سرائیکی ثقافت دا ڈینہہ۔۔۔ عباس ڈاہر

سرائیکی ثقافت
ثقافت کہیں وسبے دے لوکیں دے جیوݨ جوڳ ، ورت ورتاء، کھاڄ ہنڈھیپ تے خوشی غمی دے نیٹے دا سانجھا اظہار ہوندے۔ ثقافت کہیں وسبے دے لوکیں دا سانجھا ورثہ ہوندے۔
سرائیکی ثقافت تل وطنی لوکیں دے ہزاریں سالھیں دے وسب کنوں پھپھڑی ءے۔ سرائیکی ثقافت دیاں پاڑاں اتھوں دی مٹی، دریاویں، بیٹ ٻیلیں، تھل چترانگ، تے روہی راوے وچ ہن۔
ہزاراں ورہیاں پہلے سرائیکی وسوں تے دھرتی ماء دی پوجا تھیندی ہئی۔ دھرتی کوں ماء سمجھا ویندا ھا، اڄ وی احتراماً مسیت کوں مائی مسیت آکھیا ویندے۔ اے ھ سرائیکی ثقافت ۔۔۔
سندھ وادی دی تہذیب دا جݙاں عروج ہا تاں داݨے پھکے دے سانجھے بھنڈار ہوندے ہن جتھوں لوک اپݨی لوڑ موجب ان داݨا چا ویندے ہن تے پینہہ پکا کھمدے ہن ۔۔۔ اے ھِ سرائیکی ثقافت ۔۔۔
ہزاں سال بعد جݙاں سندھ وادی دے دھرتی ءِچ دفن شہریں دی پٹ پھرول کیتی ڳئی تاں اتھوں محنت پورہیئے دے اوزار لدھن ۔ تلواراں یا انسانی بربادی دے ہتھیار نئیں ملئے ۔۔۔ اے ھِ سرائیکی ثقافت ۔۔۔
اجتماعیت تے سانجھ دی سبھ توں وݙی نشابری سرائیکی جھمر ھِ جیندے وچ ہکے پڑ وچ ستر سال دا ٻڈھڑا تے ست سال دا ٻال رل تے جھمر پیندن ۔۔۔ اے ھِ سرائیکی ثقافت ۔۔۔
سرائیکی قومی تحریک وی دراصل ثقافتی تحریک ھِ ۔۔۔ سرائیکی تحریک دی اثر پذیری ایں توں ودھ کیا ہوسے جو سرائیکی دھرتی تے آوݨ والے مختلف رنگ نسل تے جغرافیے دے لوک تھوڑے عرصے بعد ایں دھرتی دے رنگ ءِچ رنگیج گئے تے انہاں ایں دھرتی دی زبان تے ثقافت کوں اپنا گھدا ۔۔۔ چھی مارچ دا ݙینہہ سرائیکی وسوں دی ثقافت دیاں ریتاں نال ڳانڈھے دا تقاضا کریندے۔
اکھیاں اڑسن دلڑیاں ٻکسن ، دھرتی دی تاثیر تے

About The Author

ویب ڈیسک

See author's posts