قصہ قصولی۔۔۔سعدیہ شکیل

سرائیکی عوامی سنگت دے ہک سڄاک کارکن ادا ملک اکبر دا مکاݨی کٹھ انہاں دے آبائی شہر خان پور وچ رکھݨ دا فیصلہ کیتا گیا ۔ہیں دوران ادا ظہور دھریجہ سئیں سرائیکی عوامی تریمت تحریک کوں خصوصی طور تے دھریجہ نگر آوݨ دی دعوت ݙتی ۔انہاں نہ صرف دعوت ݙتی بلکہ انہاں سرائیکی تریمت کنونشن، سرائیکی عوامی تریمت تحریک دے اعزاز وچ رکھیا ۔۔۔اساݙے کیتے ٻہوں خوشی تے ماݨ دی گالھ ہی ۔

تیاریاں شروع تھیاں تاں ادا اسلم رسول پوری سیئں دی طرفوں وی سنیہا آیا جو انہاں دی طرفوں وی دعوت ملی ہے ۔

ادا اسلم۔رسولپوری جگ مشہور شخصیت ہوݨ دے نال ادا نزیر لغاری دے پراݨے سنگتی وی ہن

جمعرات 21 اکتوبر کوںسرائیکی عوامی سنگت تے سرائیکی تریمت تحریک دا قافلہ روانہ تھیا۔ ݙوجھے ݙینہ 22نومبر دی سویر خان پور پر اچ ادا سئیں رانا نعیم ادا عثمان طاہر ادا ملک سجاد دا نذر عباس تے ٻیے ۔ݙھیر سارے بھیراواں نے پرجوش استقبال کیتا

ادا میاں عثماں طاہر ۔دے گھر میاں ہاوس وچ اساݙے کیتے بطور خاص رہائش دا انتظام کیتا ڳیا ہیی ۔نرہان کرݨ دے بعد ادا نزیر لغاری سئیں دا حکم۔ملیا جو تھوڑی دیر تائیں رسولپور روانہ تھیوݨے خیر گھنٹے بعد ادا نذر عباس سئیں جیڑھے جو خان پور وچ بول دے نمائندہ وی ہن انہاں دی کار وچ ادی عابدہ بتول ادی نینا میں اتے ادا نزیر لغاری ۔تے باقی مارکہ ہک ہائی ایکس وچ روانہ تھیوسے کراچی توں خان پور تئیں دا سفر کر تے ولا فوری طور تے رسولپور دو سفر ٻہوں اوکھا پیا لگدا ہا پر جیں ویلھے اساں رسولپور پڄے تاں اتھاں اے ݙیکھ تے خوشی دی انتہا نہ ہیی جو جگ مشہور تے ہک مہاندرے قومی شخصیت سرائیکی وسیب دا ماݨ دا سئیں اسلم رسولپوری خود اپݨے پوتریاں دے نال دروازے تے پھولاں دے ہار چا تے استقبال کیتے منتظر ہن ۔کمال محبت تے شفقت دا اظہار کیتا گیا ہا

گھر دے اندر داخل تھی تے تاں اکھئیں سِم آیاں جو کمرے دے اندر سفیل تے پھولاں نال ویلکم لکھیا ہویا ہا اتے نال و نال ہر میز تے کمرے دے ٻاہروں وی پھولاں نال سجاوٹ کیتی ڳئی ہائی انہاں دے گھر انہاں دی دھیریں وچ ادی ثروت سحر جوکہ ہک ایڈوکیٹ ہن تے ڄام پور وچ انہاں دا چینمبر ہے پیا اوہک کامیاب وکیل ہن موجود ہن

۔انہاں دی ݙوڄھی دھی ڈاکٹر واصفہ جبین ایم اے اردو پی ایچ ڈی ہن تے اسسٹینٹ پروفیسر گورمنٹ ڈگری کالج ڄام پور اپݨے فرائض انجام ݙیندے پین۔ ڈاکٹر واصفہ جبین نے سرائیکی عوامی تریمت تحریک دیاں بھیݨیں کوں پھلیں دے ہار پوائے

انہاں دی نونھ وی موجود ہن او وی داجل وچ ہک اسکول وچ درس تدریس نقل وابسطہ ہن ۔ٻالاں وچ انہاں دیاں پوتریاں مسکان بختاور ۔ جینی تے ݙوہترہ فرجاد نجف وی موجود ہن ۔

اداسئیں اسلم رسولپوری دے گھر والیاں نال مل تے ایویں محسوس تھیندا پیا ہا جیویں ہمش توں ہک ٻے کوں ملیدے ہوؤں اتلا سہݨا اخلاق بہترین تربیت دی عکاسی ہیی اڄوکے دور وچ کوئی ݙو جماتاں پڑھ گھنے تاں آکڑیج تے ملدے پر اتھاں تا کمال دی میزبانی ہائی

ادا اسلم۔رسولپوری ہک ٻہوں وݙی شخصیت ۔ہن سرائیکی قوم دے سوجھواݨ دانشور تے مہاندرے نقاد ہن ۔پر انہاں نال مل تے ہک نواں احساس تھیا کہ اوہک نفیس طبعیت دے مالک وی ہن ۔اساں تقریبا ݙو گھنٹے ادا اسلم رسولپوری سیئں دے گھر رہیے ہک شاندار تے پرخلوص استقبال دے نال شاندار دعوت ݙوپہر دی مانی دا انتظام کیتا گیا ہا ۔ہک مہان ہستی نال ملاقات ہک خواب لگدی ہی ایں دوران ادی عابدہ بتول اتے ادا نزیر لغاری سیئں ادا اسلم رسولپوری سئیں کوں تحائف تے سندھی اجرک تے ٹوپی پوائی ۔ادا اسلم رسولپوری سئیں وی سرائیکی عوامی تریمت تحریک کوں تحائف دے نال اپݨیاں کتاباں دان کیتاں

اٗتہایں ادی کائنات ملک نال وی ملا قات تھیی او وی خاص طور تے سرائیکی عوامی تریمت تحریک نال ملݨ سانگے تشریف گھن آئے ہن ادی کائنات ملک پی ٹی وی دی ڈاریکٹر رپوٹر وی ہن اتے جمال جہاں دی چیف ایڈیٹر دے نال ہک سماجی تنظیم۔دی صدر وی ہن

ادی کائنات ملک دی کھلݨی ہسݨی طبعیت تے اخلاق دا اثر ہݨ توݨی موجود ہے پیا ویلا پر لا تے اݙدا ویندا ہا ۔اساکوں شام ادا ملک اکبر دے کٹھ وچ نہ صرف شریک تھیوݨا ہا بلکہ ادی نینا تے میں کمپیرنگ وی کرنی ہائی ایں سانگے ادا اسلم رسولپوری سئیں توں اجازت گھن تے واپس خان پور روانہ تھی گیوسے ۔۔کجھ لوگ ۔کجھ لمحے زندگی وچ ٻہوں یادگار تے قیمتی ہوندین بلاشبہ میں سمیت سرائیکی عوامی تریمت تحریک کیتے ادا اسلم رسولپوری جہیں ہستی نال ملݨ ہک خوبصورت دے یادگار لمحہ ہے ۔۔۔

اساں ادا اسلم رسولپوری دے دلوں تھوریت ہیں

جاری ہے ۔۔۔۔۔۔