وزیراعظم عمران خان نال پشاور زلمی دے چیئرمین جاوید آفریدی، کپتان ڈیرن سیمی دی ملاقات
وزیر اعظم دی پاکستان دی اعزازی شہریت ملنڑ تے ڈیرن سیمی کوں مبارکباد
اسلام آباد ۔ 4 مارچ (اے پی پی)وزیراعظم عمران خان نال پشاور زلمی دے چیئرمین جاوید آفریدی، کپتان ڈیرن سیمی دی ملاقات بدھ کوں تھئی۔پشاور زلمی دے ہیڈکوچ محمد اکرم اتے بیٹنگ مینٹور ہاشم آملہ وی ملاقات اچ موجود ہن۔وزیراعظم آفس توں جاری بیان دے مطابق وزیراعظم عمران خان پاکستان دی اعزازی شہریت ملنڑ تے ڈیرن سیمی کوں مبارکباد ڈتی۔انہاں ڈیرن سیمی نال گالھ مہاڑ کریندیں ہوئیں آکھیا جو پاکستان اچ بین الاقوامی کرکٹ دی بحالی اچ تساڈا کردار تعریف دے قابل اے۔وزیراعظم جنوبی افریقا دے لیجنڈ بیٹسمین اتے پشاور زلمی دے مینٹور ہاشم آملہ کوں وی خوش آمدید آکھیا۔انہاں آکھیا جو میکوں خوشی اے جو پورا پی ایس ایل پاکستان اچ تھیندا پے اتے لوک بہوں خوش ہن۔
پاکستان اچ پولیو دا پورا خاتمہ حکومت دی پہلی ترجیح اے،حکومت کروناوائرس دے پھیلاﺅ کوں روکنڑ سانگے سارا زور لیندی پی اے، وزیر خارجہ شاہ محمود قریشی دی عالمی ادارہ صحت دے نمائندہ برائے پاکستان ڈاکٹر پلیتھا نال گالھ مہاڑ
اسلام آباد ۔ 4 مارچ (اے پی پی) وزیر خارجہ شاہ محمود قریشی آکھیا جو پاکستان اچ پولیو دا پورا خاتمہ حکومت دی پہلی ترجیح اے،حکومت کروناوائرس دے پھیلاﺅ کوں روکنڑ سانگے سارا زور لیندی پی اے۔اے گالھ انہاں عالمی ادارہ صحت دے نمائندہ برائے پاکستان ڈاکٹر پلیتھا نال گالھ مہاڑکریندیں ہوئیں آکھی جنہاں بدھ کوں وزارت خارجہ اچ انہاں نال ملاقات کیتی۔ ڈبلیو ایچ او دے نمائندہ آکھیا جوعالمی ادارہ برائے صحت پولیو دے خاتمے بارے پاکستان دی حکومت نال اپنڑاں تعاون بیا وی ودھا ڈتے۔
گزریل چھی سالیں دی نسبت اجوکے مالی سال اچ ترجیحاتی خرچے دے استعمال اچ ریکارڈ ودھارا تھیے،سال دے پہلے پنج مہینے اچ 87ارب اتے پچھلے صرف ترائے مہینے اچ 185ارب روپے دے ترقیاتی خرچے،ترقی دی رفتار اللہ دے فضل نال تکھے تھیندی پی اے، وفاقی وزےر منصوبہ بندی ،ترقی ،اصلاحات تے خصوصی اقدامات اسد عمردا ٹوےٹ
اسلام آباد ۔ 4 مارچ (اے پی پی) وفاقی وزےر منصوبہ بندی ،ترقی ،اصلاحات تے خصوصی اقدامات اسد عمر آکھیا جو گزریل چھی سالیں دی نسبت اجوکے مالی سال اچ ترجیحاتی خرچے دے استعمال اچ ریکارڈ ودھارا تھیے،سال دے پہلے پنج مہینے اچ 87ارب اتے پچھلے صرف ترائے مہینے اچ 185ارب روپے دے ترقیاتی خرچے،ترقی دی رفتار اللہ دے فضل نال تکھے تھیندی پی اے۔بدھ کوں ٹویٹر سنھیے اچ انہاں آکھیا جو اجوکے مالی سال دے پہلے اٹھ مہینے اچ ترقیاتی خرچے دا استعمال 39فیصد رہیے،ماضی اچ ایں دورانیہ اچ فنڈز دا استعمال ودھ توں ودھ 32فیصد ہئی ۔
وزیراعظم عمران خان دی صدارت اچ مختلف سرکاری اداریاں اتے املاک دی نجکاری دے عمل اچ پیشرفت بارے جائزہ اجلاس
اسلام آباد ۔ 4 مارچ (اے پی پی)وزیراعظم عمران خان دی صدارت اچ مختلف سرکاری اداریاں اتے املاک دی نجکاری دے عمل اچ پیشرفت بارے جائزہ اجلاس تھیا۔اے گالھ بدھ کوں وزیراعظم آفس دے میڈیا ونگ ولوں جاری بیان اچ ڈسائی گئی ۔
وزیراعظم عمران خان دی صدارت اچ خصوصی اقتصادی زونز بنڑاونڑ سانگے بورڈ آف پینل دا پنجواں اجلاس
اسلام آباد ۔ 4 مارچ (اے پی پی)وزیراعظم عمران خان دی صدارت اچ خصوصی اقتصادی زونز بنڑاونڑ سانگے بورڈ آف پینل دا پنجواں اجلاس جاری اے۔اعلیٰ سطح دے ایں اجلاس اچ سینیٹ اچ قائد ایوان سینیٹر شبلی فراز ‘ توانائی دے وزیر عمر ایوب ‘ وفاقی وزیر منصوبہ بندی اسد عمر ‘ وزیراعظم دی معاون خصوصی برائے اطلاعات و نشریات ڈاکٹر فردوس عاشق اعوان، وزیراعظم دے مشیر برائے خزانہ عبدالحفیظ شیخ ‘ مشیر تجارت عبدالرزاق داﺅد‘ وزیراعلیٰ خیبرپختونخوا ‘ وزیراعلیٰ گلگت بلتستان‘چیئرمین سرمایہ کاری بورڈ اتے صوبائی وزراءتیمور سلیم جھگڑا ‘ میاں اسلم اتے سینئر حکام شریک ہن۔
عدالتاں شہباز شریف دی ضمانت تے نواز شریف کوں باہر ونجنڑ ڈتے،او نی امدے پئے،پنجاب دی حکومت کوں شہباز شریف دی نااہلی سانگے عدالت ونجنڑاں چاہیدے،وفاقی وزیر فواد چوہدری دا بیان
اسلام آباد ۔ 4 مارچ (اے پی پی) وفاقی وزیر سائنس تے ٹیکنالوجی فواد چوہدری آکھیا جو عدالتاں شہباز شریف دی ضمانت تے نواز شریف کوں باہر ونجنڑ ڈتے،او نی امدے پئے،پنجاب دی حکومت کوں شہباز شریف دی نااہلی سانگے عدالت ونجنڑاں چاہیدے۔اے گالھیں انہاں بدھ کوں اپنڑے بیان اچ آکھی۔فواد چوہدری آکھیا جو وفاقی کابینہ نواز شریف کوں باہرلے ملک ونجنڑ عدالتی فیصلیاں دے مطابق رقم جمع کراونڑ نال مشروط ہئی۔
الیکشن کمیشن ’ اثاثہ جات دے گوشوارے جمع کراونڑ تے بئے چار ارکان دی رکنیت بحال کر ڈتی
سلام آباد۔ 4 مارچ:الیکشن کمیشن ’ اثاثہ جات دے گوشوارے جمع کراونڑ تے بئے چار ارکان دی رکنیت بحال کر ڈتی اے۔بدھ کوں الیکشن کمیشن ولوں جاری نوٹیفیکیشن دے مطابق خیبرپختونخوا اسمبلی دے اراکین نصیر اللہ خان، سید غازی غزن جمال اتے محمد اقبال خان دی رکنیت گوشوارے جمع کراونڑ تے بحال کر ڈتی اے۔
پارلیمنٹ ولوں غیر ملکی معہادے دی تصدیق بل 2018ءتے قائمہ کمیٹی دی رپورٹ پیش
اسلام آباد ۔ 4 مارچ (اے پی پی) ایوان بالا اچ پارلیمنٹ ولوں غیر ملکی معہادے دی تصدیق بل 2018ءتے قائمہ کمیٹی دی رپورٹ پیش کر ڈتی گئی اے۔بدھ کوں ایوان بالا دے اجلاس اچ چیئرمین قائمہ کمیٹی برائے قانون و انصاف سینیٹر محمد جاوید عباسی اے رپورٹ ایوان اچ پیش کیتی۔
دستور (ترمیمی) بل 2020 آرٹیکل 213 اچ ترمیم دے بل تے قائمہ کمیٹی دی رپورٹ پیش کرنڑ دی معیاد ودھاونڑ دی منظوری
اسلام آباد ۔ 4 مارچ (اے پی پی) ایوان بالا دستور (ترمیمی) بل 2020 آرٹیکل 213 اچ ترمیم دے بل تے قائمہ کمیٹی دی رپورٹ پیش کرنڑ دی معیاد ودھاونڑ دی منظوری ڈے ڈتی اے۔بدھ کوں یوان بالا دے اجلاس اچ چیئرمین قائمہ کمیٹی برائے قانون و انصاف سینیٹر محمد جاوید عباسی اے رپورٹ ایوان اچ پیش کیتی۔
ایوان بالا کھیڈاں اچ پاکستان ٹیماں دی ناقص کارکردگی بارے قائمہ کمیٹی دی رپورٹ پیش کرنڑ دی معیاد ودھاونڑ دی منظوری ڈے ڈتی
اسلام آباد ۔ 4 مارچ (اے پی پی) ایوان بالا’ ہاکی، کرکٹ، سکوائش، سنوکر اتے باکسنگ جیہی ھیڈاں اچ پاکستان ٹیماں دی ناقص کارکردگی بارے قائمہ کمیٹی دی رپورٹ پیش کرنڑ دی معیاد ودھاونڑ دی منظوری ڈے ڈتی اے۔بدھ کوں ایوان بالا دے اجلاس اچ چیئرمین قائمہ کمیٹی برائے بین الصوبائی رابطہ ولوں سینیٹر عثمان کاکڑ اے تحریک پیش کیتی جئیں دی ایوان منظوری ڈے ڈتی۔
دستور (ترمیمی) بل 2018 آرٹیکل 27 اچ ترمیم دے بل تے قائمہ کمیٹی دی رپورٹ پیش
اسلام آباد ۔ 4 مارچ (اے پی پی) دستور (ترمیمی) بل 2018 آرٹیکل 27 اچ ترمیم دے بل تے قائمہ کمیٹی دی رپورٹ پیش کر ڈتی گئی اے۔۔بدھ کوں یوان بالا دے اجلاس اچ چیئرمین قائمہ کمیٹی برائے قانون و انصاف سینیٹر محمد جاوید عباسی اے رپورٹ ایوان اچ پیش کیتی۔
نجکاری دا عمل مقررہ مدت دے اندر پوری کرنڑ دی کوشش کیتی ونجے،ایں بارے بین الوزارتی کوآرڈینیشن کوں بیا بہتر کیتا ونجے،غیر منافع بخش اداریاں اتے غیر استعمال شدہ املاک دی نجکاری قومی فائدے اچ اے،ایں بارے قومی خزانے تے پوونڑ آلے بوجھ اچ گھٹکی امسی اتے سماجی شعبے تے عوامی فلاحی ترقیاتی منصوبیاں سانگے مالی وسائل میسر امسن،وزیراعظم عمران خان دا مختلف سرکاری اداے اتے املاک دی نجکاری دے عمل اچ پیشرفت بارے جائزہ اجلاس نال خطاب
اسلام آباد ۔ 4 مارچ (اے پی پی) وزیراعظم عمران خان آکھیا جو نجکاری دا عمل مقررہ مدت دے اندر پوری کرنڑ دی کوشش کیتی ونجے،ایں بارے بین الوزارتی کوآرڈینیشن کوں بیا بہتر کیتا ونجے،غیر منافع بخش اداریاں اتے غیر استعمال شدہ املاک دی نجکاری قومی فائدے اچ اے،ایں بارے قومی خزانے تے پوونڑ آلے بوجھ اچ گھٹکی امسی اتے سماجی شعبے تے عوامی فلاحی ترقیاتی منصوبیاں سانگے مالی وسائل میسر امسن۔اے گالھیں انہاں بدھ کوں مختلف سرکاری اداے اتے املاک دی نجکاری دے عمل اچ پیشرفت بارے جائزہ اجلاس نال خطاب کریندیں ہوئیں آکھی۔اجلاس اچ سینیٹ اچ قائد ایوان سینیٹر شبلی فراز ‘ توانائی دے وزیر عمر ایوب ‘ وفاقی وزیر منصوبہ بندی اسد عمر ‘ وزیراعظم دی معاون خصوصی برائے اطلاعات و نشریات ڈاکٹر فردوس عاشق اعوان، وزیراعظم دے مشیر برائے خزانہ عبدالحفیظ شیخ ‘ مشیر تجارت عبدالرزاق داﺅد‘ وزیراعلیٰ خیبرپختونخوا ‘ وزیراعلیٰ گلگت بلتستان‘چیئرمین سرمایہ کاری بورڈ اتے صوبائی وزراءتیمور سلیم جھگڑا ‘ میاں اسلم اتے سینئر حکام شریک ہن۔اجلاس اچ ڈسیا گیا جو ایں سال ست ادارے اتے املاک دی نجکاری دا عمل پورا کر گھدا گئے ،انہاں اچ ڈو آر ایل این جی پاور پلانٹس، ایس ایم ای بینک، سروسز انٹرنیشنل ہوٹل لاہور، جناح کنونشن سنٹر اسلام آباد اتے 27 سرکاری اراضیاں دی نجکاری شامل اے۔
ایوان بالا ہر سال 8مارچ کوں تریمتیں دا اعالمی ڈینھ مناونڑ دی قرارداد متفقہ طور منظور کر گھدی اے
اسلام آباد ۔ 4 مارچ (اے پی پی) ایوان بالا ہر سال 8مارچ کوں تریمتیں دا اعالمی ڈینھ مناونڑ دی قرارداد متفقہ طور منظور کر گھدی اے ۔بدھ کوں ایوان بالا دے اجلاس اچ سینیٹر سیمی ایزدی ایں بارے تحریک پیش کیتی جئیں کوں منظور کر گھدا گیا۔
اسلامی تعاون تنظیم دے خصوصی نمائندے دا مقبوضہ جموں و کشمیر دے مظلوم عوام دے حق اچ بیان قابل تحسین اے، ڈاکٹر فردوس عاشق دا ٹویٹ
اسلام آباد ۔ 4 مارچ (اے پی پی) وزیراعظم دی معاون خصوصی اطلاعات و نشریات ڈاکٹر فردوس عاشق اعوان آکھیے جو اسلامی تعاون تنظیم (او آئی سی) دے سیکرٹری جنرل دے خصوصی نمائندے دا بھارت دے زیر قبضہ جموں و کشمیر دے مظلوم عوام دے حق اچ بیان قابل تحسین اے، اقوام متحدہ دی سلامتی کونسل دیاں قرارداداں دے مطابق کشمیر دے جھڑے دے حل تے او آئی سی دیاں قرارداداں تے عمل درآمد دے مطالبے دا خیر مقدم کریندوں ،اسلامی ملکاں دی نمائندہ تنظیم دا مقبوضہ جموں کشمیر دے عوام نال یکجہتی دا اظہار انہاں مظلوماں کیتے حوصلے دیگ ال اے ۔بدھ کوں معاون خصوصی ڈاکٹر فردوس عاشق اعوان اپنڑے ٹویٹ اچ آکھیے جو او آئی سی دی مسئلہ کشمیر تے کشمیریاں تے پاکستان دے اصولی موقف دی غیر متزلزل حماتی قابل ستائش اے ،اے امت مسلمہ دا کشمیریاں کیتے احساس اے اتے بھارتی انسانیت سوز مظالم دا وی اعتراف اے، ایں اہم اتے سنجیدہ انسانی مسئلے تے او آئی سی دا اجلاس سڈنڑ مظلوم کشمیریاں دے حوصلیں کوں مزید بلند کرنڑ تے انہاں دی آواز چاونڑ کوں مزید طاقت ڈیسی ۔ ڈاکٹر فردوس عاشق اعوان آکھیے جو مقبوضہ جموں کشمیر اچ انسانی حقوق پامال تھیندے پن ، پوری وادی جیل دا منظر پیش کر یندی پئی اے ، اسلامی دنیا اقوام متحدہ دیاں قرارداداں دی روشنی اچ کشمیریاں دا جائز، جمہوری اتے قانونی حق ڈیواونڑ کیتے عملی کردار ادا کرے۔ انہاں آکھیے جو او آئی سی دے وفد دے آزاد جموں کشمیر اتے لائن آف کنٹرول دے دورے نال بھارتی جرم دنیا دے سامنڑے آسن ۔
پاکستان دی ترقی اچ نویں ٹیکنالوجی دا اہم کردار ہوسی ، وفاقی وزیر منصوبہ بندی اسد عمر دا سیمینار نال خطاب
اسلام آباد ۔ 4 مارچ (اے پی پی) وفاقی وزیر منصوبہ بندی اسد عمر آکھیے جو پاکستان دی ترقی اچ نویں ٹیکنالوجی دا اہم کردار ہوسی، دنیا دی پہلی یونیورسٹی اسلامی دنیا اچ بنڑی، اسلام دا پیغام ہی”اقرائ“اے، جامعات اچ ریسرچ دا محور پاکستان دے مسلیں دا حل ہوونڑاں چاہیدے ، انجینرنگ یونیورسٹیز دی استعداد کار ودھاونڑ دی ضرورت اے۔ اے گال انہاں نسٹ یونیورسٹی اچ نالج اکانومی سیمینار نال خطاب کریندے ہوئیں آکھی اے ۔ایں موقع تے چیئرمین ٹاسک فورس نالج اکانومی ڈاکٹر عطاءالرحمن دے علاوہ وزیر اعظم دے معاون خصوصی ڈیجیٹل پاکستان تانیہ ایدریس وی شریک ہن ۔ وفاقی وزیر اسد عمر آکھیا جو پاکستان دی ترقی اچ نویں ٹیکنالوجی دا اہم کردار ہوسی۔ انہاں آکھیے جو تعلیمی اداریں کوں مزید زوال پذیر کائناں تھیونڑ ڈیسوں ، پاکستان دے مستقبل اچ سرمایہ کاری کریندے پیوں ۔ اسد عمر آکھیے جو تحریک انصاف دی حکومت اعلیٰ تعلیمی ترقیاتی بجٹ اچ دو گنا ودھارا کیتے اساڈے دور اچ تعلیم دا ترقیاتی بجٹ 21 ارب توں 29 ارب تئیں ودھایا گے ۔
پاکستان اچ واپس آتے خدمات انجما ڈیونڑ دے خواہشمند باہرلے ملک رہنڑ آلے ڈاکٹرز کیتے کجھ کرنڑ چاہندوں ، ڈاکٹر ظفر مرزا
اسلام آباد ۔ 4 مارچ (اے پی پی) وزیر اعظم دے معاون خصوصی صحت ڈاکٹر ظفر مرزا آکھیے جو باہرلے ملک اچ موجود ڈاکٹرز پاکستان واپس آتے خدمات انجام ڈیونڑ چاہندن ،باہرلے ملک رہنڑ آلے ڈاکٹر پاکستان کیتے کجھ کرنڑ چاہندن لیکن انہاں ڈے کوئی پلیٹ فارم کائنی اساڈا گروتھ ریٹ ایشیا اچ ساریں توں گھٹ اے ۔ بدھ کوں راولپنڈی میڈیکل یونیورسٹی اچ بین الاقوامی طبی کانفرنس نال خطاب کریندے ہوئیں ڈاکٹر ظفر مرزا آکھیے جو راولپنڈی میڈیکل یونیورسٹی اچ بطور سابق طالبعلم آتے خوشی تھیندی اے ،انہاں آکھیے جو اساں بیماریاں دے خطرے دے شکار ملک اچ رہندوں ۔اساڈا گروتھ ریٹ ایشیا اچ ساریں توں گھٹ اے ۔ انہاں آکھیے اگر اچ شعبہ صحت دے مسلیں تے گال کراں تاں تساں پریشان تھی ویسو، انہاں آکھیے جو حکومت وزیراعظم عمران خان دے ویژن دے تحت صحت دے شعبے اچ وڈے پیمانے تے اصلاحات متعارف کرویندی پئی اے ۔ ڈاکٹر ظفر مرزا مزید آکھیا جو صحت حکومت دی پہلی ترجیح اے ،انہاں آکھیے جو حکومت یونیورسل ہیلتھ کوریج کوں یقینی بنڑاونڑ کیتے پرعزم اے ۔انہاں آکھیے جو صحت دی 70 فیصد شکایتاں دا ازالہ پرائمری ہیلتھ لیول تے کیتا ونج سگدے ۔
آندے 24گھنٹے ملک اچ مینھ وسنڑ دا امکان اے
اسلام آباد ۔ 4 مارچ (اے پی پی) محکمہ موسمیات آکھیے جو 24 گھنٹے اچ خیبر پختونخوا، اسلام آباد، پنجاب، شمال مشرقی بلوچستان، کشمیر اتے گلگت بلتستان اچ کھمنڑ دے نال مینھ وسنڑ دا امکان اے ۔ رپورٹ دے مطابق گزریل 24 گھنٹے اچ بلوچستان، جنوبی پنجاب اتے کشمیر دے کجھ ضلعیں اچ تکھی ہوا تے کھمنڑ نال مینھ وسیا ملک دیاں بیاں جہیں تے موسم رکھا رہیا ۔ ایں دوران بارکھان اچ 34 ملی میٹر، قلات 2، ڈی جی خان، کوٹ ادو 12، ملتان 6، لیہ 5 اتے بہاولپور اچ 4 ملی میٹر مینھ وسیا ۔ بدھ کوں ریکارڈ کیتے گے گھٹ توں گھٹ درجہ حرارت دی رپورٹ دے مطابق استور اچ درجہ حرارت منفی 3، کالام منفی2، گو پس اتے اسکردواچ صفر ڈگری سینٹی گریڈ ریکارڈ کیتا گے۔
ملائیشیا دے نویں وزیراعظم پارلیمنٹ دا اجلاس ڈو مہینے کیتے ملتوی کرڈتے
کوالالمپور ۔ 4 مارچ (اے پی پی) ملائیشیا دے نویں وزیر اعظم محی الدین یاسین پارلیمنٹ دی کارروائی دا آغاز ڈو مہینے کیتے ملتوی کرڈتے ۔برطانوی خبررساں ادارے دے مطابق ملائشیا دی پارلمنٹ دے اسپیکر محمد عارف محمد یوسف ہک بیان اچ آکھیے جو انہاں کوں محی الدین ولوں ہک خط ملیے جیں اچ آکھیا گے جو اجلاس دا آغاز 18 مئی توں تھیسی ۔واضع رہے جو 94 سالہ مہاتیرمحمد دے اچانک استعفی دے بعد شاہ سلطان عبداللہ سلطان احمد شاہ محی الدین کوں ملائشیا دا نواں وزیر اعظم مقرر کیتا ہئی ۔
ڈیرہ غازی خان، سخی سرورزائرین دیاں 4 بساں ندی اچ ڈھہہ پن
ڈیرہ غازی خان۔ 4 مارچ (اے پی پی) ڈیرہ غازی خان سخی سرور مینھ پاروں ندی اچ اچانک ودھ سارا پانڑیں آگیا جیں نال ندی اچ کھڑیاں زائرین دیاں چار بساں پانڑیں اچ وھہہ گن ۔بدھ کوں نجی نیوز چینل دے مطابق بساں ندی اچ ڈھنڑ پاروں 10 لوک وی اوندے نال پانڑیں اچ وھہہ گن جیں دے نتیجے اچ ہک بندہ موقع تے جاں بحق تھی گے جڈاں جو بئے 9لوکاں کوں بچا گھدا گے ۔پولیس دے مطابق دربار سخی سرور دی زیارت کیتے پنجاب توں زائرین دیاں 4 بساں سالانہ عرس تے آئیاں ہن ۔ چھیکڑی اطلاع دے مطابق پولیس تے ریسکیو دیاں ٹیماں امدادی کاروائیاں اچ مصروف ہن ۔
امریکی صدر ٹرمپ دی انتخابی ٹیم دا واشنگٹن پوسٹ دے خلاف مقدمہ
واشنگٹن ۔ 4 مارچ (اے پی پی) امریکی صدر ڈونلڈ ٹرمپ دی انتخابی پبلسٹی ٹیم 2016 ءدے صدارتی انتخابات دے نتیجے کوں متاثر کرنڑ بارے کوڑی رپورٹ شائع کرنڑ دے معاملے اچ واشنگٹن پوسٹ دے خلاف مقدمہ درج کراڈتے ۔ ٹرمپ دی انتخابی ٹیم دے ہک ترجمان ڈسائے جو واشنگٹن پوسٹ 2016ءانتخابات دے نتائج کوں متاثر کرنڑ کیتے روس دے نال رل تے مبینہ سازش رچاونڑ بارے کوڑی رپورٹ چھاپی ہئی ایں ٹیم گزریل ہفتے نیویارک ٹائمز دے خلاف وی مقدمہ درج کرایا ہئی ۔
ترکی دی نویں ویزہ پالیسی ، 11ملکاں دے سیاح ویزے دے بغیر آ سگسن
انقرہ۔ 4 مارچ (اے پی پی) ترکی 11 ملکاں کیتے سیاحتی ویزے دی پابندی ختم کرڈتی اے۔ ایں سلسلے اچ ہک صدارتی حکم نامہ سرکاری گزٹ اچ شائع کرڈتا گے جیں دے ،آسٹریا، بیلجیئم، برطانیہ،کروشیا، ہالینڈ،آئرلینڈ، سپین، مالٹا، ناروے، پولینڈ تے پرتگال دے عام پاسپورٹس دے حامل شہری بغیر سیاحتی ویزہ ترکی آ سگسن جنہاں کوں اتھاں 90 ڈینھ رہنڑ دی اجازت ہوسی ۔
پشاور زلمی تے کوئٹہ گلیڈی ایٹرز دا پیچا اج پمسی
اسلام آباد ۔ 4 مارچ (اے پی پی) پاکستان کرکٹ بورڈ دے زیر اہتمام جاری پنجویں پاکستان سپر لیگ اچ اج خمیس کوں مزدی ہک میچ کھیڈیا ویسی جیں اچ پشاور زلمی اتے کوئٹہ گلیڈی ایٹرز دیاں ٹیماں راولپنڈی سٹیڈیم اچ آمے سامھیں ہوسن ۔ اے میچ رات ست وجے شروع تھیسی ۔ تفصیل دے مطابق ایچ بی ایل پاکستان سپر لیگ 2020ءدا میلہ پورے ملک اچ زور و شور نال جاری اے جیں اچ شائقین کوں چنگی کرکٹ ڈیکھنڑ کوں ملدی پئی اے ۔ راولپنڈی اچ وسنڑ آلے کرکٹ دے مداح تے مقامی کھلاڑیاں دے اہلخانہ راولپنڈی اچ پی ایس ایل دے میچ تے بہوں خوش نظر آندے پن ۔ لیگ دا 18واں میچ اج خمیس کوں راولپنڈی اچ پشاور زلمی اتے کوئٹہ گلیڈی ایٹرز دیاں ٹیماں وچال پنڈی سٹیڈیم اچ کھیڈیا ویسی ۔
کورونا وائرس ، کویت دی 10 ملکاں دے شہریاں تے نویں پابندی
کویت سٹی ۔ 4 مارچ (اے پی پی) کویت 10 ملکاں توں آونر آلے تے اینٹی کورونا میڈیکل سرٹیفکیٹ پیش کرنڑ دی شرط لاڈتی اے ۔حکام دے مطابق جیرھے مسافر طبی سرٹیفکیٹ پیش کائناں کریسن انہاں کوں وختی ڈی پورٹ کرڈتا ویسی ۔کویتی اخبار ’الرائی‘ کویتی سول ایوی ایشن دی طرفو جاری بیان دے حوالے نال ڈسائے جو 10 ملکاں اچ بھارت ، ترکی، مصر، فلپائن، بنگلہ دیش، شام، آذربائیجان، سری لنکا، جارجیا اتے لبنان شامل ہن۔ انہاں ملکاں توں آونڑ آلے مسافراں تے پابندی لاڈتی گی اے جو انہاں کوں اوں ویلھے تئیں کویت اچ داخل نہ تھیونڑ ویسی جڈاں جو او انہاں ملکاں اچ موجود کویتی سفارتخانے یا قونصلیٹ توں تصدیق شدہ اینٹی کورونا میڈیکل سرٹیفکیٹ پیش نی کریندے ۔
امریکہ ملک اچ چینی صحافیاں دی تعداد محدود کرڈتی، چین دی مذمت
واشنگٹن ۔ 4 مارچ (اے پی پی) امریکی محکمہ خارجہ بیجنگ دے زیرِ انتظام ذرائع ابلاغ دے امریکہ اچ قائم دفتراں اچ چینی عملے دی تعداد محدود کرڈتی اے ۔ محکمہ خارجہ دے مطابق انہاں دے اقدام غیر ملکی صحافیاں توں چین دے غیر منصفانہ سلوک دے جواب اچ کیتے ۔امریکی محکمہ خارجہ ہک بیان اچ آکھیے جو چین دے سرکاری ذرائع ابلاغ دے 5 دفتراں اچ کم کرنڑ کیتے چینی شہریاں دی تعداد 13 مارچ توں100 تئیں محدود ہوسی۔ اے تعداد موجودہ 160 دے مقابلے اچ تقریباً 40 فیصد گھٹ اے۔ چینی وزارت خارجہ دے ترجمان چاو لی جیان آکھیے جو امریکی محکمہ خارجہ دی سوچ سرد جنگ دی ذہنیت اتے نظریاتی تعصب تے مبنی اے اتے امریکہ اچ چینی ذرائع ابلاغ کوں سیاسی طور تے دباونڑ کیتے غیر معقول وجوہات دا استعمال کیتا گے جیں دی چین سختی نال مخالفت اتے ودھ ساری مذمت کریندے ۔
11 رجب بمطابق 6 مارچ کوں چندر کعبہ دے اتوں ہوسی
مکہ ۔ 4 مارچ (اے پی پی) جدہ دی فلکیاتی سوسائٹی آکھیے جو11 رجب بمطابق 6 مارچ کوں چندر کعبہ دے اتوں ہوسی۔ اے خوبصورت نظارہ سوکھیں ڈٹھا ونج سگسی ۔ فلکیاتی سوسائٹی آکھیے جو اجوکے سال چندر دا کعبہ دے اتوں آونڑ دا اے پہلا موقع ہوسی جیں کوں سوکھیں ڈٹھا ونج سگدے ۔ مقامی اخبار 24 جدہ دی فلکیاتی سوسائٹی دے حوالے نال ڈسائے جو چندر 9 وج تے 55 منٹ تے کعبے تے اتوں آسی جیں کوں ڈیکھ تے کعبے دی سمت دا تعین کرنڑ وی سوکھا تھی ویسی ۔
پاکستان امن دا داعی اتے ایندی قدر جانڑدوں ،بھارتی جنگی طیارہ مار ڈھاونڑ دے باوجود پائلٹ کوں رہا کرڈتا کیوں جو اساں امن چاہندوں ، صدر مملکت ڈاکٹر عارف علوی
اسلام آباد ۔ 4 مارچ (اے پی پی) صدر مملکت ڈاکٹر عارف علوی آکھیے جو پاکستان امن دا داعی اے کیوں جو اساں امن دی قدر قیمت جانڑدوں ،پاکستان گزریل سال بھارتی جنگی طیارہ مار ڈھاونڑ دے باوجود بھارتی پائلٹ کوں رہا کرڈتا ہئی کیوں جو اساں امن چاہندوں ، وزیر اعظم عمران خان بھارت کوں امن دی پیشکش کریندے ہوئیں واضح طور تے آکھیا ہئی جو اگر بھارت ہک قدم اگوں ودھسی تاں پاکستان 5 قدم اگوں ودھسی ،جنگاں دی تاریخ اچ اساکوں تباہی ،لٹ مار تے ڈوجھیں دے استحصال دے سوال کجھ نی ملدا ،جنگاں نال امن دا حصول ممکن کائنی ہوندا تے نہ ہی انہاں نال قوماں دی نویں سروں تعمیر ممکن تھیندی اے ۔اے گال انہاں بدھ کوں عالمی سٹریٹجک خطرات اتے رد عمل تے بین الاقوامی کانفرنس نال بطور مہمان خصوصی خطاب کریندے ہوئیں آکھی اے ۔صدر مملکت آکھیے جو عالمی منظر نامے اچ مسلسل تبدیلیاںتھیندیاں پن ، بدلتی دنیا اچ اے ضروری ہئی جو بنی نوع انسان تاریخ توں سکھ تے اگوں ودھیے مگر گزریل ڈو ترائے صدیاں اچ اساں جیرھے تجربے تے مشاہدے کیتن انہاں دے مطابق انسان تاریخ توں سبق نی سکھیا ، اگر دنیا کجھ سکھیے تاں او اے ہے جو ہتھیار کیویں حاصل کیتے ونجن تے جنگاں کیویں لڑیاں ونجن ، اے گال قابل افسوس اے جو انسانیت خراب تجربیں توں سبق نی گھدا ،انہاں آکھیے جو ماضی اچ خطے دا استحصال تے وسائل دی لٹ مار تھیندی رہی اے جنگاں دی تاریخ توں اساکوں تباہی تے لٹ مار دے سوا کجھ نی ملدا ۔انہاں آکھیے جو اے گال دی قابل افسوس اے جو اجوکے دور دیاں جنگاں وی پرائیویٹائز تھی گن ، عراق تے بئے خطی اچ ماضی دے نیڑے کرائے دے فوجیاں دا استعمال کیتا گے ۔ صدر مملکت آکھیے جو اے وی حقیقت اے جو موجودہ دور اچ غربت دی شرح گھٹ تھئی اے لیکن انساناں دے درمیان امتیاز ودھ گے ۔ دنیا دے بئے ملکاں وانگوں پاکستان اقتصادی طور تے اپنڑے آپ کوں مضبوط کرنڑ تے توجہ کریندا پے تاں جو سرحداں تے سرحداں دے پار خطرہ موجود ہوندے ۔انہاں خطریں نال نبڑنڑ تے چیلنجز دا مقابلہ کرنڑ کیتے حکمت عملی وضع کرنڑ ضروری اے ،اگر کہیں دی ہمسائیگی اچ بھاہ لگ ونجے تاں اینکوں وسماونڑ دے سوا کوئی چارہ کائنی ہندا ۔
او آئی سی دے ذیلی ادارہ عالم اسلامی تعلیم، سائنس، تے ثقافت دے ڈائریکٹر جنرل ، ڈاکٹر الملک دا صدر مملکت ڈاکٹر عارف علوی کوں خط
اسلام آباد ۔ 4 مارچ (اے پی پی) اسلامی تعاون تنظیم(او آئی سی ) دے ذیلی ادارہ عالم اسلامی تعلیم، سائنس، اتے ثقافت دے ڈائریکٹر جنرل ، ڈاکٹر الملک صدر مملکت ڈاکٹر عارف علوی کوں خط لکھ پٹھیے جیں اچ انہاں دے صدارتی اقدام مصنوعی ذہانت اتے کمپیوٹنگ دی تعریف کیتی گی اے ۔بدھ کوں جاری بیان دے مطابق ڈاکٹر الملک صدر مملکت کوں خط اچ لکھیے جو اسلامی ملک پاکستان تے تجربے توں سکھنڑ چاہندن تے ایں ضمن اچ پاکستان دی مدد چاہندن ۔صدارتی اقدام مصنوعی ذہانت اتے کمپیوٹنگ ہک کامیاب مثال اے اتے تنظیم اسلامی ایں اقدام کوں باقی اسلامی ملکاں اچ وی متعارف کراونڑ چاہندی اے ۔
الیکشن کمیشن دی پیپلز پارٹی دے سینیٹر تاج حیدر دی درخواست تے لاڑکانہ توں قومی اسمبلی دے حلقے اچ انتخابی فہرستاں اچ مبینہ بے قاعدگیاں دے الزام دی تحقیقات کیتے اعلیٰ طح دی انکوائری کمیٹی بنڑا ڈتی
اسلام آباد ۔ 4 مارچ (اے پی پی) الیکشن کمیشن پیپلز پارٹی دے رہنما سینیٹر تاج حیدر دی درخواست تے لاڑکانہ توں قومی اسمبلی دے حلقے اچ انتخابی فہرستاں اچ مبینہ بے قاعدگیاں دے الزام دی تحقیقات کیتے اعلیٰ سطح دی انکوائری کمیٹی تشکیل ڈے ڈتی اے ۔ بدھ کوں پاکستان پیپلز پارٹی دے مرکزی الیکشن سیل دے انچارج تاج حیدر دی درخواست تے چیف الیکشن کمشنر الیکشن کمیشن اتے نادرا دے افسراں تے مشتمل انکوائری کمیٹی بنڑائی اے جیرھی جو لاڑکانہ اچ انتخابی فہرستاں اچ مبینہ بے قاعدگیاں دی تحقیقات کریسی تے الیکشن کمیشن کوں رپورٹ پیش کریسی ۔ چیف الیکشن کمشنر انکوائری ٹیم کوں غلطیاں توں پاک انتخابی فہرستاں دی تیاری کوں یقینی بنڑاونڑ دی سختی نال تائید کیتی اے ۔
پی ایم اے مظفر گڑھ دا ڈاکٹر شانزے ہاشمی دے جاں بحق تھیونڑ تے افسوس دا اظہار
مظفرگڑھ ۔ 4 مارچ (اے پی پی) پاکستان میڈیکل ایسوسی ایشن مظفرگڑھ لنگر سرائے دے نیڑے کار حادثے اچ ویمن میڈیکل آفیسر رورل ہیلتھ سنٹر رنگ پور ڈاکٹر شانزے ہاشمی دے جاں بحق تھیونڑ تے ڈکھ دا اظہار کریندے ہوئیں اینکوں مرحومہ دے لواحقین اتے شعبہ صحت کیتے ناقابل تلافی ضیان قرار ڈتے تے مرحومہ دے اچے درجے دی دعا منگی اے ۔یاد رہے جو رورل ہیلتھ سنٹر رنگپور دی ویمن میڈیکل آفیسر لیڈی ڈاکٹر شانزے ھاشمی گزریل ڈینھ ڈیوٹی تو گھر واپس مظفر گڑھ آندے ہوئیں ہائی ایس ویگن دے نال کار حادثے اچ موقع تے جاں بحق تھی گیاں تے انہاں دا ڈرائیور زخمی تھی گیا جیں دی حالت حالی وی تشویشناک ڈسائی ویندی پئی اے ۔ مرحومہ لیڈی ڈاکٹر شانزے ھاشمی سابق وفاقی وزیر مملکت شاہد جمیل، سابق آئی جی بلوچستان میاں ایوب قریشی اتے پرنسپل میڈیکل آفیسر ڈی ایچ کیو ہسپتال مظفر گڑھ ڈاکٹر محمد تنویر قریشی صاحب دی بھنڑیجی ہئی ۔
ملتان اچ ودھ سارا مینھ وسنڑ پاروں سڑکاں تے پانڑیں جمع تھی گیا
ملتان ۔04 مارچ (اے پی پی)بدھ دی سویل ملتان اچ ودھ سارے مینھ وسنڑ پاروں مختلف علاقیں اچ سڑکاں تے پانڑیں جمع تھی گے ۔محکمہ موسمیات دے مطابق سویلے اٹھ وجے توں وقفے وقفے نال مینھ وسیا جیرھا جو 11وجے تئیں وسدا رہیا ۔ملتان شہر اچ 5.6ملی میٹر مینھ وسیا تے آندے ڈو ڈینھ تئیں مزید مینھ وسنڑ دا امکان اے ۔ منیجنگ ڈائریکٹرواسا نسیم خالد چانڈیو دی طرفوں واسااہلکاراں کوں ہائی الرٹ رہنڑ دا حکم ڈتا گے جڈاں جو سارے سیوریج، ڈسپوزل اسٹیشنز ڈویژناں اچ ہنگامی حالت دا اعلان کرڈتا گے ۔ ایم ڈی واسا دی ہدایات دے مطابق مینھ رکدے ہی سیوریج ڈویژناں دے افسران کوں ٹیماں ،مشینری دے رلے وختی فیلڈ اچ ونجنڑ دا حکم ڈتا گے ۔ساریاں سڑکاں تے میٹرو روٹ توں ہنگامی بنیاداں تے مینھ دا پانڑیں کڈھنڑ دی ہدایت کیتی گی اے ۔انہاں سارے ڈسپوزل سٹیشناں کوں وی فل کپیسٹی تے چلاونڑ دا حکم ڈتے جڈاں جو لوڈ شیڈنگ دی صورت اچ ڈسپوزل اسٹیشنز کوں جنریٹرز تے چلایا ونجے ۔انہاں آکھیے جو پورے شہر توں مینھ دے پانڑیں دی نکاسی تئیں سارے افسر فیلڈ اچ اپنڑی حاضری یقینی بنڑاون ،انہاں آکھیے جو پانڑیں کڈھنڑ دا اپریشن وختی شروع کیتا ونجے تاں جو شہریاں کوں آونج اچ کوئی اوکھ نہ تھیوے ۔
About The Author
اے وی پڑھو
اسلم انصاری :ہک ہمہ دان عالم تے شاعر||رانا محبوب اختر
موہری سرائیکی تحریک دی کہاݨی…||ڈاکٹر احسن واگھا
فیمینسٹ!!!۔۔۔۔۔|| ذلفی