ظفر لُنڈ دی ویل ۔۔۔ زلفی

ظفر لُنڈ ساڈا یار وی ہا تے ڈاڈھا فقیر ماھݨو ہا۔ڈاڈھے کوں ڈک ڈیوݨ اوندی گُھٹی اچ شامل ہا۔کتھائیں کہیں بے پھر دا مسئلہ ہووے ہا ظفر لُنڈ بغیر کہیں تعصب دے اوندے نال کھڑا تھی ویندا ہا۔اوں فقیر کوں زندگی اچ کئی واری سنجیدہ قسم دے تھریٹ وی ملے پر او کڈاہیں اپݨے نظرئے کولو اپݨے کم کولو پچھاں نہ ہٹھیا۔۔تریخ، سیاست تے ہیݨے قومیں دے حقوق بارے جتنا اوکوں علم ہا تے جیرھی اٹکل نال او کم کریندا ہا او اپݨے آپ اچ کمال ہوندا ہائی۔۔او انتہائی جمہوری تے ذہن تے ہر نقطہ نظر کوں برداشت کرݨ آلا انسان ہائی ۔کارپوریٹ سیکٹر دی بدمعاشی کولو گھن کے مقامی طاقت دے مرکز غیر جمہوری ماینڈ سیٹ آلیں لوکاں کوں او جمہوری جدوجہد دے ذریعے نتھ پا کے رکھدا ہا تہوں اوندے مخالف اوندے کولو خوف کھاندے ہن تے اوں خوف دے نتیجے اچ اونھاں طاقتاں انہاں کوں گھر دے باہرو سڈ کے گولی مار ڈتی۔

اوندے پُتر وی میڈے یار ہن تے اونھاں ایں ناقابل برداشت ڈکھ کوں اپݨی روح اچ اُتارا تے اپݨے اپݨے کم اچ لڳے رہیے۔۔اوندا ہیک پتر راول ایں ڈکھ کوں سوگھا کرݨ واسطے میوزک سکھݨ آلے پاسے لگا گیا تے میں سمجھیندا اے اپݨے بابا کوں آدر ڈیوݨ دا سب کولو شاندار طریقہ ہائی۔۔رات راول چاچو میکوں اپݨی ہیک ویڈیو بھیجی حے جیندے اچ او شاندار انداز اچ رباب وجیندا بیٹھے اوکوں سݨ کے ایویں عجیب جہیں ڈکھ تے محبت دا احساس تھائے۔۔ظفر تیڈی کِھل دا او بے ساختہ ٹھکارا کہیں موسیقی اچ، وسوں دی روح اچ، بہوں ساریں انسانیں دے دل اچ، کہیں آرٹ اچ ، کہیں کِھل اچ، کہیں ہنجھ اچ تے کہیں شعور آلے چیتے اچ اج وی گونجدا کھڑے۔۔تیڈے پُتر راول ایں ٹھکارے کوں آدُر ڈیندیں ہوئیں رُباب تیں ہیک دُھن بݨائی حے۔۔اوں دُھن اچ جیرھی چاشنی حے، جیرھا ڈُکھ حے تے جیرھا ردھم حے او تیڈے نانویں۔۔او ویڈیو تے رُباب دی دھن اج میں اپݨے یو ٹیوب چینل تیں چڑائیساں اُمید حے تُساں وی بہوں لطف اندوز وی تھیسو تے اپݨے اپݨے درد کوں آدُر وی ڈیسو۔۔

ویب ڈیسک

See author's posts