میں سرائیکی ہاں۔۔۔رفعت عباس

میں سرائیکی ہاں

میݙا دِل گھابر وچ
انہاں ساریاں قوماں کیتے
جیڑھیاں فوج تے
عدالت دی وَکیڑ وچ
جیڑھیاں اپنی حکومت دی
پَکڑ وچ آ ڳیاں ہِن

میں سرائیکی ہاں
کابل تے شیراز دی محبت وچ
دلی تے رنگون
استنبول تے سکندریہ
ٹمبکٹو تے روم
سپین تے چِلی دا سونہاں
لورکا تے پیبلو نرودا دا جاݨو

میں سرائیکی ہاں
میݙا کوئی سمندر نئیں
پر دنیا دے سارے سمندریں دا
آدر
ٻیڑیاں مچھیاں پکھیاں کوں سلام
کھاڑیاں دی چَنگائی
شاہ بندر ، کنبھاٹ کیتے پریت

میں سرائیکی ہاں
دنیا دی شاعری تے
ناول دا پَڑھاک
نیروبی وچ
اگوگی واتھنگو دا سنگتی
نائجیریا وچ چینو اچیبے
بھارت وچ ارون دتی رائے
رومیلا تھاپر دے نیڑے

میں سرائیکی ہاں
جنگ کوں روکݨ کیتے
موت کوں جھلݨ کیتے
کہیں کوں نموشی توں بچاوݨ کیتے
کہیں نال ٻَیہ کر دیر تئیں الواوݨ کیتے
کہیں دیاں گالہیں وچ ہَتھیں دے ہلاوے کوں
دیر تئیں ݙیکھݨ کیتے

میں سرائیکی ہاں
جہان دے ٻالیں کیتے
مِٹھیاں مچھیاں
جہان دیاں تریمتیں کیتے
نیلے تے چِٹے کنول
صاف پاݨی تے رنگلے
کپڑے
جیڑھی جیڑھی ویتر دے اوہ پاون

میں سرائیکی ہاں
ننگر پارکر دا عاشق
مِٹھی دی بارش دا دیوانہ
کاسبو دے موریں دا پریمی
صوفی فقیر دا ذاتی دوست
تھر دے ہرن تھر دی امانت

میں سرائیکی ہاں
امریکہ دے صدر توں نا خوش
بھارت دے وزیر اعظم توں ݙکھی
اپݨے وزیر اعظم توں بیزار
ہک نکی جہی خوشی دی ڳول وچ
جیڑھی ساریاں کیتے سانجھی ہووے

About The Author

dailyswail

See author's posts