بھٹو کا قتل حیران کن نہیں تھا۔۔۔ عثمان کریم بھٹہ

شملہ معاہدہ کے وقت اندرا گاندھی نے دو میں سے صرف ایک چیز چُننے کی پیش کش کی۔
1ـ جنگی قیدی یا
2ـ جنگ میں ہارا ہوا مغربی پاکستان کا رقبہ۔
پہلا آپشن زیادہ بہتر تھا۔ اس سے عوامی پذیرائی اور مقبولیت میں مزید اضافہ ہوتا۔ لیکن اس وقت اندرا سمیت پوری دنیا کی آنکھیں حیرت سے پھٹی کی پھٹی رہ گئیں جب چئیرمین بھٹو نے دوسرا آپشن منتخب کیا۔
بی بی نے بے چین ہو کر پوچھا… بابا جانی یہ کیوں؟
بولے "زمین کے لئے دوبارہ پریشر قائم نہیں کیا جاسکتا لیکن قیدی انسانی حقوق کا معاملہ ہیں بھارت کو بہر صورت واپس کرنا ہوں گے”۔

پھانسی کے فوراً بعد بھٹو کے ختنے چیک کرانے والے ضیاء کو جاوید ہاشمی نے اپنی کتاب میں لکھا ہوا وہ واقعہ تو ضرور سنایا ہوگا کہ جب ہاشمی اور بھٹو اکٹھے خانہ کعبہ کے اندر کھڑے ہوئے تھے اور ایک عربی نے بھٹو کو بتایا کہ اس وقت آپ جہاں کھڑے ہیں ٹھیک اسی جگہ رسولِ خدا ﷺ نماز پڑھا کرتے تھے۔ بھٹو یہ سنتے ہی گھبرا کر فوراً پیچھے ہٹ گئے کہ مبادا وہاں پیر نہ پڑ جائیں جہاں رسالت مآب ﷺ نماز پڑھتے ہوں۔ یہ عقیدت ہاشمی کے لئے تو حیران کن ہو سکتی تھی لیکن ضیاء جیسے سرد مزاج کو جسمانی معائنہ کرانے کی توہین سے نہ روک سکی۔

بھٹو کے لئے امریکہ جیسی سپر پاور کی گود میں بیٹھ کر اقتدار کے مزے لوٹتے رہنا زیادہ آسان کام تھا لیکن اپنی حکومت اور اپنی زندگی کو داؤ پر لگاتے ہوئے روس کو زمینی حقیقت سمجھنا، فرانس سے ایٹمی پروگرام پر معاملات کرنا اور چین کے ساتھ اچھے تعلقات استوار کرنا، ایسے فیصلے تھے جو سامراجی قوتوں کے لئے حیرت ناک نہیں بلکہ تشویش ناک تھے۔

بھٹو کا قتل بالکل بھی حیران کن نہیں تھا البتہ بھٹو کا قتل نہ ہونا زیادہ حیرت کا باعث ہوتا۔ ضیاء کی فطری بزدلی سے زیادہ بھٹو کے قتل کا سبب شاید یہ بھی تھا کہ بھٹو سیاست کو تو ڈرائنگ روم سے باہر نکال لائے لیکن اس ڈرائنگ روم کو تالا لگانا بھول گئے۔ سیاست ہاتھ سے نکل جانے کے بعد "ڈرائنگ روم والوں” کے پاس اب "سیاست” ہی نہ رہی تو پھر "سازش” بچ گئی.. وہ بدترین سازش کہ جس نے اس قوم کے مستقبل کو سولی پر لٹکا کر تاریکی کو مقدر بنا دیا۔

صدیوں تک سیانے بھٹو کی شہادت کے اسباب ڈھونڈتے رہیں گے جبکہ ہم اس کے نتائج بھگتتے رہیں گے۔