سارےلہہ گئے آپ کنوں آپے ٹرن وا لئیں پوڑ ئیں تے چڑھ تے باب فہد دے اگوں باہر آ نکھتو سے دیگردے بعد بس وچ آن بیٹھوسے بس رڑھ پئی ولا کھڑتھئی ولا ٹرپئی ولا کھڑ تھئی ۔اکھ دنبلا کپاہ پنج ڈے ولا کچی ء ولا پنج ڈے ۔۔ بس کھڑدی ٹردی ، کھڑدی ٹردی چھیکڑ مکے شریف کنوں ۔باہر نکل آئی ڈینہہ جھکا تھینداویندے مغرب کنوں پہلے بس ولا ہک جاہ تے ونج تے وت کھڑتھئی ہن کیا تھئے اہدن مغرب وی پڑھ گھنواتھاں پتہ لگا جو بس وچ فنی خرابی ء، اساں محترمہ مرسڈیز دے پرانے عاشق ہاسے ایندی دھوڑ جھلن تے دھوڑ چھئی تھیون سانگے بنھیں بالیں دے نال چوکی کپر کنوں پوادھوں مائی دے فارم قادر آباد آکھڑدے ہاسے ۔۔۔جتھاں عفیفہ ممدوٹ اپنے بالیں نال فارم تے آندی ہئی سدھ پئی جو ساڈی مرسڈیزدے پچھلے پاسوں کھبے ٹائریں کوں بھالگ گئی ء ہک پھیتا سڑتے سواتھی گئے اتے بے کوں وی چنگاں پکڑی کھڑین مستری مرسڈیز دی بھا وسماون پئے گئین اساں اندروں باہر نہ آیوسے کیا سدھ ساکوں باہر کڈھن سانگے آپوں بھالائی کھڑے ہوون
پھیتے وٹائے گئے بس ٹرپئی سر سیٹ نال لایا اکھیں نوٹیاں اگھلا آگیا ۔۔۔ساڈھے آٹھ سال پہلے اساں قافلے دی شکل ءچ کوچ ءچ مکے کنوں مدینہ روانہ تھئے ہاسے اوں ڈینہہ تاریخ 22فروری ہئی تے اج 11 جولائی ءساڈے قافلے وچ مصری تے سوڈانی وی ہن پہلے کتھاہیں کجھ پچھیا گیا اج ہک جاتے جھل گھدونے ہر بندے کوں چنگی طرحاں ڈیکھ بھال تے اوندا پاسپورٹ واپس کیتونے ۔۔بس پہلے چلی ول رڑھی ول ٹرپئی ٹردئیں ٹردئیں ساڈی دید پہاڑی تے پئی کیا اے کوہ وداع ء ول دف وجن پئے گئے موسیقی ءچ ردھم آگیا مورپائلاں پاون پئے گئے نجار قبیلے دیاں چھوہریں تاریخ دی اوڈھروچوں لچھی کھیڈدیاں باہر نکل آیاں
اوڈیکھو چندر نکلدا پئے کوہ ندادی گھاٹی توں
تیڈے لکھ احسان ودئے سوہنا تیڈے لکھ احسان
جے تائیں تئیں ڈوسڈن والا
۔۔تیڈی ساری خلقت کوں تئیں پاسے سڈمریندارہسی
اساں تیڈا لکھ احسان منیسوں
اچی عزت سوہنی صورت والا سوہناسائیاں
جیڑھے سنہڑے چاتے توں ول آیوں ساڈے پاسے
اساں منیندوں جیڑھا کجھ وی آکھیں سوہنا اساں منیسوں
چن چوڈی دا نکھتا آندے
نور حضور دا اینجھا کھنڈریئے
تئیں توں گھٹء۔۔۔۔۔۔۔۔۔۔۔۔۔تئیں جیہاں سوہنا اساں نہ ڈٹھا کڈاہاں نہ
ڈٹھا کتھائیں نہ ڈٹھا
تیکوں ڈیکھوں ہاں تے اکھیں ٹھردین۔۔۔۔۔۔اساں اہل نجاردے اچے گھریں دیاں ساریاں چھوہریں ۔۔۔۔۔۔خوش ہسوں تہاڈےآون تے منوں منتاں من پیا اہدے ۔۔۔۔۔۔۔۔۔سوہنا ساڈے ویڑھے آوے
ساڈھے اٹھ سال پہلے ساڈے مصری سنگتی کوہ وداع دےنیڑے پجن دے بعد ڈاڈھے سرءچ اے گیت گاندے پئے ہن جیرھا 1420 سال پہلے حضور دی ہجرت دے موقح تے مدینے پجن تے اہل نجاردیاں چھوہریں گھروں نکل تے گاندیاں کھڑیاں ہن
نوں گھنٹے دے درگھے سفر دے بعد اساں مدینہ بس اسٹاپ تے آپجیوسے اڈے تے ہک بنگالی ساکوں ہوٹل دا راہ ڈکھالیا عشاءدے بعد مسجد نبوی کوں جندرے لگ ویندن ایں سانگے بے ڈینہہ دی سک سینے سمھال تے آپ وی سمھ پیوسے
سویلے چاروجے نندرا کھڑی ،تیار تھی تے ہوٹل توں باہر نکل آیم سامنے ثقیفہ ءہن اتھاں کوئی اجلاس نہیں پیا تھیندا اتھاں نہ جھیڑاء نہ جھیڑے دیاں چڑاٹھیاں سورن والے ۔۔نظردن ،اتھاں بیعت تھیون تے بیعت گھنن دا منڈھ بدھا گیاہا بیعت سانگے اینجھا زلھل کہیں نال نہیں کیتا گیا جینجھا سوہنے دے 51 سال بعد کیتا گیا، پہلی بیعت دے بعد خلاف دا عوامی انداز ڈھیر دیر نہ ٹریا،اتھاں پہلے خلیفے دی بیعت تھئی تے ایں بیعت کنوں 63 سال پچھوں عبدالمالک بن مروان پہلے خلیفے دے ڈوھترے کوں بیعت نہ کرن تے مدینے دے چوک تے ٹنگوا ڈتا ولا اتھاہیں بس نہ تھئی ڈوجھا ڈوھترا مصعب بن زبیردی مروا ڈتا گیا، آل امیہ نبی سائیں دے ڈوھترے کوں سنگت سودھا مرواون دے بعد پہلے خلیفے دے ڈوھترئیں نال وی اوہو سلوک کیتا۔
ساڈھے اٹھ سال پہلے میں ہوٹل مدینہ الاوبرائے وچ ٹکیاہم میڈے کمرے دی تاکی لمے تے کھلدی ہئی ساری رات تاکی کھلی رہ گئی میں لخطے لخطے ساوا روضہ ڈہدارہ گیم دل رجدی نہیں ڑا ، سک لہندی نہیں ہن اے ہوٹل ڈھہہ گئے آسوں پاسوں بیاں جاہیں وی اپنے تاریخ جغرافیے سودھیاں مٹی نال رل مٹی تھی گئین شاہ فہد مکے تے مدینے وچ بیعت اللہ تے نبی سائیں دی مسیت دے آسوں پاسوں ساریاں جاہیں مل گھن گھدیاں ول انھیں کوں سٹواتے بیت اللہ تے نبی سائیں دی مسیت کوں ڈھیر سارا ودھوایس ۔۔اہدن بادشاہ چھی ارب ریال دا خرچہ اپنے پلوں کیتا پر بادشاہ جیڑھی زمین مل گھدی ہئی اوندے وچوں ڈھیر ساری بچ گئی ہن ملٹی نیشنل کمپنیاں ایں زمین دا واتوں الایا مل پیاں ڈیندین ۔۔۔نبی سائیں دی مسیت دے اگوں 16 ویں درتے ہوٹل انٹرکانٹی نٹنل بنیا کھڑے ہرپاسوں ست ماڑا سریئے کھڑن ساڈھے اٹھ سال ۔۔۔پہلے اتھاں درگھیاں جاہیں کائناہن ہن ہرشے بدلی کھڑی ء مسیت دے اگواڑءچ کئی بنگلے بنیے نظردن اے بنگلے نہیں باہر تے بہن پانی وین تے وضو کرن دیاں جاہیں ،ن مسیت کئی ویہاں ایکڑیں وچ بنی کھڑی ء۔۔۔۔۔درکدا بھجد امسیت دے اندر پیٹھم تاں ڈوجھی رکعت پئی پڑھیندی ہئی نماز پڑھیج گئی تاں ٹردا ٹردا اصحاب صفہ دے تھلے دے پچادھوں ٹپیاں اگوں ریاض الجنتہء مسیت دے منبرتے نبی سائیں دے گھردے ادھوان والی جاہ بہشت داباغ ء
نہ کوئی جنت نہ کوئی دوزخ
بن گئیء کل کوڑ کہانی
روضے دے پوادھوں بی بی فاطمتہ الزہرہ دا گھرء اہدن اتھاں بی بی سائین دی چکی تے مشک اوئیں لاتھین ۔۔اساں کائنی ڈٹھی پرانے منبردے سجے پاسوں اچاجیہاں پکاچھاندن بنیا کھڑے اندروں چھاں دی لوڑتاں کائنی پر اتھاں مئوذن چڑھ تے بانگ ڈیندے سدھا اگوں ونج تے کھبے پاسے پھریجے تاں مسیت دی لمی کندھ تے نبی سائیں دے روضے دےادھوان ءچ ڈھیرساری جاہ پئی ء۔۔۔فجر دے بعد لوک اتھ آتے سرکار کوں سلام پئے کریندن رش ڈھیرءاساں وی رش ءچ رل گیو۔
ول آکھیس
لوکو گالھ سنو میڈی ہاں دے کنیں نال
میڈیاں گالھیں حیاتی ڈیسن
ڈیکھویاروظلم کنوں تساں پریں تھواہے بچ ونجاھے
ڈیکھو کہیں تے ظلم نہ تھیوے
میں پور پرانے مال پرانے عہد ےسارے منصب
اج پیریں ہیٹھ دپھینداں
جاری ہے
اے وی پڑھو:سینے جھوکاں دیدیں دیرے(7)۔۔۔ نذیر لغاری
جاری ہے۔۔۔۔
About The Author
اے وی پڑھو
اشولال: دل سے نکل کر دلوں میں بسنے کا ملکہ رکھنے والی شاعری کے خالق
ملتان کا بازارِ حسن: ایک بھولا بسرا منظر نامہ||سجاد جہانیہ
اسلم انصاری :ہک ہمہ دان عالم تے شاعر||رانا محبوب اختر