سیتا بچسی یا راوݨ؟۔۔۔زلفی

کہیں چنگے وقت ویلھے اچ ساڈا ہیک یار ہوندا ہائی بلال بُزدار۔بہوں خبردار جوان حے، لوک آھدن سرو بہوں تکڑا جوان حے۔ ہاٹھی کاٹھی وی تکڑی ہسی تے کم وی تکڑے تکڑے کریندے، چھوٹا موٹا ہتھ نئیں مریندا۔ سرائیکیں دے حقوق واسطے کہیں زمانے چنڳا بھلا ہاٻا راٻا لائی رکھدا ہائی، اڃکل ایویں چُپ چُپ راہندے پتہ نئیں کیرھی مُصیبت وات حے۔
پنجاب پولیس اچ روزی روٹی وی کریندے تے مُزاوریں دا وی یار حے، کیا کرے شودا اُنہیں دا ہمسایہ جو تھیا۔ بلال جیندا یار ہووے اوکوں ٻیا کیا چاہیدا حے ( ہوئے تُم دوست جس کے).
ساڈے ایں یار دی ہیک بہوں وڈی خوبی حے جو اے کہیں کہیں ویلھے یاریں تیں مُزاوریں دیاں چھرکاں کڈھوا گھتدے، عادت توں مجبور ہوسی شودا۔
ایندے اویں تاں مُحسن درحے ہن پر جیندی دل کولو عزت کریندے اوندا ناں ہیوے شکیل نُتکاݨی۔
شکیل نُتکاݨی بلا جوان حے۔ ونگھرے وال، گول گول منہ متھا، جیرلھے کھلدے ایویں لگدے جیویں مادھوری کھلدی پائی ہووے۔ ایندیں اکھیں کولو ہر ویلھے کمینی تے معصوم جہیں شرارت وٹیندی کھڑی ہوندی حے۔
گُزارے لائق صحافی وی حے لیکن صحافیں آلیاں عادتاں سرو کائینسی۔
فطرتا شُغلی بندہ حے۔ اوندی فیس بُک وال تیں ونجو تاں کوئی نہ کوئی شُغل میلے آلا پنگا پائی کھڑا ہوسی۔ کہیں ویلھے سرائیکی وسوں دے او ” پردھان تے مہان” سپوت، جیندے اچوں اکثر اے سمجھدن جو طاقت دا اصل سر چشمہ فوج حے تے اوندی چ اچ پہے کے او سرائیکی صوبہ بݨا گھنسن اُنہاں کوں ڈاڈھی توئے توئے وی کیتی رکھدے۔
ڳُلیاݨی قوم نال کوئی غضب ناک پیار کریندے تے بلال دے جگری یار رمضو تیں تاں بہوں ” مہربان” حے۔ مقامی نامہ نگار ہوٹل تیں آھدے بیٹھے ہن جو شکیل نُتکاݨی دی محبت دا ” بار” چوٹی آلے کڈاہیں نئیں لہا سڳدے۔ خاص کر اتھوں دے شاعر، صحافی تے دانشور بھاویں او مارکسی یا سرائیکی ہوون اونہاں کولو ایندا دھیان نئیں ہٹدا۔ ( دھیان نہ ہٹݨ اپݨے آپ اچ محبت دی بہوں وڈی انتہا حے).
جڳ مشہور محقق، دانشور، شاعر، لکھاری، یو ٹیوبر تے اُستاد سئیں منشا فریدی شکیل خاں دے بارے آکھے پیا جو اے بندہ کہیں سر پھرے عاشق آلی کار جیندے پچھو لڳ پووے تے اوندا ‘ کِریا کَرم’ کرکے ساہ گھندے۔ اوں اے وی آکھیے جو ایندی مُحبت دی کاتی تلے جیرھی قوم ، قبیلہ یا بندہ آندے او ساہ نئیں گھن سگدا۔ اے وچار منشا فریدی دے ہن ایندے نال میں اُکا سہمت کائینی۔
میں تاں سمجھینداں جو اے ڈان اخبار دا صحافی شودا ہیک فقیر ماݨہوں حے، جیرھا کہیں دی تیری میری اچ نئیں پوندا ٻس اپݨی دُنیا اچ مگن راہندے۔ ایندی چھوٹی جہیں دُنیا اچ پیار، مزاح تے یاری لاوݨ توڑ نبھاوݨ دیاں رمزاں دی راند رسی راہندی حے۔
میڈا تاں جگر حے ، ہیک ڈیہیں میں مُلتان ڳیا ودا ہامیں تے ایکوں آکھے میڈی تہاڈے نال ملاقات دے شرف دی تمنا حے کُجھ وقت ساکوں دان کر کے ساڈی عزت ودھاؤ ہا چا۔آکھس تیکوں ڈسینداں ٻس ایویں تھوڑا جیہاں صبر کر پر ساڈی شومئی قسمت جو اساں ہالی تک ” زُلف کے سر ہونے تک” آلی کیفیت اچ ۔۔۔۔۔۔۔۔اڃ تئیں ایندا راہ پھلیندے کھڑے ہیں۔ صدقے ونجاں ایندی ایہاں راند تاں حے جیکوں رسائی رکھدے جیرھی میکوں تاں ڈاڈھی بھاندی حے۔
جوان من بھاوݨا تے چسولا حے تہوں چسولاں تے من بھاوݨاں ڳالہیں تے لوک گولیندا رہ ویندے۔
آھدن چردا ہیک ڈیہیں پکڑیج پوندے تے ایندا زیادہ تر چرا چوٹی آلے پاسے ہائی پر اجکل اے ٻہوں وڈے سنکٹ اچ پھس ڳئے۔ چوٹی دے بلوچیں، دانشوریں، شاعریں ، لکھاریں تے محققین تیں ہتھ صاف کرݨ دے بعد اُتھوں دے مُزاوریں دو اپݨی محبت دے توپیں دا رُخ کیتس تاں مُزاور اپݨے پیریں فقیریں دی ارواح دے توسط نال ڈاریکٹ اللہ سائیں کوں شکایت لا ڈتی حے جو اللہ میاں ایکوں بھرشٹ کر ڈے ، ایں کولو پہلے جو ہتھ دھو کے اے ساڈے پچھو پووے۔۔ ایڈو شکیل وی تاں شکیل حے او وی اولیا کرام دی دھرتی تیں وسدے تے میکوں لگدے اے وی اُتھوں دے پیریں فقیریں کوں اپݨی پارت شارت تاں ڈتی کھڑا ہوسی۔ ہݨ ہیک پاسو مُزاور ہن تے ٻئی پاسوں ساڈے یار شکیل دی او کہاݨی حے جیرھی مُزاوریں کوں سُرکار کریندی اڳاں تیں ٹُردی پائی حے۔میکوں ایویں لگدے جیویں جو اے ہݨ آوکھیاں نال ونڃ پھسے تے آوکھا تھیسی۔ کجھ ڈیہاں بعد اے لائی ودا ہوسی ” جو اے گُستاخ اکھیاں کتھے جا لڑیاں”. کیوں جو مُزاوریں آکھ ڈتے اللہ دے قہر کولو ڈر تیکوں اینجھی بد دعا ڈیسوں بچسیں کائینا۔
ڈیکھو ہݨ راوݨ بچدے یا سیتا بچدی حے۔۔۔

About The Author

ویب ڈیسک

See author's posts