لنگاہ۔انیس دینپوری۔انیس شاہ جیلانی۔استاد اعجاز۔اکبر مخمور۔احمد خاں طارق۔شاکر مہروی۔قیس فریدی۔حافظ سہیل۔رضو شاہ۔صابر چشتی۔پروفیسر نواز صدیقی۔فیض فقیر۔بے لوک وی ڈھیر ھوسن۔جنہیں دا میکوں پتہ کئینی۔راند رس پئی اے۔گال ٹر پئی اے۔جھیڑا ہنڑ ونج ویندڑ اے۔اپڑیں اوپریں دا فرق ضرور ھونونڑاں چاہیدا اے۔پاندھی اہدا ھا۔لاھور انج اے۔ملتان انج اے۔پاندھی دی گال ہنائیں کوں وی چنگییں درھاں تیں سمجھ آئی کھڑی اے۔اساں اہدوں بھرانویں دا فیصلہ بھرانویں الی کار تھیونڑاں چاہیدا اے ۔گال گھرو باہروں نئیں ونجڑیں چاہیدی۔نہ تاں شر تھیسی جھیڑا تھیسی۔جگ جہان تماشہ ڈیکھسی۔جڈاں رنجیت تیں پاندھی امڑیں سامھڑیں اوسن۔ول گال قبریں تک پئی ویسی۔اساں توھاڈے کولھو کہیں شئے دا ہک انچ وادھو منگوں۔تساں نہ ڈیوو۔چلو تساں ساڈے جانی مالی نقصان تاں جیرھے وی کیتن۔او وی توھاکوں معاف کریندوں۔لیکن ما مٹی دی حدود قیود جغرافیئے دا فیصلہ ہنڑ ہر صورت کرنڑاں پوسی۔ ہنڑ ساڈی پوری ہک نسل جوان تھی چکی اے۔ایہا توھاڈی ہٹ دھرمی معاملہ بے پاسے پیا ویندے۔جیندا توھاکوں ادراک آی کئینی۔ساڈا فرض ھا توھاکوں سمجھا ڈیونڑ۔اگو توھاڈی اپڑیں مرضی اے۔ونجو صلاح کرو۔ولدی ڈیوو۔نہ تاں وت۔۔۔۔۔۔۔