ناٹک دا باغیچہ
ہِک مُد پچھوں کھِڑ دے پِن
نقلیاں دیاں ٹوپیاں دے پھُل
ایہہ دور تاݨیں خیمیاں دے گیندے
ہوا ہک چَلدی پئی ہے پھڳݨ دی
یارات دے شو دیاں ٹکٹاں پیاں چلدیاں
پہلی پھیریں تریمت پئی کریندی اے
تریمت دا پارٹ
مُد پچھوں کِھڑدے پِن
نقلیاں دے نک دے گلاب
……………………………………………..
ایں شہر وِچ
ایں شہر وچ جمدِن
نرتکیاں ، شاعر ، صوفی
ایں شہر وِچ قالین ساݙے بݨدے ہِن ایرانی
ایں شہر وچ گھوڑے ساݙے دُرکدے ہِن عربی
ایں شہر وِچ محلے ساݙے وَسدے ہِن افغانی
ایں شہر وچ انگریزاں دے شہیداں دے مُنارے
ایں شہر وچ اٹلی دے پُھلاں دی پنیری
ایں شہر وچ جاپان دی سوداگری دا بھُوت
ول وی ایں شہر کوں ڳنڈھ گھندِن
نرتکیاں ، شاعر، صوفی
…………………………………………………
ݙو ترے کم
اساں اِتھاں
ݙو ترے کمیں کیتے آئے
پہلا کم
لولیاں دے باغ وچ
اللہ کوں ملݨاں
لال کوں ملݨاں
ٻال کوں ملݨاں
ݙوجھا کم
ماٻولی دے باغ وچ
قصّے کوں ملݨاں
گاوݨ کوں ملݨاں
ساوݨ کوں ملݨاں
تریجھا کم
پہلے ݙوہیں کم
وَل وَل کرݨے
…………………………………………
بائےسکوپ
ہُݨ تاں بھانویں یاد نہ آوے
اندرنَوں ݙاہ تاکیاں ہَن، یا
قِصّے پچھوں قِصہ
اللہ دا گھر ݙیکھو
رسول دا روضہ ݙیکھو
براق ݙیکھو
دریائے نیل ݙیکھو
نَوں مݨ دی دھو ٻݨ ݙیکھو
مُدتاں پچھوں
کہیں اساکوں ہکل ݙے تے آکھیا
اونکوں ݙیکھو
اوہ اِتھاہیں ڳلی تہاݙی رہندے
………………………………………………
وستی
کیلیاں دیاں پن چکیاں
وستی دے ٻاہروں آکھو چلدیاں پیاں
تے کندھاں اُتے ساوے نیلے ٹِکَّے
ٻہوں پراݨے منتر ہَن وسرے ہوئے
ایہا جا ہئی
نواں نواں لوکیں حالیں رووݨ
سِکھیا
نواں نواں لُوݨ بݨاوݨ دا کئی حیلہ
ایہا جاہئی
پہلی پہلی موت دے کہیں جھاکے وِچ
اساں اِتھاں
لوکیں کوں ترسلا ݙیوݨ آئے ہاسے
……………………………………………
تریمتیں بارے
روز ڈہاڑی ڳالہیں
وݙکیاں دے اَکھاݨ
ٻہوں لُکانویں ٻول
سبھ پاروں مافی
ٻہوں سارے قصّے
ڈھڳ ساری شاعری
عُمراں دیاں جُگتاں
سبھ پاروں مافی
اساں ترےمتیں بارے
وادھو جو کرسُݨیا
وادھو جو اَلایا
سبھ پاروں مافی
About The Author
اے وی پڑھو
اشولال: دل سے نکل کر دلوں میں بسنے کا ملکہ رکھنے والی شاعری کے خالق
ملتان کا بازارِ حسن: ایک بھولا بسرا منظر نامہ||سجاد جہانیہ
اسلم انصاری :ہک ہمہ دان عالم تے شاعر||رانا محبوب اختر